Read NQAARIIT NE ROOG Yosuwe 2 Bible Online

Yosuwe 2 - NQAARIIT NE ROOG bible

Yosuwe 2

¹Yosuwe fee o ƥiy Nun a lulta hoohorax ɗik no saŋe ne den Sitiim, a lay a den da ngorook na pet saax le Kanaan fa teeru fee Yeriko. Ye weene a mbadiidna Yeriko, a ndoka no mbind na caga laa ne’eena Rahab, ndax da mbe maaga.

²O maad oxe Yeriko a yegne yee a jega Ii-isra’el waa ndokiidna kam teeru fee no yeng olene, ndax da ngoroox saax le.

³Maaga, o maad oxe Yeriko a lulta maa Rahab ee: «Sutiidi goor we ngarna me wo, yaam kaa ngorooxiid saax le fop.»

⁴Kaa koy, o tew oxe kaa ɓis’u goor ɗik waa, a ɗasin a den soo a lay ee: «A woora kañ ee goor weene a ngara no mbind es, ndaa koy tax’ee um and me da inoorna.

⁵Na kid-a-caɓru ke, ye ndokand ne na teeru fee a waajeel o weg, goor ɗik weene a sutooxa, too andiim maa da njofna. Kaa koy, nu ñofangaa o ndaab a den, xan nu ndaaw a den.»

⁶O tew oxe koy kaa ŋaayin’u a den no dung-took ole, a ɗasin a den kam xa pasaak axe ta juum’ina maaga.

⁷Duleer we no maad oxe o mat a ndalfooxa o nqot a ƭat ale Yordaan ee kaa ndaabaa a den, a njagin no cootand kaa. Yaa daadaab waaga a sutooxaa rek koy, xa ton-maax axaa na teeru faa a mbege.

⁸Ye hoohorax we a ngelkaa fo mbondoox, o tew oxe a ŋaaya, a dab a den no dung-took olaa,

⁹a lay a den ee: «Andaam ee o Yaal oxe mat ci’u a nuun saax lene. Caƭar maak damu a in, too we no saax le fop kaa mbiriɓ yaam nuun.

¹⁰I yega ne o Yaal oxe a xaajit’ina poofi kaa na Kal alaa no xeet laa mbaambir nuun, ye nu sutooxna Misira fo ne nu moocanditna a Siihon fa Oog, maad ɗik we no Aa-amori we maadooxoogna no batand naa Yordaan.

¹¹Kaa i yegin rek, cer in fop a ƥoloox, too o leng saqatee o laaw olaa ta siiknooritna fa nuun, yaam o Yaal oxe Roog nuun refu Roog fee na asamaan fa fee no lanq ke.

¹²Ndiiki koy, ndaaɓooxyo no Yaal oxe yee xan nu mbaax no ƥasil ne faap es ne faaxtuuma na nuun, soo cooxaam teen o anddiloor o xoolu.

¹³Ndegaamoo yee xan nu mbuus a faap es fa ya es fo maag es fo xa teɓ es fo ƥasil den fop, mbañ o mbar a in.»

¹⁴Goor waa a ndoonaan ee: «Boo nu layeerna o leng tig no kaa farna na kar ale in, yaasam i nqon ndox, yaa tig a damna a nuun. Xan i lal a nuun o paaxel in fo ngor in, yaa o Yaal oxe a ci’kaa a in saax lene.»

¹⁵Ne mbind ne Rahab a fogna no saŋe ne na teeru fee, a reefna a den no falangteer olaa fo o tiis, da sutoox teeru fee.

¹⁶O tew oxaa a laya a den ee: «Nqotyo farna fo xa coong axaa, yaam ndik nu nqet fo daadaab we nuun. Fat nu ƭas maaga boo ñaal tadik, boo yaa we ndaaboogna a nuun a nomtooxiidna, cinj kaaga nu nqot a ƭat nuun.»

¹⁷Goor waa a layaan ee: «O fi’angee ke i laykang, xan i mboktoox na taaƥ ale fi’nooroona a in.

¹⁸Yaa i ndokiidkaa no saax le, fat o hum o ƥaak o yaxgu lene no falangteer ole reefniidoona a in. Cinj kaaga, fat o fokat no mbind of a faap of fa ya of fo maag of fo xa teɓ of, ƥasil ne faap of fop daal.

¹⁹O leng na den a sutooxangaa mbind of, ten na gadooxkaa fo’oy um, soo in o mat i nqool teen qac. A soƥangaa koy ee o leng no we ndefna fa wo kam mbind of kaa wartel teen, in o mat na ngadooxkaa fo’oy um.

²⁰A soƥangaa yee kaa o weejil a in, xan i suxoor na taaƥ ale a ndeer in.»

²¹O tew oxaa a doona a den ee: «Iyo, fat a refit ne nu laytuuna.» Cinj kaaga, a xaƴa a den da ndet. Yaa da ndetna rek, o tew oxaa a huma o ƥaak o yaxgu laa no falangteer olaa.

²²Goor waa a ndeta, a ƭas na xa coong axaa boo ñaal tadik, boo neen we ndaaboogna a den a nomtooxiidu. Daadaab weene a mbaaƭa muu refna na ƭat ale, ndaa nga’ee a den.

²³Hoohorax ɗik waa a mbudoora na xa coong axaa, a njoot o xuluɓ ole Yordaan soo a ngar me Yosuwe fee o ƥiy Nun, a mbetandooxin fop ke dal’ina a den.

²⁴A laya a Yosuwe yee: «A woora yee o Yaal oxe a ɓoxota saax leene fop na xa ƥay in. Fop we ngenna teen kaa mbiriɓ sax yaam in.»