Read NQAARIIT NE ROOG Yosuwe 4 Bible Online

Yosuwe 4 - NQAARIIT NE ROOG bible

Yosuwe 4

¹Ye xeet fee fop a nqaañna o xuluɓ ole Yordaan, o Yaal oxe a laya a Yosuwe yee:

²«Njilyo goor xarɓaxay fo goor ɗik na xeet fee, o leng na carind aluu refna,

³ngebil a den da mbaaƭit a ƥil xarɓaxay fo a ƥil a ƭak ndeer ee ndeer Yordaan me saasadax we a ngeenooxna, a ƥisloox a den soo a njuum a den no mbiñ onqe nu mbe’kaa o yaar.»

⁴Yosuwe a xoya goor xarɓaxay fo goor ɗik we njil’eena, o leng na carind aluu refna,

⁵a lay a den ee: «Ndetyo ndeer ee ndeer Yordaan mbaambir arka ne no Yaal oxe Roog nuun, oxuu refna na nuun a gadooxiid ɓil, ta reefandtel ne a carind ake Isra’el a mbodna.

⁶A ƥil akeene xan a mbetandaa xeet fee ke o Yaal oxe a fi’na. O feet olaa feet, yaa xa ƥiy nuun a laamitkaa a nuun ke a ƥil akene a tekitna,

⁷fat nu ndoon a den ee: ‹Poofi ke Yordaan ƈufoogna kaa ngeenoox’u mbaambir arka ne no ngiɓoor ne no Yaal oxe. Ye arka ne a xaañneel a Yordaan, poofi ke ten ƈufoogna kaa nqaajoor’u. A ƥil akene boog, xan a ndef no Ii-isra’el we betandoor no keene boo kili.› »

⁸Ii-isra’el we a mbi’a ke Yosuwe a hebil’ina a den. A nqotta a ƥil xarɓaxay fo a ƥil a ƭak ndeer ee ndeer Yordaan, ne o Yaal oxe a heblit’uuna a Yosuwe, ta reefandtel ne a carind ake Isra’el a mbodna. A ƥisa a den maa da ndalna soo a sip a den maaga.

⁹Yosuwe a sipa itam a ƥil xarɓaxay fo a ƥil a ƭak ndeer ee ndeer Yordaan, me xa caf axe no saasadax we saq’ina arka ne no ngiɓoor ne a ndak’ina. A ƥil akaaga a maada maaga boo no ñaal roog ne xaye.

¹⁰Saasadax we saq’ina arka ne kaa maad’u o ngeenooxaa ndeer ee ndeer Yordaan boo neen fop ke o Yaal oxe a hebil’ina a Yosuwe ndax ta daawnin xeet fee a fadne. Fop ke Moyiis a sim’ina a Yosuwe a fi’’e, too xeet faa fop a ñofa o nqaañ.

¹¹Ye xeet fee fop a nqaañna a Yordaan boo a ƈut, arka ne no Yaal oxe fo saasadax we saq’uuna a ndakooxa o adooxan a den.

¹²Goor we na carind ale Ruben fo we na le Gaad fo we na genwal fee na carind ale Manaase a adooxana Ii-isra’el lakas we, a mbapooxan a ñoq ne Moyiis a heblit’uuna a den.

¹³Mbaambir no Yaal oxe, ngap goor cuni qarɓeen nahik waa mbapooxanna a ñoq a njagna na xa saawit axaa Yeriko.

¹⁴No ñaal naaga, o Yaal oxe a magnanda a Yosuwe na kid no Ii-isra’el we fop, too weene a niwaan no ñoow o ñis um fop ne da niwit’ina a Moyiis.

¹⁵O Yaal oxe a laya a Yosuwe yee:

¹⁶«Hebli saasadax we saqna arka ne no ngiɓoor ne da sutooxiid a Yordaan!»

¹⁷Maaga, Yosuwe a hebla saasadax waa da sutooxiid o xuluɓ olaa Yordaan.

¹⁸Yaa saasadax waa saq’ina arka ne no ngiɓoor ne no Yaal oxe a sutooxaa a Yordaan boo a ndakaa na jeeri fee rek, poofi ke a ndalfooxa o nomtoox naa da ndeeƭna, a ƈufatinaa nen yaaga, a ndefatin na waame.

¹⁹No ñaal xarɓaxayandeer ne no nqool o eetaand onqe Ii-isra’el we a nqaañu a Yordaan. A sipa saŋe den kam Gilgal no cat kaa no jegel ole Yeriko farna fo batand naa.

²⁰Yosuwe a sipa kam Gilgal a ƥil xarɓaxay fo a ƥil a ƭak ake nqotit’eena Yordaan

²¹soo a lay Ii-isra’el we yee: «O feet olaa feet, yaa xa ƥiy nuun a laamitkaa a nuun ee: ‹Ndi baa, xar a ƥil akene a tektu?›,

²²fat nu ndoon a den ee: ‹Meeke Ii-isra’el we a nqaañit’u a Yordaan, a ndak no beeru.›

²³O Yaal oxe Roog nuun kaa xaaj’u poofi ke Yordaan mbaambir nuun boo neen nuun fop nu nqaañun, ne ta fi’it’uuna na Kal alaa no xeet laa ta xaaj’ina mbaambir in boo neen i nqaañun.

²⁴Kaa fi’in, ndax qeet ke no lanq ke fop a and ne doole fee no Yaal oxe a magnitna fo itam ndax nu saɗar o Yaal oxe Roog nuun boo kili.»