Read NQAARIIT NE ROOG Yosuwe 18 Bible Online

Yosuwe 18 - NQAARIIT NE ROOG bible

Yosuwe 18

¹A cinj ye Ii-isra’el we a njaɓna saax le, a mbokatoora Silo den fop, a sip maaga Ƭiif ne o Yaal oxe a xetteel.

²A ndeer den a yoq’a a carind ɓetaa ƭaq akaa ndaaw’afuleerna a las den no lanq ke.

³Maaga, Yosuwe a laya a den ee: «Kaa nu moofkaa neeke rek boo a mban, mbañ o njang saax le o Yaal oxe Roog fee no daan nuun a ci’na a nuun?

⁴Njilyo wiin daduk na carind aluu refna. Xam lul a den da mbidik saax le soo a mbind a las akaa da nqalaatanna a carind den, cinj kaaga da nomtooxiid, a layaam.

⁵Fat a nqaaj saax le a qaaj ɓetaa ƭaq. Xa taan axe Yudaa o mat fat a yoq no fiisel ole den no ɓemb-roog o ñamaak, soo axe Yoseef a yoq no fiisel den no ɓemb-roog o janoon.

⁶Nuun fa qoox nuun koy, fat nu nqaaj saax le a qaaj ɓetaa ƭaq, mbindin, soo nu ƥisiidaam o ten. Maaga, xam banjangan a nuun mbaambir no Yaal oxe Roog in ke na refkaa a las nuun.

⁷Leelewi we a ndeer nuun koy, njegkee a las, yaam a las den refu yee da mbadnaa calel no saasadax mbaambir no Yaal oxe. A carind ale Gaad fo ale Ruben fa genwal fee na carind ale Manaase itam a ndaawa xa piisel den boo a ƈut no batand naa Yordaan. Moyiis fa xoox um fee o tag no Yaal oxe o mat coox’un a den.»

⁸Ye goor we njil’eena a mbaajaa o ndet, Yosuwe a laya a den ee: «Ndetyo mbid saax le, mbind a las ake, cinj kaaga nu ngar layaam. Xam banjanganit a nuun meeke Silo mbaambir no Yaal oxe ke na refkaa a las nuun.»

⁹Goor waa a mbida saax laa fop, a nqaajin a qaaj ɓetaa ƭaq, a mbindin a ndeefandin na kon ake no teeru ke soo a nomtooxiid me Yosuwe no saŋe naa Silo.

¹⁰Yosuwe a banjangana Ii-isra’el weene a qaaj akeene mbaambir no Yaal oxe kam Silo, soo a carind aluu refna ta cooxin ke refna a las um no saax le.

¹¹Mbanjang eetaand ne a yena na qaw ake na carind ale Bensame. O fiisel den oxe reeƭa ndeer ole na carind ale Yudaa fo ole na xa taan axe Yoseef.

¹²O ŋat ole no ɓemb-roog o janoon a inoora Yordaan, a sag farna fo ƴoong laa no ɓemb-roog o janoon ole Yeriko. A suura farna fo mudand, a xaañ o jegel olaa na xa coong axaa boo na koƥ-a-ƥor alaa Bet-Awen.

¹³A inoora maaga, a xot farna fo ƴoong laa no ɓemb-roog o ñamaak ole Luus fee na xoyahineel Betel. Cinj kaaga, a fudooxiida Atrot-Adaar fee refna took o joong ole garitna a Bet-Horon fee a lanq no ɓemb-roog o ñamaak.

¹⁴No mudand ne, o ŋat ole a puloora no joong olaaga, a xot farna fo ɓemb-roog o ñamaak boo a saltik Kiryat-Baal fee na xoyel itam Kiryat-Ye’arim fee fogna no jeg ole na carind ale Yudaa. Meene o ŋat ole no mudand a reefu.

¹⁵O ŋat ole no ɓemb-roog o ñamaak a inoora paam Kiryat-Ye’arim, a xot farna fo mudand boo a saltik na cur akaa Neftowa.

¹⁶A inoora maaga, a fudooxiid na caf ale no joong ole jasnoorna fo a yulanq ale Ben-Hinom no ɓemb-roog o janoon ole na xa saawit axe no Reerefa waa, a suuriid na yulanq ale Hinom, a reef no ɓemb-roog o ñamaak ole no ƴoong le no Yeeyebus we soo a gar na cur alaa Rogel.

¹⁷Maaga, a dalfooxahina o puloox farna fo ɓemb-roog o janoon, a jagin na cur ale Semes, cinj kaaga ta xot Gelilot jasnoorna fo Ñaang laa Adumim. A inoora maaga, a fudook farna fo ɓil laa ne’teena a Bohan fee o leng na xa ƥiy axe Ruben,

¹⁸a reef no ɓemb-roog o janoon ole no ƴoong laa Bet-Araba soo a fudoox na xa saawit axaa Yordaan.

¹⁹Cinj kaaga, a suura no ɓemb-roog o janoon ole no ƴoong laa Bet-Hogla, a saltik no cat kaa no maag o Xanju laa farna fo ɓemb-roog o janoon maa Yordaan a fokatooritna fo ten. Meene o ŋat ole no ɓemb-roog o ñamaak a reefu.

²⁰Yordaan reeƭu o ŋat ole no batand. Keene ndefu xa ŋat axe ndeerna o fiisel ole las’eena a qaw ake na carind ale Bensame.

²¹Keeke ndefu teeru ke na qaw ake Bensame: Yeriko, Bet-Hogla, Emeq-Qesiis,

²²Bet-Araba, Semarayim, Betel,

²³Awim, Paara, Ofra,

²⁴Kefar-Amona, Ofni fa Geba. A ndeeƭa teeru xarɓaxay fo teeru ƭik fo caate ke da mbaxooxna.

²⁵A jeg’ahina a Gibe’on, Rama, Beerot,

²⁶Mispe, Kefira, Moosa,

²⁷Rexem, Yirpeel, Tarala,

²⁸Ceela, Elef, Yebus fee refna ref Yeerusaleem, Gibe’a fa Kiryat-Ye’arim. A ndeeƭa teeru xarɓaxay fo teeru nahik fo caate ke da mbaxooxna. Keene refu a las ale na qaw ake na carind ale Bensame.