Read NQAARIIT NE ROOG Yosuwe 19 Bible Online

Yosuwe 19 - NQAARIIT NE ROOG bible

Yosuwe 19

¹Mbanjang ƭikandeer ne a yena na qaw ake na carind ale Simewon. O fiisel ole den kaa reeƭu a ndeer ole na carind ale Yudaa.

²Teeru ke den ndefu: Beer-Seeba, Saba, Molada,

³Hacar-Suwaal, Baala, Esem,

⁴Eltolad, Betuul, Horma,

⁵Siklag, Bet-Markabot, Hacar-Susa,

⁶Bet-Lebawot fa Saruhen. A ndeeƭa teeru xarɓaxay fo teeru tadik fo caate ke da mbaxooxna.

⁷A jeg’ahina a Ayin, En-Rimon, Eteer fa Asan. A ndeeƭa teeru nahik fo caate ke da mbaxooxna.

⁸Caate ke mbidna a den fop teen a mbog’u boo Baalat-Beer fa Rama fee garitna no ɓemb-roog o ñamaak. Keene refu a las ale na qaw ake na carind ale Simewon.

⁹O fiisel ole na carind ale Simewon kaa ɗegit’el no le Yudaa, yaam o fiisel ole na xa taan axe Yudaa kaa yaaj’u na den lool. Ten taxu o fiisel ole Simewon a ref a ndeer ole Yudaa.

¹⁰Mbanjang ndadkandeer ne a yena na qaw ake na carind ale Sabulon. No ɓemb-roog o ñamaak, o fiisel ole den oxe day’a Sarid.

¹¹O ŋat ole a inoora maaga, a xot farna fo mudand ne boo Marala, a lernoox a Dabeset soo a reefan a ƈufnand alaa no batand naa Yoqne’aam.

¹²A inoora no saax o lakas ole Sarid, a xot farna fo batand boo a damik no ŋat olaa Kislot-Taboor, a reef Dabrat, a suur boo Yafiya.

¹³O ŋat ole no batand ne a inoora maaga, a suur Gaat-Hefeer, a sag Ita-Kasin, a saltik Rimon soo a puloox farna fa Ne’a.

¹⁴O ŋat ole a puloora no ɓemb-roog o janoon, a waaƭik a Hanaton soo a saltik na yulanq alaa Yifta-El.

¹⁵Qatat, Nahalal, Simron, Yidala fa Betleheem[7] a mbog’a no teeru ke no fiisel ole den. O fiisel ole den a jeg’a fop oo fop teeru xarɓaxay fo teeru ƭik fo caate ke da mbaxooxna.

¹⁶Teeru keene fop fo caate ke da mbaxooxna kam o fiisel ole las’eena a qaw ake na carind ale Sabulon a mbogu.

¹⁷Mbanjang nahkandeer ne a yena na qaw ake na carind ale Isakaar.

¹⁸No fiisel den a jeg’a a Yisre’el, Kesulot, Suuneem

¹⁹Hafarayim, Si’oŋ, Anaharat,

²⁰Rabit, Qisyoŋ, Ebes,

²¹Remet, En-Ganim, En-Hada fa Bet-Pases.

²²O ŋat ole den a reef’a Taboor, Sahasiima fa Bet-Semes soo a saltik Yordaan. O fiisel ole den a jeg’a teeru xarɓaxay fo teeru ɓetuu fa leng fo caate ke da mbaxooxna.

²³Teeru keene fop fo caate ke da mbaxooxna kam o fiisel ole las’eena a qaw ake na carind ale Isakaar a mbogu.

²⁴Mbanjang ƥetkandeer ne a yena na qaw ake na carind ale Aseer.

²⁵No fiisel den a jeg’a a Helkat, Hali, Beten, Akesaf,

²⁶Alamelek, Amad fa Misal. No mudand, o ŋat ole kaa laq’u o joong olaa Karmel, a suur na ƈufnand alaa Siihoor-Libnat.

²⁷A pulooxa no batand, a xot farna fa Bet-Dagon, a ret boo no fiisel olaa Sabulon fo na yulanq alaa Yifta-El. Cinj kaaga, a suura farna fo ɓemb-roog o janoon, a waaƭik a Bet-Emek fa Ne’iyel, a reef no ɓemb-roog o janoon olaa Kabuul, a sag

²⁸Abdon, Rehob, Hamon fa Qaana soo a saltik Sidoŋ fa maak fee.

²⁹Cinj kaaga, a pulooxa farna fa Rama fa Tiir fee refna teeru fa njegu saŋe ne, a xot farna fa Hoosa soo a saltik no maag ole Mediterane. Maxalab, Aksib,

³⁰Ako[8], Afeq fa Rehob a mbog’a no teeru ke no fiisel ole den. O fiisel ole den a jeg’a fop oo fop teeru qarɓeen ƭik fo teeru ƭik fo caate ke da mbaxooxna.

³¹Teeru keene fop fo caate ke da mbaxooxna kam o fiisel ole las’eena a qaw ake na carind ale Aseer a mbogu.

³²Mbanjang ɓetuu fa lengandeer ne a yena na qaw ake na carind ale Neftali.

³³O ŋat ole no ɓemb-roog o ñamaak a inoora Helef boo no ngariñ naa Saananim, a reef Adami-Nekeb fa Yabneel, a gar boo Lakum soo a saltik Yordaan.

³⁴No mudand, o ŋat ole a pulooxa farna fa Asnot-Taboor soo a ret boo Hukok. O fiisel ole Sabulon garit’un no ɓemb-roog o ñamaak, ole Aseer a fodin no mudand fo ole Yudaa, soo Yordaan a ref o ŋat ole ten no batand.

³⁵Teeru cegu saŋe ke ndeeƭu: Sidim, Seer, Hamat, Rakat, Kineret,

³⁶Adama, Rama, Hasoor,

³⁷Qedes, Edari, En-Hasoor,

³⁸Yiron, Migdal-El, Horem, Bet-Anat fa Bet-Semes. O fiisel ole den a jeg’a fop oo fop teeru xarɓaxay fo teeru ɓetuu nahik fo caate ke da mbaxooxna.

³⁹Teeru keene fop fo caate ke da mbaxooxna kam o fiisel ole las’eena a qaw ake na carind ale Neftali a mbogu.

⁴⁰Mbanjang ɓetuu ƭikandeer ne a yena na qaw ake na carind ale Dan.

⁴¹No fiisel den a jeg’a a Sora, Estawol, Iir-Semes,

⁴²Saalabin, Ayalon, Yitla,

⁴³Elon, Timna, Ekron,

⁴⁴Elteqe, Gibeton, Baalat,

⁴⁵Yehud, Bene-Berak, Gaat-Rimon,

⁴⁶Mee-Yarkon, Rakon fo o fiisel ole widna a Yope.

⁴⁷Kaa koy, a carind ale Dan a ñaka o fiisel den. Ten taxu da songik teeru fee Lesem, a njaɓin, a mbarit we ngenoogna teen laƥ soo a ngenin fop. A ne’ta a Lesem a Dan fee o taan den.

⁴⁸Teeru keene fop fo caate ke da mbaxooxna kam o fiisel ole las’eena a qaw ake na carind ale Dan a mbogu.

⁴⁹Ye Ii-isra’el we a nqaajirna saax le boo a ƈut, a cooxa a Yosuwe fee o ƥiy Nun a las um a ndeer den.

⁵⁰Ne o Yaal oxe a heblit’uuna, a cooxa a Yosuwe teeru fee ta laacna, ta ref fee Timnat-Serah kam o jegel olaa na xa coong axaa Efrayim. Yosuwe a maxatina teeru faa soo a jangoox maaga.

⁵¹Eleyasaar fee o saasadax oxe, Yosuwe fee o ƥiy Nun fo kelfa ke na qaw ake na carind ake Isra’el a lasranda a carind ake yoq’ina xa piisel xa pogreer axeene na pexey mbanjang ne. Silo a mbi’it’un mbaambir no Yaal oxe, no ndokand ne no Ƭiif ne o Yaal oxe a xetteel. Neene a muuktu nqaajrand ne no saax le.