Read NQAARIIT NE ROOG Yosuwe 13 Bible Online

Yosuwe 13 - NQAARIIT NE ROOG bible

Yosuwe 13

¹Yosuwe kaa nogoy’atu lool. O Yaal oxe a layaan ee: «Me ta refna koy, nogoyaa tigi, yaag oo toox de a yoqa xa cegel xa yaaju xaa mbareena o njaɓ.

²Keeke ndefu xa cegel axe yoqna: o jegel ole no Fiifilista we fo ole no Geegesuur we,

³a xotit na ƈufnand alaa Siihoor no ŋat olaa Misira boo no ŋat olaa Ekron no ɓemb-roog o janoon, ɗeeteena nen o jeg no Kaakanaan we, too gelwaar ɓetuk we no Fiifilista we a ngen teen. Weene ndefu oxe Gaasa, oxe Asdod, oxe Askalon, oxe Gaat fo xe Ekron. A jega itam o fiisel ole no Aa-awi we

⁴no ɓemb-roog o ñamaak. Nu mbara o njaɓ itam saax le no Kaakanaan we, ke xottoonga Aara fee no Siisidoŋ we boo Afeq no ŋat olaa no Aa-amori we

⁵fo saax le no Geegebal we fo le Libaŋ fop farna fo batand, ke xottoonga Baal-Gad na caf alaa no joong olaa Hermon boo farna fa Hamat.

⁶Xam rax mbaambir Ii-isra’el we Siisidoŋ we fop ngenna no jegel ole na xa coong axe, a xotit Libaŋ boo Misrefot-Mayiim. Ndiiki koy, fat o las Ii-isra’el we keene fop fo mbanjang ne, ne heblitoonga o ten.

⁷Xaajrandi boog xa cegel axeene a carind ɓetaa nahak ake fa genwal fa lakas fee na carind ale Manaase.»

⁸A carind ale Ruben fo ale Gaad fa genwal fa leng fee na carind ale Manaase a ndaaw’a boo a ƈut a las den ale Moyiis fee o tag no Yaal oxe a coox’ina a den no batand ne Yordaan.

⁹Xa piisel axe den owe nqotit’a Aroweer fee refna na coonand ale no xuluɓ ole Arnon fo na teeru fee refna ndeer ee ndeer a yulanq ale, a reef Diibon, a xaañ xa saawit axaa fop boo Medeba.

¹⁰Teeru ke Siihon fee o maad no Aa-amori we maadooxoogna kam Hesebon boo no ŋat olaa no Aa-amon we a mboga teen fop.

¹¹Xa cegel axeeke itam a mboga teen: o jegel ole Galaad, ole no Geegesuur we, ole no Maamaaka we, o joong ole Hermon fop, o jegel ole Basan fop fa teeru fee Salka.

¹²Basan kaa fog’u no maat ne no maad Oog fee maadooxoogna kam Astarot fo kam Edari, too a ref o leng no yoqatin we no Reerefa we Moyiis a xaw’ina soo a jaɓ xa cegel axe den.

¹³Kaa koy, Ii-isra’el we ndax’ee Geegesuur we fo Maamaaka we, too weene a ndeer no Ii-isra’el we a ngenataa boo no ñaal roog ne xaye.

¹⁴A carind ale Lewi soom njeg’eeru a las, yaam sadax ke na ƥoxoteel o Yaal oxe Roog fee Isra’el ndefu lam den ne o Yaal oxe a layit’uuna a den.

¹⁵Moyiis a coox’a a carind ale Ruben a las den a reefandin na qaw den.

¹⁶O fiisel ole den oxe xotit’a Aroweer fee refna na coonand ale no xuluɓ ole Arnon fo na teeru fee refna ndeer ee ndeer a yulanq ale, a xaañ xa saawit axe fop boo Medeba.

¹⁷Hesebon fo teeru kene ta waxooxna fop ndefna na xa saawit axe teen a mbog’u itam: Diibon, Bamot-Baal, Bet-Baal-Me’on

¹⁸Yahas, Kedemot, Mefaat,

¹⁹Kiryatayim, Sibma, Seret-Sahar refna na pudnand ale no joong ole laqa o maag o Xanju le,

²⁰Bet-Pe’oor, a pudnand ale no joong ole Pisga fa Bet-Yesimot.

²¹Teeru keene fop na xa saawit axe fo maat ne Siihon fee o maad no Aa-amori we maadooxoogna kam Hesebon teen a mbog’u. Moyiis kaa xaw’u a den, den fo gelwaar we Majan ndefna Eewi, Rexem, Sur, Xuur fa Reba.

²²Balam fee reeƭna o ƭeet too a ref o ƥiy Bewoor a fog’a itam no we Ii-isra’el we a mbarit’ina laƥ.

²³O ŋat ole no Ruuruben we farna fo mudand reeƭu o xuluɓ ole Yordaan. Teeru keene fo caate keene ndefu lam ne na qaw ake no Ruuruben we.

²⁴Moyiis a coox’a a carind ale Gaad a las den, a reefandin na qaw den.

²⁵Yaseer, teeru lakas ke Galaad fop fa genwal fee no saax le no Aa-amon we boo Aroweer paam Raba a mbog’a teen.

²⁶A xotta Hesebon boo Ramat-Mispe fa Betonim, a suur Mahanayim boo na teeru faa Loo-Debar.

²⁷Kam xa saawit axe Yordaan a carind ale Gaad a jeg’a teeru fee Bet-Haram, fee Bet-Nimra, fee Sukot fa fee Safon mbog’ina no maat Siihon fee maadooxoogna kam Hesebon. O ŋat ole no fiisel ole den farna fo mudand reeƭu o xuluɓ ole Yordaan boo no maag o maas olaa Genesaret.

²⁸Teeru keene fo caate keene ndefu lam ne na qaw ake no Gaagaad we.

²⁹Moyiis a coox’a genwal fee na carind ale Manaase a las den a reefandin na qaw den.

³⁰O fiisel ole den oxe xotit’a Mahanayim boo no jegel olaa Basan fop reeƭna maat ne Oog fee o maad Basan. Caate qarɓeen ɓetuu fa leng ke Ya’iir ndefna no jegel olaaga teen a mbogu.

³¹Genwal fee no jegel ole Galaad, teeru fee Astarot fa fee Edari ndeeƭna teeru no maad ke Oog fee o maad Basan a coox’e a qaw ake na genwal fee na xa taan axe Makiir fee o ƥiy Manaase.

³²Xa piisel xa pogreer axeene Moyiis a cooxit’u no batand naa Yordaan, ye da maadna o ndefaa na xa saawit axaa Mowaab, a njasnoor fa Yeriko.

³³A carind ale Lewi koy, Moyiis las’ee a den lanq, yaam o Yaal oxe Roog fee Isra’el refu lam den ne ta layit’uuna a den.