Read NQAARIIT NE ROOG Hebre 12 Bible Online

Hebre 12 - NQAARIIT NE ROOG bible

Hebre 12

¹Faan maak leene no weene ngimna kaa mbid a in o kurul-keƥ, a ndef seede no ngim den mbaambir in. Ten taxu, kaa i mbar o ndoxodoox ndoq meɗu ne na yaqanaa a in a ñaaƈ, mbaas itam bakaad fee yooɓna o dik a in. Fat i ngen no ƈufaa ne waritna no ndaƭatir ne i ndefitna.

²Fat a kid in a ngaan na Yeesu fee geeninna o ngim in no kaa xotitna no mberaandoong naa boo no muukandoong naa. A softa o ɗaay ole ta geekan’eena fa nqon took a kurwaa, too ɗeetee gaci fee refna teen. Ndiiki koy, oxaa moofa na ñamaak gamb no maad le Roog.

³Ƥekyo a yiif nuun no ten, ƭeet ne ta jaɓ’ina o roxondoorit ne baabakaad we a tooñtuuna, yaam ndik nu ñak yaakaar, nomtoox a cinj.

⁴Yaam kam siiknoor ne nuun fa bakaad fee, nu maafrafulaand boo mbug o nqon.

⁵Ndax kaa nu mbeecit a ƭelem akeeke Roog a saƭakinitna a nuun, ye ta layna yee xa ƥeem nu ndefu? Kaa tee: «O ƥees, ba o damit caaxaan ne Roog a yartang, too ba o ñak yaakaar yaa ta xasanang.

⁶Yaam o Yaal oxe kaa yaraa oxe ta fexna, too kaa naƭtaa itam oxe ta fi’na o ƥeem.»

⁷Njaɓyo coono ke nuun nen fa yar faa inoorna na faap. Mee ndax coono keene kaa lalit ee Roog kaa fi a nuun nen xa ƥeem. Ndax a jega sax o ƥiy onqaa faap um a yarkeerna?

⁸Boo nu yartaandeena ne xa ƥiy axe ten a yarteena, yaaga nu ndefee xa ƥeem tigi, too nu inooree no ten ŋaƈit.

⁹Mee ndax i njega paap kaa na yaraa a in na adna feeke, too kaa i niwaa a den. Xar na taxkaa boog i nanankee a Faap in fee refna na asamaan, ndax i njeg o ñoow.

¹⁰Paap ke in kaa yaraa a in no nqe i mbarna o ñoow meeke, yaa da ƭeetna boo ta jofoox a den, ndaa Roog o mat kaa yaraa a in yaam jam in, ndax i njeg a las no tedel um.

¹¹Boo i yareel koy, kaa nandaa a in na waxtu faaga sax nen naqad, naagee o nandaa a in muk nen o ɗaay. Kaa koy, no mbaambir naa, we njagandan’eena fa yar feene, a naanga o nqottaa teen jam fo o cofel.

¹²Yaaga boog, fat nu yoɗatin xa ƥay axe nuun yaarna too saƭkand kuɓay ke nuun neewna doole.

¹³Naangyo o ñaaƴaa na ƭat a cofu ke, ndax a caf ale no xe na laƴaa ɓolooxkee ndaa ndax ta wod.

¹⁴Ngoorgoorlooxyo, ndax nu ndef na jam fo wiin we fop, too o ñoow nuun a ted, yaam oxuu o ñoow um a tedeerna, jasnoorkee fo o Yaal oxe.

¹⁵Mbootooxyo boo ba o leng a fes yirmande fee Roog a cinj. Kaam ee ba o leng a ndeer nuun a ref nen ndaxar ndali naa saxna, soo xa tim um a toroxandaa wiin mayu.

¹⁶Ba o leng a ref saasaay, too ba o leng a niwaƭar ke jofna na Roog. Neene Esawu a fi’’u boo a jikoox a las taaw ale ten yaam a put a leng soom.

¹⁷Nu anda yee taa mbaambir, a bug’ata o daaw barke fee faap um, ndaa a xañit’e o ten. Jeg’atee pexey naa ta suptitna ke ta fi’’ina, too xa lool axe ta looloogna ƭax’atee teen dara.

¹⁸Nen a xeet fee Isra’el, nu matiidee o joong ole waraandeena o duq: O joong oleene refu o Joong ole Sinayi, fiɗel um a sumna boo jip, a sisaaƥ, a niɓaan boo tit, a doon teen a undaa,

¹⁹a luuƥaa, soo a layooxaa. Yaa Ii-isra’el we a nanna o ñuxur olaaga, a nqeɗayo a Roog, ndax ƥaatankaand o ɗelem o leng sax no kaaga,

²⁰yaam ngatil’ee kebil nene: «O mbindeef onquu duqna o joong ole, a refangaa muumeen sax, xan a wartel a kac.»

²¹Ke feeñoox’ina no joong olaaga fop kaa saɗarnoox’u, boo Moyiis fa xoox um sax a lay ee: «Kaam diid boo sendaa.»

²²Nuun koy, nu matiida o Joong ole Siyoŋ, matiid teeru fee Roog fa ñoow jok fee, refna Yeerusaleem aa-asamaan, matiid malaaka cuni-cuni. Nu matiida faan ɗaayu

²³fo mbokatax ne no gimu we ndefna taaw ke Roog, a kon den a mbindeena na asamaan. Nu matiida a Roog fee refna o kaahate no wiin we fop, matiid a yiif ake no wiin jofu we ñakna sik.

²⁴Kaam ee, nu matiida a Yeesu fee refna o ndok-a-ndeer onqe no ngiɓoor nqas ne, matiid fo’oy le ten ɓaxeena, too a regaa a nuun kaa moƴna le Abel.

²⁵Yetooxyo boog! Ba nu mbañ o nan-giloox oxe na layaa fa nuun. We mbañ’ina o nan-giloox oxe cooxoogna a den yaaga a maƭax a katu na Roog, ndaɗ’ee a qaw ale. Yaaga boog, i mbaagkee o ndaɗ, yaa i mbesna a cinj oxe fodna took asamaan, a layaa fa in.

²⁶Yaaga, o ñuxur um a yo’na lanq ke. Kaa koy, ndiiki a laya yee: «Jaf leng ahin, xam yo’in lanq ke, yo’in asamaan fee itam.»

²⁷Xa ƭelem axeene ndefna «jaf leng ahin», kaa laltaa yee ke sakeena fop xan a jiƭtoox, a sooƴ, ndax ke waagaandeena o yo’in a sax boo faw.

²⁸Fat i ngidim a Roog boog, yaam i ndaawa maat naa waageerna o yen. Fat i lal a Roog o ngidim onqeene, ten refu i ndagooran naa feluuna. Fat i niwin itam, too njeg no ten caƭar.

²⁹Yaam Roog fee in kat, kaa ref fiɗel laa na raaɓaa.