Read NQAARIIT NE ROOG Yosuwe 17 Bible Online

Yosuwe 17 - NQAARIIT NE ROOG bible

Yosuwe 17

¹Xa taan axe Manaase fee taaw Yoseef a ndaaw’a itam a las den na pexey mbanjang ne. Makiir fee taaw Manaase too a ref faap Galaad a las’e o jegel olaa Galaad fo ole Basan no batand naa Yordaan, yaam ne ta reeƭna o qir o say.

²A qaw a lakas ake mbaqaqoorna na xa ƥiy xa koor axe Manaase a coox’e lanq itam. A qaw akeene ndeeƭu ale Abiyeseer, ale Helek, ale Asri’el, ale Sikeem, ale Hefeer fo ale Semida. Den fop koy xa ƥiy Manaase fee o ƥiy Yoseef a ndeeƭu.

³Selofad fee o ƥiy Hefeer too a ref o ndaan Galaad fee o ƥiy Makiir fee taaw Manaase, jeg’ee xa ƥiy xa koor, ndaa rew ɓor a jeg’u, da ne’el Maxla, Nowa, Hogla, Milka fa Tirsa.

⁴Weene a soƥiida a Eleyasaar fee o saasadax oxe fa Yosuwe fee o ƥiy Nun fo kelfa ke na xeet fee, a lay a den ee: «O Yaal oxe a hebil’a a Moyiis, ndax ta las a in lanq nen goor we na carind in.» Naaga, a las’e nen xa teɓ xa koor axe faap den ne o Yaal oxe a heblit’uuna.

⁵Na pexey mbanjang ne xa taan xa koor axe fo xa tew axe Manaase a las’e no lanq ke. Ten taxu a carind ale Manaase a ɓaatan’e a las xarɓaxay no mudand ne Yordaan akaa mbogreerna fo o jegel ole Galaad fo ole Basan ndefna no batand ne Yordaan.

⁷O fiisel ole Manaase a xotit’a no fiisel ole Aseer boo Mikmetat no batand naa Sikeem. O ŋat ole a inoor’a Mikmetat, a sag farna fo ɓemb-roog o ñamaak boo Yasub refna paam a cur ale Tapuwa.

⁸O jegel ole Tapuwa a carind ale Manaase jeg’un, ndaa teeru fee Tapuwa fa xoox um koy reeƭna no ŋat olaa, Ee-efrayim we njeg’un.

⁹Cinj kaaga, o ŋat ole a reta boo a jol a ƈufnand alaa Qaana no ɓemb-roog o ñamaak. Kaa koy teeru leng-leng ke ngarit’ina no ɓemb-roog o ñamaak ole na ƈufnand alaa, Ee-efrayim we njeg’u a den, ke da ndeeƭna no fiisel ole Manaase fop oo. O ŋat ole a inoora maaga, a reef no ɓemb-roog o janoon ole na ƈufnand alaa soo a saltik no maag ole Mediterane.

¹⁰Neene, a carind ale Efrayim a garit’a farna fo ɓemb-roog o ñamaak ole na ƈufnand ale, soo ale Manaase a garit farna fo ɓemb-roog o janoon. No mudand ne koy, o maag ole Mediterane refu o ŋat ole. No ɓemb-roog o janoon, a carind ale Aseer refu o ŋat ole Manaase, soo ale Isakaar a ref o ŋat ole ten no batand.

¹¹Kam xa piisel axe Isakaar fa Aseer, a carind ale Manaase a daaw’a teen a Bet-Se’aan, Ible’aam, Door fee refna na ƥeeraamb ale no maag ole, En-Door, Tanak, Megido fo caate ke da mbaxooxna.

¹²Kaa koy, xa taan axe Manaase mbaag’ee o ndax we ngenoogna no teeru keene, too Kaakanaan we a maada o ñoowaa maaga.

¹³Ye Ii-isra’el we a ngupatna a den doole, a serooga a den calel leng-leng, ndaa tax’ee da ndax a den.

¹⁴Xa taan axe Yoseef a soƥiida a Yosuwe, a layin ee: «Xar taxu o coox a in a las a leng kut no saax le, too o Yaal oxe a barke a in boo o ga ne i mayitna?»

¹⁵Yosuwe a doona a den ee: «A soƥangaa yee kaa nu may boo o jegel ole na xa coong axe Efrayim deyee a nuun, ndetyo ngodan a qoox nuun no suungaan laa no Peeperisi waa fo no laa no Reerefa waa.»

¹⁶Xa taan axe Yoseef a laya yee: «Ndigil oo, o jegel ole na xa coong axe deyee a in, too Kaakanaan we fop ngenna na xa saawit axe a sareet-xire celem a njegu, ta ref we ngenna Bet-Se’aan fo caate ke ta waxooxna fop boo no we ngenna na xa saawit axe Yisre’el.»

¹⁷Maaga, Yosuwe a laya xa taan axe Yoseef ndefna a carind ale Efrayim fo ale Manaase yee: «Feek kaa nu may too njeg doole, xan nu njeg kaa hupna a las a leng no saax le.

¹⁸O jegel ole na xa coong axe fop refna suungaan ɓor nuun na njegkan. Ngodeenoo ne ta fodeena fop, nu njangin, too sax xan nu mbaag o ndax Kaakanaan we ke da njegna a sareet-xire celem soo a may doole fop oo.»