Read NQAARIIT NE ROOG Hebre 1 Bible Online

Hebre 1 - NQAARIIT NE ROOG bible

Hebre 1

¹Yaa fa yaaga, Roog a lay’a fo daan waa in[1] a caf a mayu fo na xa qos xa mayu na pexey duleer waa,

²ndaa na pe akene, na ne’eel a paktaand ake, a laya fa in na pexey o Ƥeem. No ten Roog a saktu adna fee, too o ten Roog a jilu, ndax ta jeg fop.

³O ten refu o ɗeendoor ole na feeñlaa o ndam onqe Roog. O ten rek laltu ke Roog a refna deŋ, a saytoorit itam ke sakeena fop fa lay fa njegu doole fee ten. Cinj ye ta xoolandna wiin we no pakaad den, a reta na asamaan, a moof na ñamaak Roog fee refna doole fa mbagkatar.

⁴O Ƥeenqe Roog a hupooda malaaka boo ten taxu Roog a cooxin gon laa hupna a kon ake den o njiriiñ,

⁵yaam Roog mosee o lay fa leng no malaaka keene ne ta bindteena yee: «Wo refu o Ƥees, xaye mi rimong.» Roog mosee o lay itam no kaa jofna na malaaka ne ta bindteena yee: «Xam refanin Faap, soo ta refanaam o Ƥiy.»

⁶Kaa koy, na waxtu fee ta luliidna a Taaw um kam adna fee, Roog a laya yee: «Malaaka ke Roog fop a mbaraan o mbaɗoox.»

⁷Keeke refu ke Roog a layna no malaaka ke: «Roog kaa fi’aa malaaka um nqeñ, soo dag we ten, ta fi a den ƈulfaan fiɗel.»

⁸Kaa koy, no ke jofna no Ƥeenqe, Roog a laya a qoolu yee: «Gamb no maad le wo de Roog, xan a ref boo faw. O cofel rek o maadooritkaa maat ne wo.

⁹Cofu soom bugo, too sibaa paaxeer, ten taxu Roog fee refna Roog of, a ɗuumaang diwliin fa ndodir, a mayƭandong fo o ɗaay ye ta jiloonga a ndeer no gend of.»

¹⁰A layahina yee: «O Yaal oxe, no mberaand naa wo saku lanq ke, too wo bindtu asamaan xa ƥay of.

¹¹Den o mat xan a mbaaf, ndaa wo koy, boo faw o refkaa. Den fop xan a siɗoox nen ñirax.

¹²Xan o dor a den nen pay, too xan a mburi nen toki. Wo o mat, o leng kut oxe o refkaa ref, faafkiro muk.»

¹³Roog mosee o lay malaaka fa leng ee: «Moofi na ñamaak es, boo yaa fi’uuma fañ we wo me o dakaa.»

¹⁴Xar malaaka ke a ndefu? Den fop a yiif akaa na mbaɗooxaa a Roog a ndefu, ta lulaa a den ndax da ƥisaa o ndimle me no we na ndaawkaa a muc ale.