Read NQAARIIT NE ROOG Filemon 1 Bible Online

Filemon 1 - NQAARIIT NE ROOG bible

Filemon 1

¹Mi Pool fee jengeena yaam Kiristaa Yeesu fa Timote fee o pog in, na mbindang o leetar oleeke. Wo Filemon fee fexuuma fex, too ref o yoon in no calel ke,

²in we simnang, wo fo o cigeen in Afiya fa Arkip fee o yoon in no ke i ngomreel yaam o ngim onqe, simnaa itam mbokatax ne no gimu we refna no mbind of.

³Yaasam Roog Faap in fo o Yaal oxe Yeesu Kiristaa a ci a nuun yirmande fa jam!

⁴Kaam gen no gidmaa a Roog kili, too wetandooxang a mbanuu um xeɗaa.

⁵Gon of a jootiida boo me mi yaam ne fexoona tedu we fop fo ne gimtoona no Yaal oxe Yeesu.

⁶Kaam xeɗaa a Roog, ndax o fog ole fokatoonga fa in no ngim onqe a rim o and ole moƴna no paax ke i njegna no ñoow in fop fa Kiristaa.

⁷O pog es, o mbeq of a ɗaaynooraxam lool, too a saƭakinaxam, yaam na wo, xeeñ le no tedu we a daltu.

⁸Andaam ee jegaam sañ-sañ o heblong na pexey Kiristaa ke waroona o fi,

⁹ndaa ke moƴanaxama koy, um xeɗong no mbeq. Mi Pool, ke refuuma ref o nogoy fop oo, soo doon teen ref oxaa jengeena yaam Kiristaa Yeesu,

¹⁰mexe xeɗooxanang a Onesiim. O ƥees oo na Kiristaa, yaam meeke kam kaso fee, faap um refatum no ngim onqe.

¹¹Andaa yee yaaga, jegan’irang o njiriiñ, ndaa ndiiki a jegata o njiriiñ na mi fo na wo.

¹²Mexe nomtiidang o ten ndiiki, ten fee refatna genwal es.

¹³Bug’aanum o geek paam es, ta yungataxam kam kaso fee ɓekeema yaam Yegil mbaax ne, ndax ta fodanaam na seek of.

¹⁴Kaa koy, bug’iim o fi tus, too yooniro teen. Bugiroong o ser o fi’anaam paax, a refangee kaa felong.

¹⁵Xeƈa koy, Onesiim a xaajoox’a fa wo o ngap, ndax a nomtooxiidangaa, a refat fa wo boo faw.

¹⁶Yaam ndiiki, refatee o paɗ soom, ndaa oxaa hupna o paɗ. O pog of o paax oo na Kiristaa. O pog es o paax oo itam, ndaa a waraan o moƴ o ref na wo, yaam ne nu andirna yaaga, ndoon teen mbogat no Yaal oxe.

¹⁷Yaaga boog, o humoorangaa fa mi nqaariit, fat o dalnitin ne dalnitkoogaxamoona.

¹⁸A soƥangaa koy ee kaa tooñong mbaat ta saqanong tig, fat a ref o lad es.

¹⁹O ɓay es o mat um bindtang xa ƭelem axene: «Mi Pool o mat layun, too xam rabdin.» Mi o mat oo, waag’aaxong o lay ee saqanaxamo haq, ta ref o ñoow of.

²⁰Ii, o pog es, mexe xeɗang o ci’aam, um daawit keene na wo yaam o Yaal oxe, too o dalin xeeñ es na Kiristaa.

²¹Keene fop koy, o yaakaarong soom taxu um bindang o ten, yaam andaam ee xan o fi ke xeɗoonga boo fi kaa hupatinuuna sax.

²²Mexe xeɗang itam o jagandanaam maa daluuma, yaam yaakaaraam ee xan Roog a jaɓ a qeƭ nuun, boo um waag o soƥiid a nuun.

²³Epafaras, o yoon es oxe jengeena yaam Kiristaa Yeesu itam, oxe simnang.

²⁴Mark fa Aristark fa Demas fa Lik, we ndefna yoon es no calel ke, den oo, owe simnang itam.

²⁵Kaam ee yaasam yirmande fee no Yaal oxe Yeesu Kiristaa a ref fo a yiif nuun!