Read NQAARIIT NE ROOG Hebre 2 Bible Online

Hebre 2 - NQAARIIT NE ROOG bible

Hebre 2

¹Ten taxu i ngela o ndamloox a paax no tigil ke i nanna, ndax i saƭtirkee fa den, soo mo.

²Yaam a soƥangaa yee fa lay fee malaaka a yegnitna a fadnooxa, too tooñ fo nanaƭar nuu refna a ndaawa a qaw alaa da njagitna,

³yaaga nam i ndaɗitkaa a qaw ale Roog, yaa i yaacaanna a muc a podu neene? O Yaal oxe mat o mat eetu o yegnit a muc aleene, soo we nan’uuna a ñoowdand a in o njiriiñ um.

⁴Na waxtu faaga sax Roog a saƭkanda seede den fo xa anddiloor fo comlaand fo xa qos a pi katil akuu ndefna. A lasta itam ci’it ke no Yiif Tedu le ne ta bugitna.

⁵Ten taxu, refee yee malaaka ke Roog a cooxu adna fee na garaa taa mbaambir naa, too i laytan.

⁶Refee naaga. A jega o mbiñ kam a Pind a Tedu ke maa ta layeena a qool qac ee: «Wo Roog, xar o kiin a refu ref, boo tee kaa o moof xalaman? Ndi, xar o ƥiy no kiin a refu, boo tee kaa o moof topatooxan?

⁷Neewnaano o ngap onqaa malaaka ke a ngupuuna, ci’aano o ndam fa tedaanga da ndef nen o ndip no maad,

⁸cooxaano ta maadoox no kuu refna.» Ye ta layeena yee Roog a ci’aan sañ-sañ took no kuu refna, keene a tekta yee no fop a adnun, too tus yoqee. Yaqanee i nga’afulee ndiiki yee fop na sañ-sañ um a ndefu.

⁹I ngorooxa kene de: Yeesu a neewand’e, malaaka ke a ngupin boo o ngap, ndax ta xonan wiin we fop yaam yirmande Roog. Kaa koy, i nga’aan ndiiki ta sagoox o ndam fa tedaanga nen o ndip no maad yaam fa nqon fa ƭomu fee ta xonna.

¹⁰Oxe sakna fop, a jeg fop, a buga o ɓis xa ƥiy xa mayu da mbog no ndam um. Ten taxu ta fi boo o Cofu xe waagna o fadin a muc ale den a ñak sik na pexey coono ke.

¹¹Yeesu fee na tedlandaa wiin we no pakaad den fo we tedlandeena fop, Faap fa leng a mbogu. Ten taxu sedee o xoy a den xa teɓ um,

¹²ye ta layna a qool qac ee: «Xam lambnaa gon of a ndeer no fog es, simatang a ndeer o fog ole no gimu we.»

¹³A ɓaata o lay ee: «Xam doon a koolax es na Roog.» A ɓaat o lay ee: «Mexey fo xa teɓandoong axe Roog a cooxaxama.»

¹⁴Yaaga koy, ne xa teɓandoong axeene a ndefna cer fo fo’oy, Yeesu fa xoox um a refaan nen a den, a fog fa den o mem no kiin. A fi’aan, ndax na pexey fa nqon um ta saŋik o ƈiƴ oxe jegna doole fa nqon.

¹⁵Neene, a wata we ndeeƭna faɗ no ñoow o ñis den fop, yaam a saɗaroogu fa nqon.

¹⁶Refee yee malaaka ke Yeesu a dimle’iidu, ndaa xa taan Abraham.

¹⁷Ten taxu a wara o nandat fo xa teɓ um, ndax ta ref o saasadax o maak den o kore’u, a may fo o paaxel no calel um paam Roog. Kaa fi’in, ndax ta ñuf a qaw ale na xeet fee yaam pakaad den.

¹⁸Me ta refna koy, Yeesu a waaga o dimle we na ƭeetlooxeel, yaam ten fa xoox um a ɗeetloox’e kam coono um.