Read NQAARIIT NE ROOG Yosuwe 9 Bible Online

Yosuwe 9 - NQAARIIT NE ROOG bible

Yosuwe 9

¹Ke xew’ina a nannooxa me no maad we no mudand ne Yordaan, a xotit no jegel ole na xa coong axe fo no jegel ole na yulanq ake fo no jegel ole na ƥeeraamb ale no maag ole Mediterane, a ret boo Libaŋ. Weene ndeeƭu maad we no Heeheet we, no Aa-amori we, no Kaakanaan we, no Peeperisi we, no Hiihiwi we fo no Yeeyebus we.

²Den fop a mbokatoora, a nanoor, ndax da ñoxor fa Yosuwe fo Ii-isra’el we.

³Hiihiwi we ngenna Gibe’on itam a yega ke Yosuwe a fi’’ina teeru fee Yeriko fa fee Ay.

⁴A mbexeya naa da ƈiƴtitna a den. Leng-leng na den a mbi’ooxa duleer, a suf took xa paam den xa saaku xaa ƈaxooxna fo poxos nogoyu kaa yiptoogeena biiñ too a nquuyoox boo a ndaafel.

⁵Kaa ndokoox’u liir xa ñaaƭ axaa ñaamooxna soo a ŋarafel fo liir toki kaa ƈaxooxna. Puuru ke da yaxandoox’ina kaa mbeer’u boo a moxoñoox.

⁶A ndeta a soƥik a Yosuwe no saŋe naa Gilgal soo a layin, ten fo Ii-isra’el lakas we yee: «Kaa i inoor no saax goƭu. Ndiiki koy, ndalinyo fa in ngiɓoor.»

⁷Ii-isra’el we a ndoona Hiihiwi waaga yee: «A waaga o ref ee fa in nu ngenu, too a refangaa naaga mat i ndalinkee fa nuun ngiɓoor.»

⁸Maaga, a laya a Yosuwe yee: «Dag of i ndefu!» Kaa koy, Yosuwe a laamta a den ee: «Aniin nu ndefu fo mam nu inooru?»

⁹A ndoonaan ee: «In we dag of, kaa i inoor no saax goƭu tigi, yaam ne i nanna o Yaal oxe Roog of a layteel. I nana fop ke ta fi’na Misira

¹⁰fo fop ke ta fi’na maad ɗik we no Aa-amori we no batand ne Yordaan, Siihon fee o maad Hesebon fa Oog fee o maad Basan genoogna Astarot.

¹¹Maak we in fo we ngenna no saax in fop kaa lay’u a in i yaxandooxan a ƭat ale, nqetiid fa nuun soo lay a nuun ee: ‹Dag nuun i ndefu! Yaaga boog ndalinyo fa in ngiɓoor!›

¹²Nga’angyo puuru ke in! Kaa sum’u jip, ye i nqottaa a den no pind kaa in ndax i yaxandooxan a ƭat ale, ngaraa me nuun, ndaa ndiiki koy kaa mbeer boo a moxoñoox.

¹³Poxos biiñ keeke qas a ndeeƭu, ye i soɗaa a den, ndaa owey a nquuyooxa. Ƭeetyo ne toki ke in fo xa ñaaƭ axe in fop a ñaamoorna yaam a ƭat a koƭu le.»

¹⁴Kelfa ke Isra’el koy, a mboola a ñaam[4] no ke weene a yaxandoox’ina, too laamtee o Yaal oxe.

¹⁵Yosuwe a regoora fa den jam, a dalin fa den ngiɓoor naa woorinna xa ñis den, too kelfa ke na xeet fee fop a ndaaɓooxaan.

¹⁶Ñaal tadik a cinj ye Ii-isra’el we a ndalinna fa den ngiɓoor, a yega yee weene gentand den sax a ndeeƭu,

¹⁷yaam no ñaal ndadkandeer naa a ndaaw’u teeru ke den, a cinj ye da ƭisooxna. Teeru keene ndefu Gibe’on fa Kefira fa Beerot fa Kiryat-Ye’arim.

¹⁸Ii-isra’el we koy, mbar’ee a den yaam a taaƥ ale kelfa ke na xeet fee a ndaaɓoox’ina fa den no gon no Yaal oxe Roog fee Isra’el. Maaga, mbokatax naa fop a ndefa no ñuxmatilooxanaa kelfa kaa.

¹⁹Kelfa kaa fop a ndoona a den ee: «In o mat ndaaɓoox’u fa den no gon no Yaal oxe Roog fee Isra’el. Ndiiki koy, i mbaagatee o nduq a den,

²⁰ndaa xan i nqaƴ a den da ñoow, ndax i qickee fuux le no Yaal oxe took in yaam a taaƥ ale i mbi’na fa den.

²¹Fat a nqaƴel a ñoow, ndaa koy den na mbugko ndaxananaa xeet fee fop, a ƈeewanan.» Keene o mat kelfa ke a ngeblit’u.

²²Yosuwe a xoya Giigibe’on we, a lay a den ee: «Xar taxu nu nax a in, lay ee me nu ngenna matee mene fop, too yaaga fop oo a ndeer in nu ngenu?

²³Ndiiki koy, nu ngalakooxa! Faɗ nu ndefkataa boo kili, ndaxananaa Mbind ne na Roog es soo ƈeewanan.»

²⁴Giigibe’on we a ndoona a Yosuwe yee: «In we dag of, kaa i layel a lay boo nqij ee o Yaal oxe Roog of kaa hebil’u a Moyiis fee o tag um, ndax ta ɓoxot a nuun saax lene fop, nu saŋik fop we ngenna teen. A kar ale nuun boog a taxa i nqalamaa tigi xa ñis in. Keene mat taxu i mbesoorit neene.

²⁵Me ta refna koy, in wey na xa ƥay of. Fi’i na in kuu jofooxoonga.»

²⁶Neeke mat Yosuwe a fesoor’u fa den: A jaɓta a den na xa ƥay no Ii-isra’el we boo mbaree a den,

²⁷ndaa no kaa xotitna no ñaal naaga Yosuwe a ɓakanda a den no ndaxananaa mbokatax ne Isra’el fo o sadaxand ole no Yaal oxe, a ƈeewanaa a den, too boo xaye keene refu calel den no mbiñ onqe o Yaal oxe a jilna.