Read NQAARIIT NE ROOG Yosuwe 3 Bible Online

Yosuwe 3 - NQAARIIT NE ROOG bible

Yosuwe 3

¹No feet olaa ƥiiɓ teel Yosuwe fo Ii-isra’el we fop a inoora Sitiim, a ngar bo no xuluɓ olaa Yordaan soo a mbe’aa maaga, a cungaa yaa da njootkaa.

²A cinj ñaal tadik, aa-adax we na xeet fee a ndefa no mbidaa kam saŋe ne,

³a layaa Ii-isra’el we yee: «Bo nu nga’na saasadax we ndefna ndef Leelewi we a saq arka ne no ngiɓoor ne no Yaal oxe Roog nuun, fat nu inoox o mbiñ onqene, ndeefanin.

⁴Neene, xan nu and a ƭat ale nu mbarna o nqot, yaam nu mosee o ndeef a ƭat aleene. Kaa koy, ba nu mat arka ne, ndaa fat nu nqaƴ ta adoor a nuun ngap a taaraand juni.»

⁵Yosuwe a laya xeet faa yee: «Tedlandooxyo, yaam o feet o Yaal oxe a fi comlaand a ndeer nuun.»

⁶Yosuwe a laya saasadax waa yee: «Meeɓyo arka ne no ngiɓoor ne, adooxan xeet fee.» A ndalfooxa o meeɓ arka ne no ngiɓoor ne, a ñaaƴ, a adooxan xeet fee.

⁷O Yaal oxe a laya a Yosuwe yee: «No ke xotitna no ñaal ne xaye xam fi’ong o kiin o maak na kid no Ii-isra’el we fop, too xan da and ee mexey fa wo ne refit’uuma fa Moyiis.

⁸Wo o mat, hebli saasadax we saqna arka ne no ngiɓoor ne da ngeenoox kam foofi le no xuluɓ ole Yordaan, yaa da mbadiidna maaga.»

⁹Yosuwe a laya Ii-isra’el we yee: «Matiidyo mene too nan-giloox ke o Yaal oxe Roog nuun a layna.»

¹⁰Yosuwe a laya yee: «No keeke nu anditkaa yee Roog fa ñoow jok fee oxey a ndeer nuun too xan a rax mbaambir nuun Kaakanaan we, Heeheet we, Hiihiwi we, Peeperisi we, Giigirgasi we, Aa-amori we fo Yeeyebus we:

¹¹Xan arka ne no Yaal oxe na maadooxaa took lanq ke fop a xaañ o xuluɓ ole Yordaan mbaambir nuun.

¹²Ndiiki koy, njilyo a ndeer nuun goor xarɓaxay fo goor ɗik, o leng na carind aluu refna.

¹³Boo xa caf no saasadax we saqna arka ne no Yaal oxe na maadooxaa took lanq ke fop a ndokaa na foofi le Yordaan rek, xan poofi ke a nqaajoor, soo poofi ke na pudnand ale a ngeenoox jiŋ nen tabax sipe.»

¹⁴Ye xeet fee a ƭisooxna, ndax da nqaañ a Yordaan, saasadax we saq’ina arka ne no ngiɓoor ne adooxan’u a den.

¹⁵Keene oxe jopir’a a saxad ale, a soƥ Yordaan a ref na waame. Ye saasadax we saq’ina arka ne a mbadiidna Yordaan boo a suupaa xa caf den no foofi le,

¹⁶poofi ke na pudnand ale a ngeenooxa jiŋ nen tabax sipe maa liitooxna a den paam teeru faa ne’eena Aadama refna paam Sartan, soo poofi ke nqayoogna farna fo maag o Xanju laa, a suur boo a naag mes. Maaga, xeet fee a mbaag’ata o nqaañit a Yordaan me jasnoorna fa Yeriko.

¹⁷Saasadax we saq’ina arka ne no ngiɓoor ne no Yaal oxe kaa ngeenoox’u no beeru ndeer ee ndeer o xuluɓ ole Yordaan boo neen Ii-isra’el we fop a nqaañu a Yordaan, a ndakaa no beeru.