Read NQAARIIT NE ROOG Kolos 4 Bible Online

Kolos 4 - NQAARIIT NE ROOG bible

Kolos 4

¹Nuun yaal pind ke, fat nu ñaaƴin o cofel ndeer nuun fo faɗ nuun, let a qeeñ, and ee nuun itam, nu njega o Yaal na asamaan.

²Nuun fop, fat nu njof mbaambir na qeƭ, yokoox teen, ndef no ngidim.

³Nqeɗanyo a in itam, ndax Roog a waag o ci a in o gom no calel ke. Neene, xam waag o yegnitaa kunpa fee Kiristaa taxna um jengel,

⁴andnin wiin we a qool qac ne ta wartaxama.

⁵A jega waa andoona yee ngimafulee. Kuu nu ndeerna fa den, fat nu ñaaƴnitin fo yiif, mbañ dara no daaw nuun a ref kasaara.

⁶Fat a ƭelem nuun a yoon fa yirmande, a njem, nu mbaag o and ke nu mbarna o ndoon o kiin oo kiin.

⁷Xan Tisik fee o pog in refna o caajal o kore’u fo o yoon es oxe fexuuma no calel ke no Yaal oxe a lay a nuun fop ke jofna na mi.

⁸Leng kut taxu um luliidan me nuun, ta ref ndax nu mbaag o and ne i ndefitna, xa laaw nuun a ndal.

⁹Kaam lulin, ta nar o yooniid fa Onesiim, o pog in o kore’u xe xeeñ in a damooxna lool, nu mbogitna xeet. Xan a lay a nuun fop ke refna meeke.

¹⁰Aristark fee fogtuuma kaso, oxe simnaa a nuun, ten fa Mark fee o maasir Barnabaas. Ten o mat ne’oogum, ye layuuma yee boo ta garna, fat nu ndalnin a paax.

¹¹Yeesu fee da lastitaa Yustus oo, oxe simnaa a nuun. Ndeer Yaawuur we, weene soom ndefu we na njalaa fa mi, ndax Maat ne Roog a joot. Yaaloor saƭku a ndefu na mi.

¹²Epafaras fee nu mbogitna xeet oxe simnaa a nuun. O tag Kiristaa Yeesu yoo, too a naaga o gomreel na qeƭ yaam nuun, ndax nu ñak sik, saƭik no fop ke refna o bug Roog.

¹³Waagaanum o seede’an ee a jaɓa xij tigi yaam nuun fo yaam we ndefna Lawodise fa Hiyerapolis.

¹⁴Lik fee o baawaadin oxe i mbexna mbex oxe simnaa a nuun itam, ten fa Demas.

¹⁵Simnanyo a in fog we ndefna Lawodise, simnan a in a Nimfaas fo mbokatax ne no gimu we ndefna no mbind um.

¹⁶Boo nu njangna o leetar oleeke a ndeer nuun boo ƈut, ngela fat nu ƭofit ta jangel no mbokatax naa no gimu waa Lawodise, o leetar den itam a jangel a ndeer nuun.

¹⁷Layanaamoo a Arkip ta foŋik calel ke o Yaal oxe a doxnuuna, ndax ta waagin o jalit ne ta waritna.

¹⁸Mi Pool, mexe simnaa a nuun, bindtan o ɓay es. Ngela baa a yiif nuun a naax a ceng ake reftuuma. Yaasam nu ndaawit na Roog yirmande!