Read NQAARIIT NE ROOG Hebre 11 Bible Online

Hebre 11 - NQAARIIT NE ROOG bible

Hebre 11

¹O ngim kaa ref ke na woornaa o kiin yaakaar ne ta jegna, a andnooran itam ee ke jegna too ga’iran ndigil kak oo.

²Roog a jaɓ’a daan waa yaam o ngim den.

³No ngim onqe i andtu yee Roog saku adna fee na pexey fa lay um, a tax ke na ga’eel a sutoor no ke waagaandeena o ga.

⁴O ngim o mat tax’u Abel a ɓoxot a Roog sadax faa moƴna fee Kayin. Roog a ɗeetaan nen o cofu yaam o ngim um, too Roog fa xoox um a jaɓa ci’it um. Abel a xona, ndaa o ngim um a taxa ta maad o layaa.

⁵O ngim tax’u Henok a yoɗel, a ret paam Roog, too reefee na fa nqon. Cinj kaaga, o leng ga’atiran. Roog a seede’anaan ee a fel’aan yaaga yoɗafuliran.

⁶O leng waagee o fel a Roog, too jegee o ngim. Yaaga boog, oxuu na mataa a Roog, a wara o gim ee Roog a jega, too kaa rabdaa we na mbaaƭan.

⁷O ngim tax’u Nowe a nanan a Roog soo a daaƴ a kaal ale mucluuna, ten fo ƥasil um, cinj ye ta daawna a maƭax Roog no ke war’ina o xew, too ga’afulaand. O ngim um hate’nooru adna fee soo a tax Roog a ɗeetin nen o cofu.

⁸O ngim tax’u Abraham a jaaɓ o xoy ole Roog, a ret no saax jan le Roog a reg’uuna. Naaga, Abraham a reta, too andee me ta hakkaa.

⁹O ngim tax’u ta jaɓ o ñoowaa nen o gataakoon no saax laa Roog a reg’uuna. Kam ƭiif a genoogu nen a Isaak fa Yakoob we ndaaw’ina ndegit leng neene na Roog.

¹⁰Abraham kaa cungoogu teeru faa sinjeena no saƭku. Teeru feene koy, Roog fiisun, too o ten o mat jaloodun.

¹¹O ngim o mat tax’u Saara a refat yaay, ke ta faaf’ina fa ndim fop oo. Kaa koy, a woor’aan ee xan Roog a fadin a tegit um.

¹²Neene o mat xa taan xa maytu nen xa qoor axe na asamaan fo nen pep lanq na ƥeeraamb o maag a ndimte na pexey o koor o leng kut, oxaa mat’atna fa nqon bo.

¹³Wiin weene fop a nqona kam o ngim onqe. Ndaawee paax ke Roog a reg’ina a den. Den fa qoox den sax a laya yee genar fo waa laqooxiidna na adna feeke a ndefu. Kaa ƈookoogu paax keene koƭu, soo a simnaa a den.

¹⁴We na laytaa neene koy, kaa laltaa a qool qac ee waa na mbaaƭaa mbaafaap a ndefu.

¹⁵Boo saax le da inoorna a sooɓ’ina a den, yaaga a njegkooga o daaw olaa da nqaaditna.

¹⁶Kaa koy, no ndigil, kaa yaakaaroogu mbaafaap naa moƴna o faax, ta ref ne refna na asamaan. Ten taxu, Roog naagee o jegaa gaci fa leng yaa ta xoyeena Roog fee den, yaam o ten fa xoox um o mat jagandanu a den teeru feene.

¹⁷O ngim tax’u Abraham a ɓoxot a Isaak fee o ƥeem nen sadax, ye Roog a ɗeetlooxan. Abraham feene o mat, Roog a coox’u ndegit ne, ndaa yaqanee ta fapooxan o ƥiy o leng kut onqe ta jeg’ina, ndax ta ɓoxotin nen sadax.

¹⁸Roog toox de a daaw’a o lay ee: «Na Isaak o jegitkaa xa taan axe regoonga.»

¹⁹Abraham a xalaata yee Roog a jega sañ-sañ faa ta xontooxnooritna oxaa xonna. Neene, Abraham a daawatin’a a Isaak nen o qontooxu.

²⁰O ngim tax’u Isaak a coox a Yakoob fa Esawu barke fee heloorna fo ke refna mbaambir den.

²¹O ngim tax’u Yakoob a barke oxuu refna na xa ƥiy xa ƭaq axe Yoseef, soo a xonkaa. Kaa jokandoox’u no loq um, a faɗoox a Roog.

²²O ngim tax’u ye Yoseef a helkaa fo xon, ta yegnit waxtu fee Ii-isra’el we a sutooxkaa no saax laa Misira, soo a lay itam ne saŋaŋaar um a gasitkeel a cinj fa nqon um.

²³O ngim tax’u we ndim’ina a Moyiis a ƭasnin boo a qool a tadak a cinj ye ta ñooteena. A nga’a yee o nqeq o mosu a reeƭu. Neene, a saɗ’a o mbañ o nanan ke o maad oxe a hebilna.

²⁴O ngim tax’u ye Moyiis a maakna jaɓ’ee ɗeetel nen o ƥiy no ƥiy o ndew onqe na Firawon fee o maad Misira.

²⁵Fog no ñagadil ke xeet fee Roog a ñagadiloogeena moƴan’un o baneexooxaa na bakaad boo a pe a leng-leng.

²⁶Jeerel nen a Kiristaa fee o Muumucil oxe regteena, hupu no ten o njiriiñ ee kalal ke ndefna kam Misira fop, yaam kaa doon’u a kid um took tabid ke na ngaraa.

²⁷O ngim tax’u Moyiis a sutoox saax laa Misira, too diid’ee fuux le no maad oxe. Kaa naag’u diŋ a saƭik wee ndax kaa ɗeetoogu oxe waagaandeena o ga.

²⁸O ngim tax’u Moyiis a dalin a Colandax ale, soo a hebil fo’oy le a ɗuumel took begax ke, ndax malaaka fee na fa nqon fee warkee taaw ke no Ii-isra’el we.

²⁹O ngim tax’u Ii-isra’el we a nqaañ, a ñaaƴaa kam o Maag o yeeq olaa, nand’atna nen lanq beeru. Miimisira we yoo a ndeta a njeemik, a mek den fop.

³⁰O ngim tax’u saŋe ne Yeriko a jiƭtoox a cinj ye Ii-isra’el we a mbiduuna a caf ɓetaa ƭaq.

³¹O ngim tax’u boo a caga laa ne’’eena Rahab xonandoor’ee fo we nanaƭar’ina a Roog, yaam kaa dalin’u a paax we ngorooxiid’ina teeru feene.

³²Xar um ɓaatkaa o lay koy? Ndax xan um jeg o daaw olaa laytuuma kaa jofna na Gedeyon fa Barak fa Samson fa Yefta fa Dawid fa Sami’el fo no duleer lakas we?

³³O ngim tax’u weene a ngef a saax, a mbi’aa ke jofna, too a ndaaw’a ke Roog a regit’ina. A muɓnoorooga cogoy itam.

³⁴A ñufooga xa ñaay xa cegu doole, too a nqox’a laƥ. Ke da ndeeƭna ndeeƭ neewu doole fop oo, a njegnoor’e doole, a ndefat xiixire say, boo a mbaag o maaf xiixire mayu.

³⁵O ngim tax’u rew a nga’aa xon den a nqontooxnooreel, soo a ƥoxoteel a den. Lakas we o mat mbug’ee o mbatel. A njaɓa o ñagadileel boo a nqon, ndax da nqontooxnoorel, boo a mbaag o njeg o ñoow ole moƴna.

³⁶Lakas o mat a njaɓa o ñawle’eel, a nqawel xa cap, boo leng-leng a njengel, soo a ƥekel kam kaso.

³⁷Leng-leng waana itam a njaɓ o mbartel a kac, lakas koy a mbartel a si mbaat laƥ. Kaa njoqooyooxoogu o mbiñ fo o mbiñ, a ndokoox ƭool paal mbaat pambe, a ndef fo ndool, a ngen no tooñeel, a ñagadileel.

³⁸Adna fee kaa jomb’u wiin weene, da ngen no njoqooyooxaa kam a koƥ-a-ƥor ale, a ñaaƴaa took xa coong axe, a ngenaa kam luf ke fo kam qanq ke.

³⁹Roog a jaɓ’a wiin weene fop yaam o ngim den. Kaa koy, ndaaw’ee ke ta regit’ina.

⁴⁰Roog koy, a waajana a in kaa moƴna. Ten taxu, mbar’ee o mbad no ñak-sik, too i mbogee teen.