Read NQAARIIT NE ROOG 2 Timote 3 Bible Online

2 Timote 3 - NQAARIIT NE ROOG bible

2 Timote 3

¹Fat o and ee ñaal palakaand ke xan a yoonit coono ƭomu.

²Xan wiin we a ƈufanaa a qoox den, xaaliis rek a ref xaariit den, da ndoon a qoox den maa da mbadeerna, a nga’atinoox, a mbenaa a Roog, a mbañ o nanan we ndimna a den, a ndef giñ-a-weec. Xan a ndef waa mbugeerna a ƭat Roog,

³a ñak o liir, a mbañ o mbaasantaa, a ƥanjaa lakas we. Mbaagkee o ngarin a qoox den, a yedin, a mbañ ke faaxna.

⁴Wiin we no ñaal palakaand ke xan a ndef taatas yaakaar itam, a mat a qeeñ, o mbeq den fop a jagin na qoox den, baneex a moƴan a den a Roog.

⁵Xan a ne’ooxaa reereef a ƭat Roog, ndaa njaɓkee ke refna doole o reef a Roog. Yufi wiin nandu naaga!

⁶A jega na den waa na ndokaa kam pind ke, a ƭooqlooxaa rew we yooɓna naxel, pakaad den a mbiiqilna, a yuxum a pagkatar a maƥ a den.

⁷Rew weene na baaƭ a ƭat a qas a ngenu, ndaa andkee muk ndigil ne.

⁸Ne Yanes fa Yambres a mbañit’ina a Moyiis, wiin weene a mbañitkaa ndigil ne, yaam kaa nqon a yiif, too o ngim den refee tus.

⁹Kaa koy, a koorgoorlax den jofkee mbaambir, yaam no miñeer xan fop a nga ee no ƭof a ndefu, ne lakas we a nga’it’ina yee Yanes fa Yambres ndeeƭee fa sagu den.

¹⁰Wo o mat, reefaa a cangin es fo a ñaaƈooƭ es, ref o paar o nand es. Andaa itam o ngim es fo o muñ es fo o mbeq es fo o saƭkel es

¹¹fo ke um dooneel yaam o ngim onqe fo coono ke mi. Coono kum xetteerum Ancook mbaat Ikooñum mbaat Listeer? Ñagadil kum jaɓeerum o sufoox? Kaa koy, no kuu refna teen o Yaal oxe a muclaxam.

¹²We mbugna o ñoow o ñoow o jofu tigi na Kiristaa Yeesu fop, xan a ñagadilel.

¹³Soxodu we fo fan we koy kaa mbugko moƴ o loofaa na bakaad, a mo, a mo’andaa lakas we.

¹⁴Wo o mat, dami no ke jangnee’oona, too and ee saƭku yoo, yaam andaa no we jangtanoona:

¹⁵No ndeƥandoong of andto a Pind a Tedu ke. Den mbaagong o coox o and ole na ɓisaa na muc na pexey o ngim na Kiristaa Yeesu.

¹⁶Roog bindnooru a Pind a Tedu ke fop, too bind luu refna teen a jega o njiriiñ no ke ta jangnaa. Kaa soqaa, a yaraa, a jangnaa o cofel itam,

¹⁷ndax o kiin Roog oxe a dey, too a jofnoox na pi a paax.