Read NQAARIIT NE ROOG 1 Tesalonik 5 Bible Online

1 Tesalonik 5 - NQAARIIT NE ROOG bible

1 Tesalonik 5

¹Fog we, kaam ee nu soxla’ee o mbindel ke farna no camaane ke fo baxtu ke keene a xewkaa.

²Yaam nu andooda xil ee bes fee o Yaal oxe a garkaa, xan a nand nen o kuuɗ o inooxu kam o yeng.

³Yaa wiin we a ngapko layaa yee «Ndaw jam!» tee «Ndaw booru!», ndak fo ndak nen gaaj, yaq fee a dalitkaa took den, too o leng waagkiran o daɗ a koom.

⁴Nuun o mat fog we, nu ndefee kam o niɓaan ole, boo ta taxkaa bes feene a bet a nuun nen o kuuɗ.

⁵Kaa koy, kuu ta waagna waag o ref fop, na qoolaand ale nu ndime, mbog no ñaal ne: I ndefee no yeng ole, ne’katiim no niɓaan ole.

⁶Ba i ƭaan boog nen lakas we, ndaa fat i yetoox, too mbod no ke i mbi’aa.

⁷We na ƭaanaa, ɗaaɗaan oo kam o yeng ole, soo we na yeraa a ndef yeeyer kam o yeng ole itam.

⁸Fat i mbod no ke i mbi’aa, in we ndefna na qoolaand ale. Fat ndoki njelem in a ref o ngim fo o mbeq, soo o maxanda njelem in a ref i yaakaaraa a muc ale.

⁹Yaam Roog jagandanee a in a qaw um, ndaa kaa bug i njeg a muc ale na pexey o Yaal in Yeesu Kiristaa.

¹⁰Kaa xonan a in, ndax i ñoowaa fo ten, yaa i nqonna mbaat yaa i ñoowaa.

¹¹Yaaga boog, naangyo o saƭakinooxaa too njokraa ne nu ndaawna o mbi’aa.

¹²Fog we, in we nqeɗaa a nuun, nu niw we na njalaa fa nuun, a ƭoxaa, too a saƭakinaa a nuun no Yaal oxe.

¹³Fat nu njamsa’ooraa a ndeer nuun, too njeg na den o mbeq o maak yaam a pi den.

¹⁴Fog we, in we maƭooxaa a nuun kene: Soqyo we tayilna, saƭakinaa we mboosna, ndimle’aa we neewna doole, njeg o muñ a ndeer no wiin we fop.

¹⁵Mbootooxyo o ndabdinoor ƭomu, ndaa naangyo o mbaaƭaa paax a ndeer no gimu we fo a ndeer no wiin we fop.

¹⁶Fat o ɗaay a ref fa nuun kili.

¹⁷Naangyo o nqeɗaa ñaal fo o yeng,

¹⁸no kuu ta waagna waag o ref, ngidimyo a Roog, yaam keene Roog a cungaa na nuun, yaam ne nu mbogna fa Kiristaa Yeesu.

¹⁹Ba nu ñuf Yiif le Roog muk,

²⁰too ba nu nqeef ci’it o jo’tanaa a Roog,

²¹ndaa naangyo o ngorooxaa tig oo tig, ngeek paax ke,

²²paaxeer kuu ndefna nu ngoƭan.

²³Yaasam Roog fee na ci’taa jam, a mayƭand a nuun fo o tedel. Yaasam ngiin nuun fop: Yiif nuun fo o laaw nuun fo cer nuun a ñak sik, boo yaa o Yaal in Yeesu Kiristaa a nomtooxiidkaa.

²⁴Oxe na xoyaa a nuun a gore’a, too xan a fadnin itam.

²⁵Fog we, fat nu nqeɗanaa a in itam.

²⁶Naangyo o simnitaa o fog ole fop mboon o mbeq!

²⁷Mexe daaɓoortan a nuun no gon le no Yaal oxe yee xan o leetar olene a jangel mbaambir no fog ole fop.

²⁸Yaasam yirmande fee no Yaal oxe Yeesu Kiristaa a ref fa nuun, nuun fop.