Read NQAARIIT NE ROOG Yosuwe 14 Bible Online

Yosuwe 14 - NQAARIIT NE ROOG bible

Yosuwe 14

¹Keeke ndefu xa piisel axe Ii-isra’el we a ndaawna nen lam kam saax le Kanaan, too Eleyasaar fee o saasadax oxe fa Yosuwe fee o ƥiy Nun fo kelfa ke na qaw ake na carind a pogreer ake a nqaajrand’un a den.

²A mbanjangana a carind ɓetaa nahak ake fa genwal a carind ale, ndax da coox a den lam den, ne o Yaal oxe a heblit’uuna a Moyiis.

³Moyiis a coox’a a carind a ƭak fa genwal a carind a las den no batand naa Yordaan. Kaa koy, coox’ee Leelewi we lanq a ndeer den.

⁴Xa taan axe Yoseef a carind a ƭak a ndeeƭu, ale Manaase fo ale Efrayim. Leelewi we koy las’aand dara no saax le, a refangee teeru ke da coox’eena a ngenik a den fo xa saawit xa kayel axe mbidna teeru keene, ndax xa siir den fo cegel lakas ke den a njeg maa da suufaa.

⁵Ii-isra’el we a lasrit’a saax le ne o Yaal oxe a heblit’uuna a Moyiis.

⁶Bes, wiin a inoora na carind ale Yudaa, a soƥiid a Yosuwe Gilgal. Kaleb fee o ƥiy Yefune too a fog na qaw ale Kenisi a laya a Yosuwe yee: «Andaa a paax ke o Yaal oxe a layit’ina a Moyiis Kades-Barneya no kaa jofna na wo fa mi.

⁷Xa kiid qarɓeen nahik jeg’um, ye Moyiis fee o tag no Yaal oxe a lultaxama Kades-Barneya, um horooxiid saax leeke. Ye nomtooxiiduuma, wetandooxaanum ke and’uuma teen.

⁸Wiin we yoonit’uuma kaa mboosnoor’u xeet fee, ndaa mi o mat nananaam o Yaal oxe Roog es bo ta dey sik.

⁹No ñaal naaga, Moyiis a reg’axam fo a taaƥ ee xam daaw me o jaf es a dak’ina no saax le, um jegkin mi fo xa taan es boo kili, yaam ne nananuuma o Yaal oxe Roog es bo ta dey sik.

¹⁰Me ta refna koy, o Yaal oxe a ci’axam um maad o ñoowaa ne ta regtit’uuna. Yaa o Yaal oxe a layna keene fa Moyiis, a gar fa xaye, a fi’a xa kiid qarɓeen nahik fo xa kiid xa ƥetaq no camaane kaa Ii-isra’el we a nqaañiidna a koƥ-a-ƥor alaa. Ndiiki koy, jegaam xa kiid qarɓeen ɓetuu tadik fo xa kiid xa ƥetaq.

¹¹Ne jegit’uuma doole no camaane kaa Moyiis a lulaxam, jegtanum boo xaye, ta ref na xire mbaat no kuu refna.

¹²Ndiiki boog, cooxaam o jegel ole na xa coong axe o Yaal oxe a reg’axama na jamaane faaga. A koom, yeg’aa yee a jega Aa-anak waa ngenna maaga kam teeru maak cegu saŋe. Kaa koy, o Yaal oxe a refangaa fa mi, xam rax a den ne ta regtit’uuna ten fa xoox um.»

¹³Yosuwe a dalfooxa o barke a Kaleb fee o ƥiy Yefune soo a cooxin a Hebron.

¹⁴Neene Kaleb fee o ƥiy Yefune too a fog’u na qaw ale Kenisi a jegtu a Hebron, yaam ne ta nananna o Yaal oxe Roog fee Isra’el bo ta dey sik, too xa taan um maadun o njegaa boo xaye.

¹⁵Teeru fee Hebron kaa xoyoogel yaaga Kiryat-Arba. Kaa ne’it’el a Arba fee moƴ’ina o jeg gon a ndeer no Aa-anak we. Maaga, saax le a ñootnoox’ata na xire fee.