Read NQAARIIT NE ROOG 1 Timote 3 Bible Online

1 Timote 3 - NQAARIIT NE ROOG bible

1 Timote 3

¹Fa lay feeke a woora: O kiin a naagangaa o diirooxaa o ref o aa-adax no gimu we, oxe diirooxaa tig paax maak.

²Yaaga boog, o aa-adax waree o jeg ŋañel. Kaa war o dam no teem o leng soom, a ɓuuɓ, a fod no ke ta fi’aa, a fañ o hupal, o ñoowooƭ um itam ta jagandan, a dalnaa we na ngaraa no mbind um. A wara o ref o baagu a cangin itam.

³Waree koy o ref o yeeyer o say mbaat ta may balu-balu, ndaa kaa war o lewet, a bug jam fa jam, a fañ o buge.

⁴A wara waag o ɗoxaa ƥasil um a paax, xa ƥeem, ta yar a den boo da nananan no kuu refna, too a niwin.

⁵O kiin a waagangee o ɗox ƥasil um o mat, kaa andiim ne ta waagkaa o ɗoxit mbokatax ne no we ngimna na Roog.

⁶Waree o ref itam oxaa na sogaa o gim, yaam ndik o nga’atinax a rokin, ta yen no kate ne o ƈiƴ oxe a yenna.

⁷We mbogeerna no gimu we sax, paax rek a mbarun o andit, ndax bugkaand o jeeraa mbaat ta yenaa no pog ke no ƈiƴ oxe.

⁸Diidimle we no mbokatax ne no gimu we itam, wiin gore’u a mbaru o ndef, too a mbañ o saq yememaar mbaat da yeraa a yer a maamu mbaat da mbaaƭaa xaaliis, boo a ndok no calel kaa o leng a andeerna.

⁹Fo yiif jeejooxeer dara, kaa mbar o ndamoox no ngim onqe da mbeeñleena.

¹⁰Fat a eetel o ƭeetloox, soo a sogkeel o ƥek no calel den, yaam ndik o leng a jeg kaa ta ɓanjitna a den.

¹¹Neene a waru o refit itam no rew diidimle we. Mbaree o ƥanjaa lakas we. Fat a ngore, a ƥuuɓ, a mbaagel o ngooloox no kuu ta refna ref.

¹²Diidimle we no mbokatax ne no gimu we, oxuu refna teen kaa war o dam no teem o leng soom, a ɗoxaa xa ƥeem fo mbind um fop no cofel,

¹³yaam we na mbi’aa calel den ne ta waritna, xan a niwel, too me da ndoonkeel, o mbiñ o niwe a refkaa. Keene, xan a tax itam da nan-gilooxeel a paax, yaa da layaa kaa jofna no ngim na Kiristaa Yeesu.

¹⁴Kaam bindang keene, too yaakaaraa yee ndiiki o ga’aam.

¹⁵Kaa koy, um waagangee o ñof o gar, xan o andat ne o kiin a warna o ñoowtaa no ƥasil ne Roog. Ƥasil neene refu mbokatax ne no we ngimna na Roog fa ñoow jok fee, a ref itam a toodook ale jaƭna ndigil ne.

¹⁶Kunpa fee no reef a Roog tig maak oo: Roog kaa xawoox, a ref o kiin. Yiif le Roog a lalta yee a jofa, malaaka ke a nga’in, ta waare’el adna fa muum. Mayu na adna fee a ngimaan, cinj kaaga, ta yoɗel, a sipel kam o ndam um.