Read NQAARIIT NE ROOG 1 Timote 4 Bible Online

1 Timote 4 - NQAARIIT NE ROOG bible

1 Timote 4

¹Kaa koy, Yiif le Roog kaa layaa a qool qac ee no ñaal palakaand ke xan leng-leng a mbes o ngim onqe a cinj, a saaƭoox na yiif a naanaxir, a ndeefaa a cangin cini.

²Xan a ndeɓoox no jaajangin yememaar maamaaɓ we na mo’noorkaa a den. Jaajangin weene koy, a yiif den kaa nqon, nen kaa doxteena njelem saasu.

³Kaa ngeblaa yee dolnirel waree, a layaa yee ba o leng a ñaam kene mbaat kaana. Kaa koy, ñaamel keene, Roog saku a den, ndax gimu we andna ndigil ne a ñaam a den fo o ngidim.

⁴Ke Roog a sakna fop a faaxa, too dara waraand o diimb, yaa ta jangeena fo o ngidim,

⁵yaam fa lay Roog fo a qeƭ na tedlandaa fop.

⁶Boo layoona fog we keene fop, xan o ref o caajal o paax na Kiristaa Yeesu, o caajal oxaa na ñoowtaa fa lay fee no ngim onqe, refna a cangin a paax ale o reefaa.

⁷Ba o reef muk koy a nax a koɓong ake nguutatirna fo o ngim onqe. Foƭtooxi no reef a Roog,

⁸yaam a poƭtax cer a jega o njiriiñ ndaa mayee. O reef a Roog o mat, kaa jiriiñ no fop. Kaa fof ndegit ne no ñoow oleeke sax sax fo no ñoow ole na garaa.

⁹Keene koy, fa lay fa mbooru faa deyeena o jaɓ oo.

¹⁰Andaa koy ee kaa i njalaa, ngomreel, yaam ne i ndoonna yaakaar in na Roog fa ñoow jok fee. O ten o mat refu o Muumucil no wiin we fop, a moƴin o ref koy sax no we ngimna.

¹¹Regdinooxi a ƭelem akeene, too jangin a den.

¹²Ba o leng a yaftong ndeƥandoong. Fat o ref o ɗeendoor no we ngimna, ta ref na fa lay of mbaat no ñoowooƭ of mbaat no mbeq of mbaat no ngim of mbaat no qoolel of.

¹³Naagi o jangaa a maak a Pind a Tedu ke, fañ o waas, jokaa lakas we, jangnaa boo yaa um garkaa.

¹⁴Ba o yapatil ci’it ne doxnee’oona, too o daawtin na pexey we na njo’tanaa a Roog, a soƥ maak we no mbokatax ne no gimu we a ndoon xa ƥay den took xoox of, a nqeɗanang.

¹⁵Dami no keene a paax, saaƭoox na den, ndax a koorgoorlax of a woor fop.

¹⁶Yetooxi a xoox of fo a cangin of, dami no keene, fañ o waas, yaam o fi’angaan, xan o muc, mucil we na nan-gilooxang.