Read NQAARIIT NE ROOG Hebre 7 Bible Online

Hebre 7 - NQAARIIT NE ROOG bible

Hebre 7

¹Melkisedek feene reeƭu o maad na teeru faa Saleem fo o saasadax Roog fee Took-ee-took. Yaa Abraham a nomtooxiidaa na xire faa ta raxit’ina maad waa, Melkisedek a dalfooxa o xetik fo ten, soo a barke’in.

²Abraham a cooxaan a seek xarɓaxayandeer ale no ke ta jegiid’ina fop. Gon le Melkisedek kaa eet o tekit ee ‹o maad no cofel›, kaa jolna keene a reeƭa o maad Saleem, tekitna yee ‹o maad jam›.

³O leng andanee a Melkisedek a faap mbaat a yaay mbaat o taan. O rimel um fo fa nqon um laytaand sen kam a Pind a Tedu ke. Kaa nand fo o Ƥeenqe Roog: O saasadax a mosu mos o refaa boo faw.

⁴Ƭeetaqinyo ne ta magnitna, o ten Melkisedek! Abraham sax fee refna o taan o maak oxe in a coox’aan a seek xarɓaxayandeer ale no ke ta xotit’ina na xire faa fop.

⁵Kebil ke Moyiis kaa simit ee we mbogna no kurcala le Lewi, too a ndef saasadax, a mbara o ndaawaa a seek xarɓaxayandeer ale no fop ke xeet fee Isra’el a jegna. Neene, kaa ndaawtan sax no fog den we mbogna no kurcala le Abraham.

⁶Kaa koy, Melkisedek fee fog’eerna no kurcala le Lewi, kaa daawoogu a seek xarɓaxayandeer ale no ke Abraham a jeg’ina, soo a doon teen, a barke oxe daaw’ina a tegit ake Roog.

⁷Oxe na barke’aa hupu oxe na barke’eel.

⁸Xa taan axe Lewi ndefna we na ndaawaa a seek xarɓaxayandeer ale, kaa ndef wiin waa na nqonaa, ndaa oxeene o mat, daaw’ina a las aleene, oxe ñoowaa, ne a Pind a Tedu ke a seede’tuuna.

⁹Ndiiki koy, no ne i mbaaguuna o layit, Lewi fee daawitna na xeet fee Isra’el a seek xarɓaxayandeer ale, o ten fa xoox um a cooxaan a Melkisedek,

¹⁰a reefandin na Abraham. Yaam ke Lewi a rim’afulaandeena fop oo, yaqanee ta ref na fo’oy no taan um Abraham, ye Melkisedek a xetooxiidan.

¹¹Calel no saasadax we no kurcala le Lewi ndeeƭu daax le no kebil ke xeet fee Isra’el a coox’eena. A soƥangaa yee calel no saasadax weene a mbaaga o tax wiin we a ñak sik, yaaga soxla’katee o saasadax o lakas, ne Melkisedek a refit’uuna, too ta guutatir fo saasadax we ndeefna took Aaroon.

¹²Yaam boo andoona yee ne saasadax we a ndeepatiritna kaa suptel, yaaga kebil ke a mbara o suptel itam.

¹³Neene, o Yaal in oxe jegna a ƭelem akeene, no kurcala lakas a fog’u. Jegee o leng oxaa fog’ina no kurcala leene a mos o fi calel no saasadax no sadaxand olaa.

¹⁴Ke woorna refu yee o Yaal in no kurcala le Yudaa a rimte, too Moyiis ne’ee o kurcala leene ye ta layaa kaa farna no saasadax we.

¹⁵Keeke refu ke moƴna o tax keene a xool qac: O saasadax o lakas oxaa nandna fa Melkisedek kaa feeñ.

¹⁶Oxeene koy dodaand a reefandel no kebil no wiin, ndaa kaa dodel na pexey doole fee no ñoow o jegee muukandoong.

¹⁷Mee ndax a Pind a Tedu ke a laya no kaa farna no ten ee: «Xan o ref o saasadax boo faw, ne ta ɗaapit’eena na Melkisedek.»

¹⁸Neene, a ƭat a eetaand alaa a laaf’e. Kaa neew’u doole, too a ñakat o njiriiñ,

¹⁹yaam kebil ke Moyiis mbaagee o tax o leng a ñak sik. Kaa koy, yaakaar ne moƴna a jega, too a taxa i matiid a Roog.

²⁰Kaa hupna keene sax, a jega a taaƥ ale Roog kam fee. Lakas we mbogna na xa taan Lewi a ndefa saasadax, too a taaƥ a nandu neene fogee.

²¹Yeesu o mat, a taaƥ a dodte o saasadax, ye Roog a layuuna yee: «Mi o Yaal oxe, daaɓooxaam, too nomtooxkiim a cinj. Kaam ee: Xan o ref o saasadax boo faw.»

²²Ten taxu Yeesu a ref o ñaas ole woorinna a in ngiɓoor ne moƴna.

²³A ɓaatahina o jeg njektir lakas: Saasadax lakas we kaa may’u, yaam kaa nqonoogu, too mbaag’atee o mbadin calel den.

²⁴Yeesu o mat kaa ñoowaa boo faw, too calel um nen o saasadax refee kaa na ɓoxotkeel o lakas.

²⁵Ten taxu, ndiiki Yeesu a waaga o mucil boo faw we na matiidaa a Roog na pexey um, yaam oxe ñoowaa boo xaye, ndax ta xeɗanaa a den a Roog.

²⁶Yeesu refu boog o saasadax o maak oxe i soxla’na: Kaa fel a Roog, mosee o fi paaxeer leng, too bakaad refee no ten. Roog kaa xaajin fo baabakaad we, soo a ŋaaynin took-ee-took asamaan.

²⁷Yeesu nandee fo saasadax maak lakas we: Soxla’’ee o eet o ɓoxotanaa a xoox um sadax yaam pakaad um, ne’atiim ta fi’an bes oo bes, soo a doonkaa pakaad ke na xeet um. A sadaxta jaf leng kut, ye ta ɓoxotna a xoox um.

²⁸Kebil ke Moyiis, we neewna doole a ndodaa nen saasadax maak. Kaa koy, fa lay fee na taaƥ ale Roog garna cinj kebil ke, kaa dod o Ƥeenqe ñakna sik boo faw nen o saasadax o maak.