Read NQAARIIT NE ROOG Yosuwe 7 Bible Online

Yosuwe 7 - NQAARIIT NE ROOG bible

Yosuwe 7

¹Ii-isra’el we a ngore’aƭara, yaam ne da nqotna no ke war’eena o yaq no gon no Yaal oxe too ta xañit’un a den. Akaan fee fog’ina na carind ale Yudaa too a ref o ƥiy Karmi fee refna o ƥiy Sabdi fee o ƥiy Serax kaa xot’u no ke war’eena o yaq. Keene o mat tax’u fuux le no Yaal oxe a biltooxan Ii-isra’el we.

²Yosuwe a lulta goor Yeriko, ndax da ngorook teeru fee Ay refna no batand naa Betel paam Bet-Awen. Ye weene a ngorooxuuna,

³a nomtooxiida me Yosuwe, a layin ee: «Jaree sax o heblaa xiixire we fop, ndax da songik a Ay. Xan goor cuni ƭik mbaat cuni tadik rek a ndey, yaam wiin we na teeru faa mayee kaa taxna o innaa xiixire we fop.»

⁴Ngap goor cuni tadik a ndeta, a song teeru faa Ay, ndaa goor we Ay a ƭiira a den.

⁵Wiin we Ay a mbara na den ngap goor qarɓeen tadik fo goor ɓetuu fa leng. A ndaabta a den no don-maax olaa na teeru faa boo Sebarim soo a nqawit a den na pudnand alaa. Maaga, cer no Ii-isra’el we a ƥolooxa, xa laaw den a ndet.

⁶Yosuwe a faara toki um, a gung a lanq mbaambir arka ne no Yaal oxe, a yipoox fo ut no xoox soo a yoq naaga boo no kirand naa. Maak we Isra’el itam a mbi’a leng kut ke.

⁷Yosuwe a laya yee: «Ey, o Yaal oxe na refkaa boo faw, xar taxu o jootniid a in a Yordaan? Ndax kaa o bug o ɓoxot a in na xa ƥay no Aa-amori we soo saŋiknoor a in? Giimee rek bo i yoq’ina no saax o lakas ole Yordaan!

⁸Ey, o Yaal oxe, ndiiki koy, xar um laykaa, yaam Ii-isra’el we a ƈufa mbaambir no fañ den?

⁹Xan Kaakanaan we fo we ngenna no saax le fop a yegin, a mbid a in o kurul-keƥ soo a moocand a kon in no saax le. Ndi yaaga nam gon of a jegitkaa o ndam?»

¹⁰O Yaal oxe a laya a Yosuwe yee: «Ndi xar gungano a lanq neeke? Naagi daket!

¹¹Ii-isra’el we a mbakaada, a ƭap ke hebil’uuma a den. Kaa nqot no ke war’eena o yaq, a nguuɗin, a ƭasnin soo a ƥekin kam tikoorik den.

¹²Ii-isra’el we mbaagkatee o nqox fañ den, ndaa kaa yaskaa da nduuf, yaam den fa qoox den kaa ndefat yaqel. Refkatiim fa nuun a refangee kaa nu yaq ke war’eena o yaq too a ref a ndeer nuun.

¹³Ndiiki boog, inooxi, fi boo xeet fee a tedlandooxan o feet, yaam o Yaal oxe Roog fee Isra’el kaa tee: ‹Nuun Ii-isra’el we, no ke war’eena o yaq a jega teen kaa refna a ndeer nuun, too nu mbaagkatee o nqox fañ nuun, a refangee kaa nu sutin saŋe ne.›

¹⁴O feet nqes, fat a carind ake fop a matiidaa a leng a leng. Na carind ale mbanjang ne no Yaal oxe a yenkaa, fat a qaw ake ten fop a matiidaa a leng a leng. Na qaw ale mbanjang ne no Yaal oxe a yenkaa, fat ƥasil ke ten fop a matiidaa leng leng. No ƥasil ne mbanjang ne no Yaal oxe a yenkaa, fat o koor oo koor a matiid.

¹⁵Took no xe mbanjang ne no Yaal oxe a yenkaa koy yaam ke war’eena o yaq, fat a joorel kam fiɗel le, ten fo o jeg um fop. Oxeene kaa ɗeg ngiɓoor ne no Yaal oxe, a fi cednooxu kam Isra’el.»

¹⁶Yosuwe a inooxa ƥiiɓ teel, a matandiid a carind ake Isra’el fop, soo mbanjang ne a yen na le Yudaa.

¹⁷A matandiida a qaw ake na carind ale Yudaa fop, soo mbanjang ne a yen na le Serax. A matandiida ƥasil ke na qaw ale Serax fop, soo mbanjang ne a yen no ne Sabdi.

¹⁸A matandiida o koor oo koor no ƥasil ne Sabdi, soo mbanjang ne a yen took Akaan fee refna o ƥiy Karmi fee o ƥiy Sabdi fee o ƥiy Serax na carind ale Yudaa.

¹⁹Yosuwe a laya a Akaan ee: «O ƥees, ɓoxoti o Yaal oxe Roog fee Isra’el o ndam, niwin too layaam ke fi’oona, fañaam o ɗas dara.»

²⁰Akaan a doonaan ee: «Ndigil oo, mi o mat tooñu o Yaal oxe Roog fee Isra’el. Keeke refu ke fi’uuma:

²¹kaam ga’’u no cangale ke sabadoor mosu naa inoorna Sine’aar[2] fo xa monjong teemeed ƭik xaaliis fa nqoolu fo muul wurus laa o meɗel um a fi’na liibar, yaaw a den lool soo xot a den. Ndiiki koy, owaay ɗasnuuma, gas a den ndeer ee ndeer ƭiif es, xaaliis fee a adoox.»

²²Yosuwe a lula goor da ƈuf no ƭiif naa Akaan. Maaga o mat ƭasin ne a reeƭu, xaaliis fee a adoox.

²³A nqotta fop kam ƭiif naa, a ƥisiidin a Yosuwe fo Ii-isra’el lakas we fop, soo ta juumel mbaambir no Yaal oxe.

²⁴Yosuwe fo Ii-isra’el we fop a njanga a Akaan fee o ƥiy Serax, xaaliis fee, sabadoor ne, muul wurus le fo xa ƥiy axe ten, goor fo rew, qoox ke ten, xa paam axe ten, a ked ake ten, ƭiif ne ten fo ke ta jeg’ina fop, a ƥis a den na yulanq Taamaala laa.

²⁵Yosuwe a laya a Akaan ee: «Wo o mat gartu taamaala fee in! Ndiiki koy, xan o Yaal oxe a doonong taamaala.» Maaga, Ii-isra’el we fop a mbartaan a kac, ten fo wiin um fop soo a ndox a den.

²⁶Cinj kaaga, a njuuma took um a kac bo ta fi juum maak laa na maadaa boo xaye. Ten taxu boo fa ndiik a yulanq alaaga a ne’el a yulanq Taamaala. Cinj kaaga, fuux le no Yaal oxe a ɓoosa.