Read NQAARIIT NE ROOG Yosuwe 24 Bible Online

Yosuwe 24 - NQAARIIT NE ROOG bible

Yosuwe 24

¹Yosuwe a fokata a carind ake Isra’el fop Sikeem. A xoyna maak we den, kelfa ke, haahate we fo aa-adax we no xiixire we Isra’el da ngar mbaambir Roog.

²Maaga, Yosuwe a laya xeet fee fop ee: «Keeke o Yaal oxe Roog fee Isra’el a layu: ‹Daan we nuun kaa xottoonga na Teerax fee faap Abraham fa Nakoor ngenoogna yaaga no saax o lakas ole no xuluɓ o maak ole Ofrat kaa mbaɗooxoogu roog lakas.

³Sutaam o taan nuun Abraham no saax le kaltaa Ofrat, ɗoxin muu refna kam saax le Kanaan soo ci’in xa taan xa mayu. Kaam ci’in a Isaak,

⁴soo ci a Isaak a Yakoob fa Esawu. Cooxaam a Esawu o jegel olaa na xa coong axaa Seyiir, ndax ta gen maaga, Yakoob fo xa ƥeem o mat a ndet Misira.

⁵Cinj kaaga, lulaam a Moyiis fa Aaroon soo xawit Miimisira we taamaala pogreer mayu, ye um helkaa fo sut a nuun maaga.

⁶Ye suttuuma daan nuun Misira, boo da mbadiid na Kal ale no xeet le, Miimisira we a ndaabiida a den boo maaga fo a sareet-xire fo ŋaaŋaay pis.

⁷Maaga, a ƈufginooxaxam, mi o Yaal oxe, soo um fi o niɓaan a ndeer nuun fo Miimisira we, cinj kaaga um nomtiid poofi ke took Miimisira we, da ƭuud a den. Nu nga’ooda ke fi’uuma Miimisira we! Xeet fee nuun a miñ’a kam a koƥ-a-ƥor alaa lool.

⁸Cinj kaaga, ɗoxaam a nuun no saax le no Aa-amori we ngenoogna no batand naa Yordaan. Weene a songiid’a a nuun, ndaa ɓoxotaam a den na xa ƥay nuun. Nu njaɓa saax le den, yaam moocandaam a den mbaambir nuun.

⁹Balak fee o ƥiy Sipoor reeƭna o maad oxe Mowaab a songiid’a a nuun itam. A reta sax boo a xoynik a Balam fee o ƥiy Bewoor, ndax ta gar a saloox a nuun.

¹⁰Kaa koy, fañaam o nan-giloox a Balam boo ta mujat o barke a nuun sax. Neene, muclaam a nuun na xa ƥay Balak.

¹¹Nu nqaaña a Yordaan soo ngar Yeriko. We ngenoogna Yeriko, Aa-amori we, Peeperisi we, Kaakanaan we, Heeheet we, Giigirgasi we, Hiihiwi we fo Yeeyebus we a ñoxoriida fa nuun itam, ndaa ɓoxotaam a den fop na xa ƥay nuun.

¹²Heblaam poopolyaam da adooxan a nuun, a ndax maad ɗik we no Aa-amori we. No keene fop koy, laƥ ke fo a qali ke nuun njalee teen dara!

¹³Ci’aam a nuun boog lanq kaa nu ngodeerna fo teeru kaa nu ngenna, too nu maxee a den, fo taxar biiñ fo taxar oliiw kaa nu ñaamaa xa tim axe, too nu njimbee a den.›

¹⁴Ndiiki koy, saɗaryo o Yaal oxe too mbaɗooxin fo o ñak sik fo ngor. Mbatinyo roog ke daan nuun a mbaɗooxoogna, ye da ndefaa kaltaa Ofrat fo no saax laa Misira, soo mbaɗoox o Yaal oxe doŋ.

¹⁵Nu mbugangee o mbaɗoox o Yaal oxe koy, njilyo xaye oxe nu mbugna o mbaɗoox, ta ref roog ke daan nuun a mbaɗooxoogna kaltaa Ofrat mbaat roog ke no Aa-amori we nu ngenna no saax den, ndaa mi fo ƥasil es o mat, o Yaal oxe i mbaɗooxkaa.»

¹⁶Xeet fee a ndoonaan ee: «Koo boo muk i nqaƴ o Yaal oxe, mbaɗooxaa roog lakas ne’aand!

¹⁷yaam o Yaal oxe refu Roog in. Ten suttu a in, in fo daan in Misira maa i ndeeƭna faɗ, too i nga’a a qool qac xa anddiloor xa maak axe ta fi’na. Ten o mat saytooxu a in na ƭat ale fop fo no qeet ke i nqaañna xa piisel den.

¹⁸A raxa mbaambir in qeet ke fop boo no Aa-amori we ngenoogna no saax leeke sax. In itam o Yaal oxe i mbaɗooxkaa, yaam ten o mat refu Roog in.»

¹⁹Yosuwe a laya xeet fee yee: «Nu mbaagkee o mbaɗoox o Yaal oxe ne waritna, yaam kaa ref Roog fa tedu too a naal faa waasankeerna a nuun njofaƭar nuun fo pakaad nuun.

²⁰Nu nqaƴangaa o Yaal oxe, mbaɗook roog lakas, xan a geleerooxan a nuun, ndax ta fi a nuun paaxeer soo a moocand a nuun, ke ta fi’anna a nuun paax ƥor boo ndiik fop oo.»

²¹Xeet fee a ndoona a Yosuwe yee: «Muk na adna, yaam xan i mbaɗoox o Yaal oxe.»

²²Yosuwe a layahina a den ee: «Yaaga boog nuun o mat ndefanu a qoox nuun seede ee nuun njiloodu o mbaɗoox o Yaal oxe.» Xeet fee a ndoonaan ee: «In o mat seede’anun a qoox in.»

²³Maaga, Yosuwe a laya a den ee: «Yaaga boog mbatinyo roog lakas ke ndefna a ndeer nuun soo a qeeñ nuun fop a njagin no Yaal oxe Roog fee Isra’el.»

²⁴Xeet fee a ndoonaan ee: «O Yaal oxe Roog in doŋ i mbaɗooxkaa, nan-giloox o ñuxur um.»

²⁵No ñaal naaga, Yosuwe a saƭkanda kam Sikeem ngiɓoor ne na xeet fee no mbaɗoox o Yaal oxe soo a daawin a den kebil ke fo bargal ke da mbarna o ndeef.

²⁶A binda a den no safe le no kebil ke Roog. Cinj kaaga, a xota ɓil maak, a sipin ɗuga ngariñ naa reeƭna no Mbind tedu ne no Yaal oxe,

²⁷a lay xeet fee fop ee: «Nu nga’a ɓil leeke. Ten na refankaa a in seede, yaam a nana fa lay feene a ndeer in fo o Yaal oxe. Xan a refan a nuun seede, yaam ndik nu nqañ a Roog nuun.»

²⁸Cinj kaaga, Yosuwe a nomta xeet fee, oxuu refna a xaad no fiisel ole ta las’eena.

²⁹A cinj yaa kaaga fop a xewna, Yosuwe fee o ƥiy Nun too a ref o tag no Yaal oxe a xona, ye ta jegna xa kiid teemeed fo xa kiid xarɓaxay.

³⁰A gase no fiisel ole ta las’eena kam Timnat-Serah no jegel olaa na xa coong axaa Efrayim no ɓemb-roog o janoon ole no joong olaa Gaas.

³¹No ñoow ole Yosuwe fop, Ii-isra’el we a mbaɗooxooga o Yaal oxe fo cinj fa nqon um boo neen maak we maad’ina a pi ake o Yaal oxe a fi’an’ina a Isra’el fop a nqonu.

³²Xa kiiƈ axe Yoseef Ii-isra’el we a ƥistiid’ina Misira a ngase Sikeem no ɗeg lanq olaa Yakoob a jikit’ina xa monjong teemeed xaaliis fa nqoolu na xa taan axe Hamoor fee sinjna teeru fee Sikeem. O ɗeg oleene koy, xa taan axe Yoseef njeg’atun.

³³Eleyasaar fee o ƥiy Aaroon a xona itam soo a gasel Gibe’a refna teeru fee Finees fee o ƥeem a las’eena no jegel olaa na xa coong axaa Efrayim.