Read NQAARIIT NE ROOG 1 Timote 1 Bible Online

1 Timote 1 - NQAARIIT NE ROOG bible

1 Timote 1

¹Mi Pool, kaam ref apootar Kiristaa Yeesu ne Roog fee o Muumucil in fa Kiristaa Yeesu fee refna yaakaar in a ngeblituuna.

²Timote, mexe bindang, wo fee o ƥees ŋaƈit no ngim onqe. Yaasam Roog Faap fee fo o Yaal in Kiristaa Yeesu a ci’ong yirmande fa jam, too a njeg o liir na wo.

³Ne layit’oonga o ten ye um hebooxaa o ret Makedoni, mexe dakooxang o wetandaa yee: Moofi Efees, ndax o waag o maƭoox wiin we ndefna maaga, too a njangnaa kaa refeerna ndigil ee mbariran o mbi.

⁴Layi a den itam ee baa ŋereƥoox na nax mbaat da ñimatiraa fo njaangooƈ a ndetaa. Keene naagee o ataa dara a refangee ñimatir, too mbaagee o ngeenin calel ke na mbi’eel, ndax o ngim na Roog a jof mbaambir.

⁵Ke taxna koy um regdinooxaa keene refu ta rim o mbeq o ngatu no xeeñ xoolu qac fo yiif jeejooxeer dara fo o ngim o njegee yememaar.

⁶A jega waa ƭapna keene ne’uuma ndiiki, soo a ndeefan ñimatir pagkatar cegee xoox.

⁷Kaa mbug o ndef jaajangin maak no kebil ke, ndaa andee dara no ke da layaa fo ke da nqoxtaa.

⁸No ndigil, i anda yee kebil ke mbaaxaƭaree, yaa da ndeefteena ne waritna.

⁹I anda a paax ee o nanangaa kebil a dalnel, refee yee jofu we taxu, ndaa jofaƭaru we fo luubooxu we fo soxodu we fo baabakaad we. We ngartuuna ndefu itam we niweerna a Roog, we naangeerna o ndeefaa a ƭat Roog fo we na mbaraa we ndimna a den fo waawar lakas we.

¹⁰Weeke itam a mboga teen: We na seeqaa, goor we na mbesanraa a ndeer den, we na ngignaa xa teɓandoong, maamaaɓ we fo we na seede’aa na xa maaƥ. Fop ke guutatirna fo a cangin a ñoow ale a foga teen.

¹¹A cangin aleene koy, kaa inoor no Yegil mbaax ne doxneema, too ta feeñlaa o ndam onqe Roog fee helna simatel.

¹²Kaam gidmaa oxe dif’axama, ta ref Kiristaa Yeesu fee o Yaal in, yaam ne ta ɗeetaxama nen o kore’u, soo a ɓekaam no calel um,

¹³mi fee andoona yee yaaga, kaam reeƭu oxaa na wenan, ñagadilaa we ngimna no ten, ref o kiin fo’oy. Kaa koy, daawaam yirmande, yaam kaa and’iim ke um fi’aa, took o ñak o ngim.

¹⁴Yirmande fee no Yaal oxe a moƴa o siw koy, too daawaam o ngim onqe fo o mbeq onqe ndefna na Kiristaa Yeesu.

¹⁵Keeke fa lay fa mbooru faa deyeena o jaɓ oo: Kiristaa Yeesu kaa gar na adna fee, ndax ta mucil baabakaad we, mi fa xoox es, um ref oxe moƴna faaxaƭar na den.

¹⁶Kaa koy, ne laytanuuma, kaam daaw yirmande, ndax Kiristaa Yeesu a eet o laltit na mi o muñ um fop. Neene, xam ref o ɗeendoor mbaambir no we na ngimkaa no ten, ndax da njeg o ñoow o fagkeer ole.

¹⁷Roog fee mosna mos o refaa o maad, xonkee muk, too waagaand o ga. O ten soom refu Roog. Fat wiin we a ƥoxotin o niwel fo o ndam bo na moos boo moos. Amiini.

¹⁸Timote, wo fee o ƥees, keeke refu a cangin ale um doxnang. Kaa yoon fo fa lay fee we na njo’tanaa a Roog a lay’ina na wo yaaga. Fa lay feene xan a saƭakinong, ndax o waag o maafrel njom mbaax,

¹⁹geek o ngim onqe fo yiif jeejooxeer dara. Yiif leene koy, a jega waa naanguuna buc, too kaa ngido kalte o ngim onqe.

²⁰Himene fa Aleksaandar a mboga teen. Kaam ɓoxot a den a Saytaane, ndax da yaroox, too a and ee o kiin waree o wenaa a Roog.