Read NQAARIIT NE ROOG Yosuwe 23 Bible Online

Yosuwe 23 - NQAARIIT NE ROOG bible

Yosuwe 23

¹Camaane mayu a mbaafa a cinj ye o Yaal oxe a ci’na xeet fee Isra’el a ñootnax, ye ta mucluuna no fañ we mbid’uuna fop. Yosuwe koy, a nogoy’ata tigi.

²Maaga, a xoyna Ii-isra’el we fop, maak we den, kelfa ke den, haahate we den fo aa-adax no xiixire we den, a lay a den ee: «Me ta refna, nogoyataam lool.

³Nu nga’ooda fop ke o Yaal oxe Roog nuun a fi’na qeet ke na xa cegel axene yaam nuun. O Yaal oxe Roog nuun o mat ñoxoranu a nuun.

⁴Nu nga’a ne banjangantuuma a carind ake nuun xa piisel axe no qeet ke moocanduuma boo ƴut no ke xotitna Yordaan boo no maag olaa Mediterane no mudand fo axe no qeet ke maadna o yoqaa teen.

⁵O Yaal oxe Roog nuun xan a rax mbaambir nuun qeet keene yoqna, a fi bo da ƈuf, yaa nu mbaambnooxiidna a den, soo nu njaɓ a saax ake den ne ta regtit’uuna.

⁶Saƭakinooxyo boog, ndeef a paax fop ke bindeena no safe le no kebil ke Moyiis, mbañ o ƭap na ñamaak mbaat na janoon.

⁷Ba nu ndokoor fo qeet ke maadna o ndefaa a ndeer nuun. Ba nu ne’aa a kon ake no roog ke den mbaat nu ndaaɓoortaa a den mbaat nu mbaɗooxaa a den mbaat nu ngungaa mbaambir den,

⁸ndaa ndamooxyo no Yaal oxe Roog nuun doŋ, ne nu mbi’tuuna yaaga boo fa ndiik.

⁹O Yaal oxe a raxa mbaambir nuun qeet maak cegu doole, too boo fa ndiik o leng waagee o xox a nuun.

¹⁰O leng na nuun soom a waaga o ɗiir fañ juni, yaam o Yaal oxe Roog nuun kaa ñoxoranaa a nuun ne ta regtuuna a nuun.

¹¹Mbootooxyo a qoox nuun, mbex o Yaal oxe Roog nuun.

¹²Kaa koy, nu mbesangaan a cinj, ngiɓoor fo qeet keeke ndefna a ndeer nuun, lokoor fa den na pexey ndolnir soo ndokoor fa den,

¹³fat nu and a paax ee o Yaal oxe Roog nuun refkee no raxanaa a nuun qeet keene mbaambir nuun. Xan a ndef na nuun nen mbaal fo mbog, a ndef nen o qiir olaa na dalaa na xa saax mbaat nen a sel kam a ngid boo yaa nu moockaa no saax faaxaan leeke o Yaal oxe Roog nuun a ci’na a nuun.

¹⁴Mi fa xoox es koy, andaam ee ndiik um inoox meen. Nu anda na qeeñ nuun fop fo no yiif nuun fop ee ke o Yaal oxe Roog nuun a reg’ina a nuun a fadnooxa, too a leng na tegit ake ten fe’ee a koƥ.

¹⁵Ne o Yaal oxe Roog nuun a fadnitna a tegit ake ten, neene mat a fadnitkaa fa lay fa mbaaxeer fee ta layna took nuun boo yaa ta moocandkaa a nuun no saax faaxaan leeke ta ci’na a nuun,

¹⁶yaa nu ƭegna ngiɓoor ne o Yaal oxe Roog nuun a dalinna fa nuun. Nu mbaɗooxangaa roog lakas ke mbaat nu ngung mbaambir den, xan fuux le no Yaal oxe Roog nuun a biltooxan a nuun, soo nu moocandel no ñofu no saax faaxaan leeke ta ci’na a nuun.»