Read NQAARIIT NE ROOG 2 Timote 1 Bible Online

2 Timote 1 - NQAARIIT NE ROOG bible

2 Timote 1

¹Mi Pool, kaam ref apootar Kiristaa Yeesu, ne Roog a bugtuuna, ndax um yegnit o ñoow ole regteena, too ta ref na Kiristaa Yeesu.

²Mi na bindang, wo Timote fee o ƥees onqe fexuuma bo: Yaasam Roog Faap fee fo o Yaal in Kiristaa Yeesu a ci’ong yirmande fa jam, a njeg o liir na wo!

³Ñaal fo o yeng kaam wetandooxang na qeƭ es. Ten taxu itam, gidmaam a Roog fee daan es a ndagooxoogna, too mi itam um dagooxan ndiiki fo yiif dalu.

⁴Wetandooxaam itam xa kooniit of, too a taxa boo um bugong o doon a ngid, xeeñ es a waag o may fo o ɗaay.

⁵Boo ndiik, weectiim o ngim o ndiindigil onqe refna na wo. O ngim onqeene a reeƭa na maam of Loyiis, a ref na Eniis fee ya of, too a wooraxam ee oxe na wo itam.

⁶Ten taxu koy, um bug o goorgoorloox, umb ke Roog a ci’oonga a koom alaa doonuuma xa ƥay es took xoox of, xeɗanang.

⁷Ke Yiif le Roog a ci’na a in naagee o riñaa no deyaƭar. Kaa cooxtaa doole fo o mbeq fo o and.

⁸Yaaga koy, ba o sed o seede’aa o Yaal in mbaat yaam mi fee ɓekeena kaso yaam o ten. Geƈnooxi na doole fee Roog a cooxtaa, jaɓ o xij nen a mi, ndax Yegil mbaax ne a jof a paam.

⁹Roog feene muclu a in, a xoy a in ndax i ted, refee koy ee a pi in a njarin. Kaa yuuɓ’un yaaga jamaane jegafulee. Keene koy, kaa inoor na yirmande fee i ndaawitna na Kiristaa Yeesu.

¹⁰Ndiiki, ye Kiristaa Yeesu o Muumucil in a garna na adna, yirmande feene a fadiida. Yeesu kaa ñuf fa nqon, soo a geennit o ñoow fo nqonaƭar Yegil mbaax ne.

¹¹Yegil mbaax neene koy taxu um dodel o baawaare fo apootar fo o caajangin.

¹²Ten taxu, um refat no ƭomu ndiiki, ndaa koy sediim teen dara, yaam andaam no xe sinjuuma o ngim es, too a wooraxam ee o ten waagu o xoxit ke ta doxnaxama boo na bes fa mbalakaand faa.

¹³Gingli no yiif of a ƭelem a ñoow ake daawtoona na mi, geekit a den fo o ngim fo o mbeq onqe refna na Kiristaa Yeesu.

¹⁴Geeki paax ke doxnee’oona, no ndimle nqe no Yiif Tedu le genna na in.

¹⁵Refee andaa yee Aa-asi we fop a mbesaxam a cinj, boo no goor wene: Figel fa Hermosen.

¹⁶Yaasam o Yaal oxe a xayand yirmande um kam mbind Onesifoor. Yaaloortaam no ten a caf a mayu, too kaso fee refuuma fi’iran gaci.

¹⁷Ye ta garna Rom, a dalfooxa o ref no waaƭaxam boo neene a ga’axam.

¹⁸Koo yaasam o Yaal oxe a fi ta daaw yirmande Roog na bes fa mbalakaand faa. O leng moƴirang o and ne ta dimle’taxama ye um refaa Efees.