Read NQAARIIT NE ROOG Yosuwe 22 Bible Online

Yosuwe 22 - NQAARIIT NE ROOG bible

Yosuwe 22

¹Maaga, Yosuwe a xoyna goor we na carind ale Ruben, we na carind ale Gaad fo we na genwal a carind ale Manaase,

²a lay a den ee: «Nu nanana fop ke Moyiis fee o tag no Yaal oxe a hebil’ina too nu mbi’taan deŋ ne heblitanuuma a nuun.

³Yaaga boo fa ndiik, nu mosee o nqaƴ fog nuun Ii-isra’el we, ndaa kaa nu nanan ke o Yaal oxe Roog nuun a hebilna a nuun.

⁴Ndiiki koy, o Yaal oxe Roog nuun a ci’a fog nuun a ñootnax ne ta regit’uuna a den. Nomtooxyo boog no saax le nuun nu laseena, too Moyiis fee o tag no Yaal oxe a cooxin a nuun no batand naa Yordaan.

⁵Kaa rek, fat nu ngay a paax bargal ke fo kebil ke Moyiis fee o tag no Yaal oxe a daawinna a nuun. Mbexyo o Yaal oxe Roog nuun, ndeefaa a ƭat um kili too ngay kebil ke ten. Ndamooxyo no ten, mbaɗooxin na qeeñ nuun fop fo na xa laaw nuun fop.»

⁶Cinj kaaga, Yosuwe a barke’a a den soo a xaƴ a den da nqaad.

⁷Moyiis kaa coox’u genwal fa leng fee na carind ale Manaase lam den kam Basan, soo Yosuwe a coox genwal fa lakas fee lam den paam Ii-isra’el lakas we no mudand ne Yordaan. Ye Yosuwe a xaƴaa a den da nqaad, a barke’a a den

⁸soo a lay a den ee: «Nomtooxyo no ƭiif nuun, ƥisloox kalal maak, cegel mayu, xaaliis, wurus, xanjar, celem fo ñirax mayu, too nu mbadangaa, fat nu nqaajir fo fog nuun cangale keene fop nu njaɓitna no fañ nuun.»

⁹Ruuruben we, Gaagaad we fa genwal a carind ale Manaase a asoorta fo Ii-isra’el lakas we Silo no saax laa Kanaan, ndax da nqaad no saax laa Galaad refna o jegel ole da ndaaw’ina ne o Yaal oxe a heblit’uuna, a reefandin na Moyiis.

¹⁰Ye da mbadiidna na coonand ale Yordaan too a maad’u o ndefaa kam saax le Kanaan, a maxa maaga o sadaxand o ga’nooxu.

¹¹Ii-isra’el lakas we a yegne yee: «Ruuruben we, Gaagaad we fa genwal a carind ale Manaase a maxa o sadaxand na coonand ale Yordaan farna fa in no saax le Kanaan.»

¹²Took o nan olaaga, Ii-isra’el we fop a mbokatoora Silo, ndax da songik a carind ake ndefna no batand.

¹³A ndalfooxa o lul a Finees fee o ƥiy Eleyasaar fee o saasadax oxe, ta ret kam saax laa Galaad ndax ta lay fo Ruuruben we, Gaagaad we fa genwal a carind ale Manaase.

¹⁴Kelfa xarɓaxay na xeet fee a yoon’a fo ten, o leng na carind aluu refna, a ndef yaal ƥasil na qaw ake Isra’el.

¹⁵A ngara no saax laa Galaad maa na carind ake ndefna no batand naa soo a lay a den ee:

¹⁶«Keeke mbokatax ne no Yaal oxe fop a laamtaa a nuun: ‹Xar taxu nu mbi a Roog fee Isra’el ngore’aƭar neeke, mbesin a cinj soo siiknoor fo ten, ye nu maxanna a qoox nuun o sadaxand?

¹⁷Ndax kaa tooñ ne i mbi’it’ina Pe’oor deyee dey a nuun? Ke taamaala a dalit’ina teen mbokatax ne no Yaal oxe fop oo, taxee i nqool teen boo fa ndiik?

¹⁸Xaye nuun wey ngoog mbesahinaa o Yaal oxe a cinj! Kaa nu andee yee nu siiknoorangaa fo o Yaal oxe xaye, o feet ta fuuxan mbokatax ne Isra’el fop.

¹⁹Nu mboogangaa yee saax le nu laseena kaa xoolaƭar, ngaryo no le o Yaal oxe a jegna, me Ngenand tedu ne ten a refna soo nu njeg a las a ndeer in. Kaa koy, ba nu siiknoor fo o Yaal oxe too ba nu siiknoor fa in. Nu mbaree muk o maxan a qoox nuun o sadaxand olaa fogreerna fo ole no Yaal oxe Roog in.

²⁰Ye Akaan fee o ƥiy Serax a gore’aƭarna boo a xot no ke kes’eena, a woora a nuun ee fuux le no Yaal oxe took mbokatax ne Isra’el fop a dal’u, too refee yee ten soom xon’u no tooñ ne ta fi’’ina.› »

²¹Ruuruben we, Gaagaad we fa genwal a carind ale Manaase a ndoona kelfa ke na qaw ake na carind a lakas ake Isra’el ee:

²²«O Yaal katil oxe refu Roog, ii, ten refu o Yaal oxe! O Yaal katil oxe refu Roog, ii, ten refu o Yaal oxe! A anda ke taxna i mbi keeke, too Ii-isra’el we fop a mbaraan o and itam. A soƥangaa yee kaa i siiknoor fo o Yaal oxe mbaat i ngore’aƭar no ten, yaasam baa ta maadnoor a in o feet.

²³A soƥangaa yee kaa i maxan a qoox in o sadaxand olene, ndax i mbes o Yaal oxe a cinj, yaa i ƥoxotaa teen sadax toxel mbaat sadax tuufe-duufe mbaat sadax camsa’oor, yaasam o Yaal oxe fa xoox um a xaw a in.

²⁴Kaa koy, reftee naaga! Kaa i mbi keene kañ, yaam saɗar ee no camaane ke na ngaraa xan xa taan nuun a laamit axe in ee: ‹Ngiɓoor num nu njegu fo o Yaal oxe Roog fee Isra’el?

²⁵O Yaal oxe fa xoox um o mat fi’u a Yordaan, ta ref o ŋat ole a ndeer in fa nuun, nuun Ruuruben we fo Gaagaad we. Nu ndeeree dara fo o Yaal oxe!› A layangaa neene, xan a tax boo xa taan axe in saɗarkatee o Yaal oxe.

²⁶Ten taxu i max o sadaxand olene, ndaa refee muk ee ndax i ƥoxotaa teen sadax toxel mbaat sadax lakas.

²⁷Kaa i mbug rek, ndax o sadaxand olene a ref seede a ndeer in fa nuun fo a ndeer xa taan in ee i njega sañ-sañ o mbaɗooxaa o Yaal oxe fo sadax toxel in, sadax camsa’oor in fo sadax lakas kam Ngenand ne ten. Neene, xa taan nuun mbaagkee o lay axe in ee: ‹Nu ndeeree dara fo o Yaal oxe.›

²⁸Kaa i nqalaat ee taa mbaambir a layangaan a in mbaat xa taan in, xan i mbaag o ndoon a den ee: ‹Nga’angyo, o sadaxand olene daan in a maxna, ta nand fo ole no Yaal oxe, refee koy ee ndax da ƥoxotaa teen sadax toxel mbaat sadax lakas, ndaa ndax ta ref seede a ndeer in fa nuun.›

²⁹Yaaga boog, i maxee muk o sadaxand olene, ndax i siiknoor fo o Yaal oxe soo mbesin a cinj ndiiki, ƥoxotaa teen sadax toxel mbaat sadax tuufe-duufe mbaat sadax lakas. I nqalaatee o ƥoxotit a den o mbiñ o lakas maa refeerna took o sadaxand ole no Yaal oxe Roog in refna mbaambir Ngenand ne ten.»

³⁰Ye Finees fee o saasadax oxe fo kelfa ke yoon’ina fo ten too a ndef yaal a qaw ake a nanna fa lay fee Ruuruben we, Gaagaad we fo Maamanaase we a ndoonna a den, kaaga a dey’a a den.

³¹Finees fee o saasadax oxe refna o ƥiy Eleyasaar a laya a den ee: «I anda yee o Yaal oxe xey a ndeer in xaye, yaam nu mbi’ee ngore’aƭar no ten, too nu mbi’ee kaa waagna tax a qaw ale no Yaal oxe a dal took in.»

³²Cinj kaaga, Finees fee o saasadax oxe refna o ƥiy Eleyasaar fo kelfa ke na xeet fee a asoora fo Ruuruben we fo Gaagaad we. A inoora no saax laa Galaad soo a nqaad no saax laa Kanaan, a mbetandook Ii-isra’el lakas we ke xew’ina.

³³Kaaga a deya Ii-isra’el we soo da ngidmaa a Roog. A nqaƴa song le da mbaajoogna took a carind ale Ruben fo ale Gaad.

³⁴Maaga, Ruuruben we fo Gaagaad we a ne’a o sadaxand olaaga «Seede», a lay ee: «O sadaxand olene kaa ref seede na in fop ee o Yaal oxe refu Roog.»