Read NQAARIIT NE ROOG 2 Tesalonik 1 Bible Online

2 Tesalonik 1 - NQAARIIT NE ROOG bible

2 Tesalonik 1

¹Mi Pool fa Silwe fa Timote na mbindaa a nuun o leetar oleeke. Kaa i simnaa a nuun, nuun mbokatax ne no gimu we kam teeru fee Tesalonik, nuun we mbogna na Roog Faap in fo no Yaal oxe Yeesu Kiristaa.

²Koo yaasam Roog Faap in fo o Yaal oxe Yeesu Kiristaa a ci a nuun yirmande fa jam.

³Kaa i mbar o ngidmaa a Roog kili yaam nuun, nuun fog gimu we, too keene sax kaa warna o jeg oo, yaam o ngim nuun kaa moƴ o jofaa mbaambir rek, soo o mbeq onqe o kiin oo kiin a jegna no lakas we a xay no xuu refna na nuun.

⁴Ten taxu nu ndefat kañoor in kam pokatax ke no we ngimna na Roog, yaam ne nu njegna o muñ fo o ngim kam ñagadil ke fop fo naqad ke fop na ndalaa took nuun.

⁵Keene laltu deŋ hate fa njofu fee Roog, too xan a mbi a nuun laalam tigi no Maat ne ten, taxna nu toroxaa.

⁶Ndigil oo kañ: Roog kaa rabdaa naqad we na naqadilaa a nuun,

⁷soo nuun we toroxandeena, ta ci a nuun a ñootnax, a ci’in a in itam. Xan Roog a fadin keene fop, yaa o Yaal oxe Yeesu a inooritkaa na asamaan, a yoon fo malaaka cegu katil ke ten,

⁸kam fiɗel laa na miric-miricnaa. A koom kañ, ta xaw wiin we andeerna a Roog too a mbañ o nanan Yegil mbaax ne no Yaal in Yeesu.

⁹Xan a qaw den a ref a saŋkax boo faw. Xan a mbildel kaltaa a tagid no Yaal oxe, a ngoƭ o ndam onqe na katil fee ten.

¹⁰Xan a gar na bes faaga, ndax ta ɓoxotel o ndam no we mbogna no ten, soo we ngimna no ten fop a kañan. Nuun sax, xan nu mbog no wiin weene, yaam nu ngima seede in.

¹¹Ten taxu i ngen no nqeɗanaa a nuun, ndax o xoy ole Roog fee in jombkee a nuun. Yaasam ta ci a nuun doole faa nu mbaagna o mbadnit paax ke nu nqalaataa fop fo calel ke no ngim onqe nu njegna.

¹²Neene, xan gon le no Yaal in Yeesu a ɓoxottel o ndam na nuun, soo nuun itam, nu ƥoxotel o ndam no ten, na pexey yirmande fee Roog in fo no Yaal oxe Yeesu Kiristaa.