Read NQAARIIT NE ROOG 1 Tesalonik 3 Bible Online

1 Tesalonik 3 - NQAARIIT NE ROOG bible

1 Tesalonik 3

¹Ne i mbaagateerna o muñ koy, i ngebooxa o yoq Aten, in soom,

²soo ngebliid a Timote fee o pog in no ngim onqe, too a ref o caajal Roog oxaa na waare’aa Yegil mbaax ne Kiristaa. Kaa i luliidin, ndax ta saƭkand a nuun, a saƭakin a nuun no ngim onqe nu njegna,

³ndax o leng na nuun yenkee no ƭeetlax ke mbadiidna. A woora a nuun sax ee keene i njagandane.

⁴Ne ta jegitna o mat i yegnit’un a nuun yaaga i ndefna fa nuun ee xan ƭeetlax mayu a ndal took in. Nu andoodaan sax.

⁵Ten taxu, ye waag’ateeranuuma o muñ, luliidaam a Timote me nuun, ndax ta feednaam o ngim nuun, yaam kaam saɗaroogu yee xan o poofoog oxe a nax a nuun boo calel ƭomu in a ndef kasaara.

⁶Kaa koy, miñee dara, Timote a ɓisiida o nan o felu no ne nu ndamooritna no ngim onqe fo ne nu mbexritna. A doona teen, a lay ee kaa nu ngen no nqalaattaa a in jam soom, mbug o nga a in bo. Neene itam, i mbugtun na nuun.

⁷Fog we, o ngim nuun a taxa boo i mbaag o yaaloortaa na nuun kam coono ke fo natu ke na ndalaa took in fop.

⁸Ndiiki koy, in we moƴaa o saƭik no ñoow in, yaam ne nu ndamooxna a paax no Yaal oxe.

⁹Kaam ee, ndiiki i mbaaga o ngidim a Roog a paax no ɗaay ole i njegitna na nuun mbaambir Roog in.

¹⁰Ñaal fo o yeng, kaa i ngen no nqeɗaa, too saƭik teen, ndax i njeg o gom olaa i mbaagna o ngarit boo mbadin ke yoqna no ngim nuun.

¹¹Yaasam Roog Faap in fa xoox um fo o Yaal in Yeesu a ƭox a in boo me na nuun.

¹²Yaasam o Yaal oxe a xayandaa, too a mayƭandaa o mbeq onqe nu njegna a ndeer nuun fo ne nu mbexitna lakas we itam, boo ta nand fo o mbeq onqe i njegna na nuun.

¹³Yaasam ta saƭkand a qeeñ nuun kam o tedel o jegee ŋañel leng paam Roog Faap in, boo yaa o Yaal in Yeesu a garkaa, a yoon fo tedu we ten fop.