Read NQAARIIT NE ROOG Yosuwe 11 Bible Online

Yosuwe 11 - NQAARIIT NE ROOG bible

Yosuwe 11

¹Ye Yabin fee o maad Hasoor a yegna fo ndam ne Yosuwe, a hebla duleer maa Yobaab fee o maad Madon, maa no maad oxe Simron fo maa no maad oxe Akesaf.

²A lulta itam maa no maad we na xa cegel axe na xa coong axe no ɓemb-roog o janoon fo no jegel olaa na xa saawit axaa Yordaan ngaritna no ɓemb-roog o ñamaak ole no maag o maas olaa Genesaret fo no jegel olaa na yulanq ake fo na ƥeeraamb alaa paam Door farna no mudand.

³A lultahina maa no Kaakanaan we no batand fo we no mudand, maa no Aa-amori we, Heeheet we, Peeperisi we, Yeeyebus we ngen’ina na xa coong axe fo maa no Hiihiwi we ngen’ina na caf ale no joong olaa Hermon, kam o jegel olaa Mispa.

⁴Weene fop a inooxa fo xiixire den waa mbaagandeena o lim, yaam a mayit nen pep lanq na ƥeeraamb o maag. Pis ke fa sareet-xire ke itam kaa may’u bo.

⁵Maad weene fop a mbokatoora soo a ngar a sip saŋe den paam poofi ke Merom, ndax da nqire fo Ii-isra’el we.

⁶O Yaal oxe a laya a Yosuwe yee: «Ba o saɗar a den, yaam xam ɓoxot a den na xa ƥay no Ii-isra’el we, too boo waxtu feeke feet a fadaa, xan a soƥ da nqon den fop. Fat nu ƭeg xa tod axe no pis ke den soo ndox a sareet-xire ke.»

⁷Yosuwe fo xiixire we ten fop a mbeta fañ we den paam poofi ke Merom soo a yen took den.

⁸O Yaal oxe a ɓoxota a den na xa ƥay no Ii-isra’el we. Ii-isra’el we a nqawa a den, a ndaabaa a den boo Sidoŋ fa maak fee, no ɓemb-roog o ñamaak, a jof Misrefot-Mayiim, a waaƭik a yulanq alaa Mispe farna fo batand. A mbara a den too nqaƴ’ee o leng ta daɗ.

⁹Yosuwe a fi’a a den ne o Yaal oxe a heblit’uuna o ten. A ɗega xa tod axe no pis ke soo a dox a sareet-xire ke den.

¹⁰Ye Yosuwe a saktooxiidaa, a jaɓa a Hasoor fee reeƭna yaaga teeru fee adooxan’ina maat ke no ɓemb-roog o janoon soo a war o maad oxaa.

¹¹Ii-isra’el we a mbarta we ngenna Hasoor fop laƥ boo yoqatee o leng oxaa na ñoowaa soo a ndaaɓ teeru faa.

¹²Yosuwe a xawa maad waa mbokatoor’ina fop, a jaɓ a saax ake den soo a saŋkit maad we fo we ngenna no teeru keene fop laƥ, ne Moyiis fee o tag no Yaal oxe a heblit’uuna o ten.

¹³Kaa koy, Ii-isra’el we ndaaɓ’ee teeru ke ndefna na ñaang ake, a refangee Hasoor fee Yosuwe a raaɓin’ina.

¹⁴Ii-isra’el we a njangala ke da soƥ’ina kam teeru keene boo no cegel ke. Kaa koy, we ngenoogna no teeru keene, a mbarta a den laƥ too nqaƴee o leng ta ñoow.

¹⁵Moyiis kaa daawin’u a Yosuwe bargal ke o Yaal oxe a coox’uuna fop no kaa farna no keene. Yosuwe a reeftaan deŋ ne ta heblit’eena o ten.

¹⁶Yosuwe a jaɓa saax le fop: o jegel ole na xa coong axe Yudaa, ole no ɓemb-roog o ñamaak, ole Goseen, ole na yulanq ake, ole na xa saawit axaa Yordaan, ole na xa coong axe Isra’el fo ole na xa saawit axe no ɓemb-roog o janoon.

¹⁷Yosuwe a xawa soo a war maad we na xa piisel axe ndefna ndeer o joong ole naagna halit paam Seyiir no ɓemb-roog o ñamaak fa Baal-Gad kam a yulanq alaa Libaŋ na caf alaa no joong olaa Hermon no ɓemb-roog o janoon.

¹⁸Xire fee a ndeer Yosuwe fo maad weene a miñ’a lool.

¹⁹Hiihiwi we ngenna Gibe’on soom njamsa’oor’u fo Ii-isra’el we. Teeru lakas ke fop koy a njaɓit’e ƥonax.

²⁰O Yaal oxe fa xoox um o mat ŋajnoor’u a den boo da nqire fo Ii-isra’el we, ndax da saŋkel too yirimkaand o ndus soo a moocandel ne o Yaal oxe a heblit’uuna a Moyiis.

²¹Na jamaane fa leng kut faaga, Yosuwe a xire’ka fo xa taan axe Anak[6] ñoowoogna kam teeru ke na xa coong axe ndefna Hebron, Debir, Anab fo kam o jegel olaa na xa coong axaa Yudaa fa Isra’el fop. A moocanda a den soo a gef teeru ke den tuƈ.

²²O Aa-anak o leng yoq’ee kam saax le Isra’el. Gaasa, Gaat fa Asdod soom maad’u o njegaa Aa-anak.

²³Neene mat Yosuwe a jaɓtu saax le fop, ne o Yaal oxe a heblit’uuna a Moyiis deŋ. Cinj kaaga, a xaajanaan a carind ake Isra’el. Maaga, saax le a ñootnoox’ata na xire fee.