Read NQAARIIT NE ROOG Yosuwe 21 Bible Online

Yosuwe 21 - NQAARIIT NE ROOG bible

Yosuwe 21

¹Kelfa ke na qaw ake na carind ale Lewi a soƥiida a Eleyasaar fee o saasadax oxe, Yosuwe fee o ƥiy Nun fo kelfa ke na qaw ake na carind a lakas ake Isra’el

²kam Silo, no saax laa Kanaan. A laya a den ee: «O Yaal oxe a heblit’a, a reefandin na Moyiis, i cooxel teeru kaa i ngenna fo me widna a den, ndax cegel ke in a njeg maa da suufaa.»

³Naaga, Ii-isra’el we a cooxa fog den Leelewi we teeru leng-leng fo xa kayand axe mbidna a den kam xa piisel axe den, ne o Yaal oxe a heblit’uuna.

⁴A ndeer no Leelewi we, xa taan axe Kehat a mbanjangane, too xa taan axe Aaroon fee reeƭna o saasadax a ndaawa na pexey mbanjang ne teeru xarɓaxay fo teeru tadik kaa ndefna no fiisel ole na carind ale Yudaa, no le na carind ale Simewon fo no le na carind ale Bensame.

⁵Xa taan xa lakas axe Kehat a ndaawa na pexey mbanjang ne teeru xarɓaxay kaa ndefna no fiisel ole na carind ale Efrayim, no le na carind ale Dan fo no le na genwal a carind ale Manaase.

⁶Xa taan axe Geerson a ndaawa na pexey mbanjang ne teeru xarɓaxay fo teeru tadik kaa ndefna no fiisel ole na qaw ake na carind ale Isakaar, no le na carind ale Aseer, no le na carind ale Neftali fo no le na genwal a carind ale Manaase ngenoogna Basan.

⁷Xa taan axe Merari a ndaawa teeru xarɓaxay fo teeru ƭik kaa ndefna no fiisel ole na carind ale Ruben, no le na carind ale Gaad fo no le na carind ale Sabulon, a reefandel na qaw den.

⁸Na pexey mbanjang ne Ii-isra’el we a cooxa fog den Leelewi we teeru keene fop fo xa kayand axe mbidna a den, ne o Yaal oxe a heblit’uuna, a reefandin na Moyiis.

⁹Keeke ndefu a kon ake no teeru ke na carind ale Yudaa fo na le Simewon coox’eena

¹⁰xa taan axe Aaroon mbogna na qaw ale Kehat fee o ƥiy Lewi. Den eet’e o njil na pexey mbanjang ne.

¹¹A cooxe a Kiryat-Arba, teeru fee ne’it’eena a Arba fee o taan no Aa-anak we. Teeru feene, ne’eena ndiiki Hebron, kaa reeƭu no jegel ole na xa coong axe Yudaa. A cooxe o ten fo xa kayand axe mbiduuna.

¹²Kaa koy, xa qol axe fo caate ke teeru feene a waxooxna, a ndaaw’e o coox a Kaleb fee o ƥiy Yefune.

¹³Xa taan axe Aaroon fee reeƭna o saasadax a cooxe a Hebron fee refna fa leng no teeru caɓnooxand ke, fogreerna fa Libna,

¹⁴Yaatir, Estemowa,

¹⁵Holon, Debir,

¹⁶Asan, Yuta fa Bet-Semes fo xa kayand axe mbidna a den. A ndeeƭa teeru ɓetuu nahik kaa mbogna no fiisel ole na carind ale Yudaa fo no le na carind ale Simewon.

¹⁷No fiisel ole na carind ale Bensame a ndaawa a Gibe’on, Geba,

¹⁸Anatot, Almon fo xa kayand axe mbidna a den, da ndef teeru nahik.

¹⁹Saasadax we ndefna xa taan Aaroon a ndaawa fop oo fop teeru xarɓaxay fo teeru tadik fo xa kayand axe mbidna a den.

²⁰Leelewi we mbogna na qaw ake na xa taan xa lakas axe Kehat a ndaawa no fiisel ole na carind ale Efrayim na pexey mbanjang ne teeru kene:

²¹kam o jegel olaa na xa coong axaa Sikeem fee refna fa leng no teeru caɓnooxand ke, fogreerna fa Geseer,

²²Kibsayim fa Bet-Horon fo xa kayand axe mbidna a den, da ndef teeru nahik.

²³No fiisel ole na carind ale Dan a ndaawa a Elteqe, Gibeton,

²⁴Ayalon, Gaat-Rimon fo xa kayand axe mbidna a den, da ndef teeru nahik.

²⁵No fiisel ole na genwal a carind ale Manaase a ndaawa a Tanak, Ible’aam fo xa kayand axe mbidna a den, da ndef teeru ƭik.

²⁶A qaw ake na xa taan xa lakas axe Kehat a ndaawa boog fop oo fop teeru xarɓaxay fo xa kayand axe mbidna a den.

²⁷Leelewi we mbogna na qaw ake na xa taan axe Geerson a ndaawa, no fiisel ole na genwal a carind ale Manaase, teeru kene fo xa kayand axe mbidna a den: kam o jegel ole Basan Golan fee refna fa leng no teeru caɓnooxand ke, fogreerna fa Beestera, da ndef teeru ƭik.

²⁸No fiisel ole na carind ale Isakaar a ndaawa a Qisyoŋ, Dabrat,

²⁹Yarmut, En-Ganim fo xa kayand axe mbidna a den, da ndef teeru nahik.

³⁰No fiisel ole na carind ale Aseer a ndaawa a Misal, Abdon,

³¹Helkat, Rehob fo xa kayand axe mbidna a den, da ndef teeru nahik.

³²No fiisel ole na carind ale Neftali a ndaawa kam o jegel ole Galile a Qedes fee refna fa leng no teeru caɓnooxand ke, fogreerna fa Hamot-Door fa Qartan fo xa kayand axe mbidna a den, da ndef teeru tadik.

³³A qaw ake ndefna xa taan axe Geerson a ndaawa fop oo fop teeru xarɓaxay fo teeru tadik fo xa kayand axe mbidna a den.

³⁴Leelewi lakas we mbogna na qaw ake na xa taan axe Merari a ndaawa no fiisel ole na carind ale Sabulon a Yoqne’aam, Qarta,

³⁵Rimon, Nahalal fo xa kayand axe mbidna a den, da ndef teeru nahik.

³⁶No batand naa Yeriko, no saax o lakas ole Yordaan, a ndaawa no fiisel ole na carind ale Ruben na xa saawit axaa paam a koƥ-a-ƥor alaa a Beseer fee refna fa leng no teeru caɓnooxand ke, fogreerna fa Yahas,

³⁷Kedemot fa Mefaat fo xa kayand axe mbidna a den, da ndef teeru nahik.

³⁸No fiisel ole na carind ale Gaad a ndaawa kam o jegel ole Galaad a Ramot fee refna fa leng no teeru caɓnooxand ke, fogreerna fa Mahanayim,

³⁹Hesebon fa Yaseer fo xa kayand axe mbidna a den, da ndef teeru nahik.

⁴⁰Leelewi lakas we mbogna na qaw ake na xa taan axe Merari a ndaawa na pexey mbanjang ne fop oo fop teeru xarɓaxay fo teeru ƭik fo xa kayand axe mbidna a den.

⁴¹Ii-isra’el we a cooxa fog den Leelewi we fop oo fop teeru qarɓeen nahik fo teeru ɓetuu tadik na xa piisel axe den.

⁴²Fuu refna no teeru keene kaa coox’el a den fo xa kayand axe mbiduuna.

⁴³Neene o Yaal oxe a ci’tu Ii-isra’el we saax le fop ta daaɓoox’ina fo daan den ee xan a ci’in a den. A njangaan soo a ngenin fop.

⁴⁴Maaga, o Yaal oxe a fi’a jam a gen me a piis ale no saax le a reefna fop ne ta daaɓoorit’uuna fo daan den. O leng no fañ we den waag’ee o xox a den, too o Yaal oxe a ɓoxota a den fop na xa ƥay den.

⁴⁵Neene, a tegit ake o Yaal oxe a reg’ina Ii-isra’el we a mbadnooxa fop, too a leng teen fe’ee a koƥ.