Read NQAARIIT NE ROOG Tiit 2 Bible Online

Tiit 2 - NQAARIIT NE ROOG bible

Tiit 2

¹Wo o mat, fat ke o jangnaa a dak na cangin a ñoow jok ale.

²Jangni a koorgi ke da ƥuuɓ, a njar o niwel, a mbod na pi den, a saq o ngim o nqoolu, a njeg o mbeq, a ndef wiin muñu.

³Jangni itam a nogoy ake da lalit o tedel no ñoow den, a mbañ o ƥanjaa lakas we, a yer a fañ o adin a den. Kaa mbar o njangnaa moxolaare teɓ ke paaxu,

⁴ndax da mbexik gor den fo xa ƥiy den.

⁵Fat a njangin a den itam da ndamoox, a ndam no gor den soom, a mbi’aa calel ke no mbind ne, a mbaax, a nanan gor den, ndax fa lay fee Roog wenkaand.

⁶Maƭooxi mboƥ ngoor ne itam da mbañ o ngupal,

⁷soo wo fa xoox of, o refan a den o ɗeendoor na pi a paax no kuu ta refna ref, jangnaa ta xool, a jeg wargal.

⁸Fat fa lay of a xool, a ñak ƥanjel, ndax fañ we a sed, yaam a ñak kaa da njeertikna a in.

⁹Jangni faɗ we da nanan yaal pind den, a ƭoftaa o mbi ke da mbugna no kuu ta refna ref, a mbañ o kalatiraa fa den,

¹⁰mbaat da nguuɗaa a den. Kaa mbar o lalit ngor tigi, ndax no kuu refna, a cangin ale Roog o Muumucil in a niwel.

¹¹Yirmande fee Roog a feeñle, ndax ta ref a cur a muc no wiin we fop.

¹²Kaa jangnaa a in, i mbaas njofaƭar fo a yuxum tig adna. Kaa jangnaa a in itam, i mbañ o ngupal, ñoowaa no cofel fo no gon Roog na jamaane fee ndiiki,

¹³yaa i cungaa ke i yaakaaraa, ta ref yaa o ndam onqe na Roog fa maak fee fo o Muumucil in Yeesu Kiristaa a feeñkaa.

¹⁴Ten feene o mat wuusu o ñis um, ndax ta wat a in no ndoƭ kuu ndefna, a fi a in xeet um, xeet faa ta kesna, ten fa xoox um, da mbosoox o mbi’aa paax.

¹⁵Jangni keene, ɗofit da njof mbaambir. Lalti a ƭat itam fa sañ-sañ tigi. Ba o leng a yafong.