Read NQAARIIT NE ROOG 2 Tesalonik 2 Bible Online

2 Tesalonik 2 - NQAARIIT NE ROOG bible

2 Tesalonik 2

¹No ke xotna na kar ale no Yaal in Yeesu Kiristaa fo ne i mbokatooritkaa paam um, fog we, ke i nqeɗaa a nuun teen refu yee nu mbañ o ñak sagu nuun no ñofu. Baa diid leng a dam a nuun, yaam nu mboogaa yee bes fee no Yaal oxe a fadiida boo a ƴut. A waaga o jeg waa na njo’tanaa a Roog, ne’atiim o ɗelem mbaat o leetar olaa nandna wee na in nu ndaawtun.

³Ba nu njaɓ o kiin a nax a nuun no kuu ta waagna o ref. Boo ñaal neene a helko fo garaa koy, xan a soƥ wiin mayu a siiknoor fa Roog, soo mbir ne no njofaƭar ne a feeñ, ten fee jagandaneena a saŋkax ale.

⁴Kaa fapoox, soo a inooxan fop ke na xoyeel Roog mbaat ta faɗooxeel. Xan a inooxan keene, boo a ret a moof no faɗoorand ole Roog, soo a lambnaa yee Roog a refu.

⁵Mbetandooxyo boog ee keene yegnitoogum, ye maaduuma o refaa fa nuun.

⁶A jega kaa taxna boo waagee o feeñ ndiiki, too nu andaan.

⁷Doole fa kunpa’u fee no njofaƭar ne kaa jalaa haat, ndaa koy, waagee o fesoor naa feltuuna boo yaa oxe na xañtan a inooxna meen.

⁸Maaga, xan mbir ne no njofaƭar ne a feeñ. Kaa koy, xan o Yaal oxe Yeesu a wuuɗin ta fi fo ut, soo a sooynin na pexey a qoolaand ale na kar um.

⁹Boo andoona yee mbir ne no njofaƭar ne Saytaane a luliidkaa a gara, xan a feeñit a pi katil fo xa anddiloor fo comlaand, too keene fop koy, xa maaƥ soom a ndefu, ndax ta nax we na mo’kaa.

¹⁰Kuu naanaxir ke no cofaƭaru xe a mbaagna mbaag o ndef fop oo, we mo’na ndefu we yapatilna o mbex ndigil ne mucilkoogna a den.

¹¹Ten taxu yoo Roog a riñ a den no ngulmataan o njegu doole nqaa taxna da ngim na xa maaƥ.

¹²Neene o mat a qaw ale a dalitkaa took no fop we njaɓkeerna o ngim ndigil ne, den weene coxod a felna.

¹³In o mat, kaa i mbar o ngidmanaa a nuun a Roog mbeet oo mbeet, nuun fog we o Yaal oxe a fexna. Kaa jil a nuun no mberaandoong naa, ndax ta muclit a nuun Yiif le na tedlandaa, fo yaam ne nu ngimna ndigil ne.

¹⁴O xoy ole o Yaal oxe a xoyna a nuun na pexey Yegil mbaax ne in kaa tekit ee: Ngaryo njeg a las nuun no ndam onqe no Yaal in Yeesu Kiristaa.

¹⁵Yaaga boog, fog we, ndamyo a paax, too ngeek fa doole ke i njanginna a nuun, ta ref no ɗelem mbaat no leetar.

¹⁶O Yaal in Yeesu Kiristaa fa Roog Faap in fee fexna fex a in, a ci’a a in na pexey yirmande um yaaloor boo faw fo yaakaar mbaax.

¹⁷Yaasam ta yaal a nuun, a ci a nuun nu saƭik na pi a paax fo na ƭelem a paax itam!