Read NQAARIIT NE ROOG Hebre 4 Bible Online

Hebre 4 - NQAARIIT NE ROOG bible

Hebre 4

¹Roog a rega a in ee xan i ñootnoox fo ten. Fat i mbootoox a paax boog, yaam ndik o leng na nuun a ga ee rokee na ñootnax aleene.

²Yaam in fop, i nana Yegil mbaax ne, ne waa ndeeƭna na koƥ-a-ƥor alaa a nanit’uuna. A nan’a yegil neene, ndaa jiriiñ’ee a den dara, yaam kaa da nanin, ndaa ngimiran.

³In we ngimna, xan i ndok na ñootnax aleene Roog a layitna yee: «Kam fuux es daaɓooxaam ee: ‹Ndokkee muk me da ñootnooritkoogna fa mi!› » Xa ƭelem axeene a soƥa calel um a mbadnoox yaaga ta sakna adna fee.

⁴A jega maa ta layeena kam a Pind a Tedu ke no kaa farna no ñaal ɓetuu ƭikandeer ne yee: «Roog a ñootnooxa no calel um fop no ñaal ɓetuu ƭikandeer ne.»

⁵Ke doonooxna teen refu ke Roog a layna xatoor ee: «Ndokkee muk me da ñootnooritkoogna fa mi!»

⁶We eetna o nan Yegil mbaax ne ndok’ee na ñootnax aleene, yaam ne da ngim’eerna. Kaa koy, a jega lakas waa ngeekaneena o ndok teen boo fa ndiik.

⁷Ten taxu xa kiid xa mayu a cinj kaaga, Roog a damatina bes. Bes feene koy, «xaye» a ne’e. Roog a laya a reefandin na Dawid, kene i nanna boo ƈut: «Xaye fee xaye, nu nanangaa o ñuxur ole Roog, ba nu ŋaj!»

⁸A soƥ’angaa yee Yosuwe a ɗox’a mboƥ ne Isra’el boo na ñootnax aleene, Roog layitkoogatee kaa farna na bes fa lakas.

⁹Yaaga boog, a ñootnax alaa nandna fo ale Roog no ñaal ɓetuu ƭikandeer ne a maade o geekanaa xeet fee Roog.

¹⁰Oxe rokna me wiin we a mbarna o ñootnoorit fa Roog yaam ne da mbadinna calel den, oxe ñootnooxaa, ne Roog a ñootnooraa no ke ten.

¹¹Fat i njeem fa doole in fop boog ndax i ndok na ñootnax aleene. Fat i mbi boo o kiin oo kiin na in a fañ o nanaƭar ne waa ndeeƭna na koƥ-a-ƥor alaa a nanaƭarit’ina, boo ndokee na ñootnax aleene.

¹²Yaam fa lay fee Roog kaa ñoow too a saƭik. Ten moƴu o weel saamar. Kaa godaa boo a daaw me o laaw fo yiif a nqetna, a suur boo me a kiɓ cer fo yuur a nqetna. Kaa jaqtaa paax fo paaxeer na pug fo na qalaat no kiin.

¹³Jegee muk oxaa waagna o ɗas a Roog. Ke ta sakna fop kaa naag duŋ ee fuc mbaambir a kid um. Xan i njangtooxin ke i mbi’na fop.

¹⁴Fat i saƭik boog no ngim onqe i mbeejlaa, yaam i njega o saasadax o maak oxaa hupna fop. Ten refu Yeesu o Ƥeenqe Roog, o ten oxe ŋaayna boo paam Roog.

¹⁵O saasadax o maak oxe i njegna waagee ñak o xij fa in no neew doole in. O saasadax o maak oxe in a ɗeetlooxe no kuu refna nen a in, ndaa mosee o yen na bakaad.

¹⁶Fat i ngooloox o matiid boog gamb no maad le Roog, me yirmande a refna. Xan i ndaawit teen a baasan, njegit teen yirmande fo o ndimle a mbanuu i soxla’uuna.