Read NQAARIIT NE ROOG Yosuwe 20 Bible Online

Yosuwe 20 - NQAARIIT NE ROOG bible

Yosuwe 20

¹O Yaal oxe a laya a Yosuwe

²ta daawin Ii-isra’el we kene: «Njilyo teeru caɓnooxand ke lay’uuma a nuun reefandin na Moyiis,

³ndax o leng na nuun a warangaa o kiin took taamaala too diyiran, a waag o jaɓnook na fa leng no teeru keene. Neene, xan a waag o ɓostoox oxe helna o rabdinooxan oxe wareena.

⁴Oxe warna a fadiidangaa na teeru fa njaɓnooxand fee, fat a geenoox no xeloorand ole no ndokand ne na teeru fee, a jangtoox maak we na ndefkaa maaga ne tige a garitna, soo weene a nqaƴin ta rokiid kam teeru fee, a cooxin maa ta waagna o gen.

⁵Oxe helna o rabdinooxan o qon oxe a daabiidangaan boo maaga, we ngenna na teeru fee ƥoxotkiran oxeene kiin, yaam diyee a bar ale ta fi’na too fañroogee fo xe ta warna.

⁶Fat a yoq kam teeru feene boo yaa nqel maak ne a ngate’kan fo boo yaa o saasadax o maak oxe ta jopirna a xonkaa. Cinj kaaga, a waaga o nomtoox no mbind um na teeru fee ta ƴufit’ina.»

⁷Nen teeru caɓnooxand Ii-isra’el we a kesa a Qedes kam Galile no jegel olaa na xa coong axaa Neftali fa Sikeem kam o jegel olaa na xa coong axaa Efrayim fa Kiryat-Arba na xoyeel a xoy Hebron kam o jegel olaa na xa coong axaa Yudaa.

⁸No batand naa Yeriko no saax o lakas ole Yordaan, a njila a Beseer refna na xa saawit axaa na koƥ-a-ƥor alaa too a fog no jeg ole na carind ale Ruben fa Ramot kam Galaad too a fog no jeg ole na carind ale Gaad fa Golan kam Basan too a fog no jeg ole na carind ale Manaase.

⁹Teeru keene njil’e, ndax da ndef caɓnooxand no Ii-isra’el we fo na xa kataakoon axe ngenna a ndeer den. Neene, o kiin a war’angaa o kend um too diyiran, a waag’a o ɓostoox oxe helna o rabdinooxan o qon oxe boo warkaand, a refangee nqel maak ne kaa ngate’in boo a ƈut.