Read NQAARIIT NE ROOG Hebre 9 Bible Online

Hebre 9 - NQAARIIT NE ROOG bible

Hebre 9

¹Ngiɓoor eetaand ne a jeg’a bareef no kaa farna na paɗax ale kam Mbind Roog ne na adna fee.

²Ƭiif naa jegna tok ƭik a geenin’e. A ndok a eetaand ale xoyooge o Mbiñ o tedu nqe. Maaga a pagal ale na xa lampa xe fo a taabul ale saqoogna xa kaf puuru xe ƥoxotoogeena a Roog a ndeeƭu.

³Kaltaa mbaƴ ƭikandeer ne, a jeg’a a ndok ale xoyoogeena o Mbiñ onqe moƴna o ted.

⁴A jeg’a maaga o sadaxand ole fi’teena wurus, me cuuraay fee a doxtoogeena, a jeg itam arka ne no ngiɓoor ne laar’eena wurus. Kam arka ne a jeg’a o ƥaxañ wurus olaa yipoogna maan. O samb ole Aaroon fiɗ’ina fo a alfa ƥil ake me fa lay fee no ngiɓoor ne a bind’eena a ndeeƭa teen itam.

⁵Took arka ne a jeg’a pindel yeeyetax qawte wurus kaa yookoogna o afnir-o-fortand ole, a laltaa o magnel ole Roog. A nafir ake den kaa yooroox’u me fo’oy le a wiisoogeena ndax ta ñuf a qaw ale Roog no pakaad ke. Kaa koy, refee yee ndiiki i layitkaa keene fop.

⁶Boo fop a jagandit’eena neene, saasadax we kaa ndokaa kam a ndok a eetaand ale bes fuu refna, ndax da mbadin calel den.

⁷Kaa koy, o saasadax o maak oxe soom na rokaa na ndok a ƭikandeer ale, too jaf leng kut a fi’an no hiid ole. A wara o ɓisloox fo’oy muumeen, ndax ta ɓoxotin a Roog, eetu na xoox um, soo xeet fee a doonoox, yaam pakaad ke da mbi’oogna took o ñak-o-and.

⁸No keene koy, Yiif Tedu le kaa laltaa yee begax ne no Mbiñ onqe moƴna o ted wetooxafulee, feek a ndok a eetaand ale oxe maadaa.

⁹Keene kaa naxooxaa jamaane fee ndiiki. Kaa tekit ee ci’it ke fo sadax muumeen ke na ƥoxoteel a Roog mbaagee o tax xeeñ no xe na faɗooxaa a Roog a ñak sik.

¹⁰Sadax keene, kaa njagin na ñaam ale fo na yer ale fo kaa farna no njap. Kaa ndef kebil kaa ndayna no cer ke, too a mbarel o ndeef, boo na jamaane fee Roog a jagandatinna fop.

¹¹Kaa koy, Kiristaa a gara nen o saasadax o maak oxaa ɓisiidna paax ke mbar’ina o ngar. A fadna calel um no ƭiif naa moƴna o magin, a moƴ o ñak sik. Ƭiif neene koy, o ɓay no kiin jaliran, ta tekit ee fogee na adna fene sakeena.

¹²Ye Kiristaa a rokna no mbiñ onqaa moƴna o ted jaf leng kut, ɓislooxee fo’oy suk fambe mbaat fo’oy o xeel, ndaa fo’oy um sax sax a ɓislooxu, too a wata a in boo faw.

¹³Fo’oy le na suk pambe ke fo le no qoox ke fo ndaw naak doxe le na suuyeel took no wiin we soɓe’na ne a ƭat ale a heblituuna, ke roɗigna no cer den soom a ƥogdaa.

¹⁴A reftangaa neene, nam fo’oy le Kiristaa a moƴitkeerun o waag o fi! Na pexey Yiif le na refkaa boo faw, a ɓoxota a xoox um a Roog nen sadax fa njegee sik. Fo’oy um xan a xooland a qeeñ in na pi a qonu ke, ndax i mbaag o njalan a Roog fa ñoow jok fee.

¹⁵Ten taxu Kiristaa a ref o ndok-a-ndeer onqe no ngiɓoor nqas ne refna a tegdinax, ndax we Roog a xoyna a mbaag o ndaaw paax ke na ndefkaa boo faw, too ta reg’un a den. A mbaagaan o ndaaw, yaam Kiristaa a xona, ndax ta wat wiin we no tooñ ke da mbi’’ina ye da ndefna no ngiɓoor eetaand ne.

¹⁶Muu a tegdinax a jegitna, oxe dalnuuna a wara o xon, soo ta jegkaa.

¹⁷Boo a tegdinax a saƭkaa rek fa nqon a jeg, ndaa feek oxe dalnuuna oxe ñoowaa, waagee o jeg xoox.

¹⁸Ten taxu ngiɓoor eetaand ne fa xoox um waag’ee o saƭik, too fo’oy ɓaxaand.

¹⁹Moyiis kaa eet’u o yegnit kebil ke mbaambir xeet faa fop ne Roog a simtituuna. Cinj kaaga, a janga fo’oy xa qeel fo le na suk pambe ke fa foofi, a fokat a den. Naaga, a janga o naaq isoop, a fokatin fo a ƥiñ mbaal akaa yaxgineena, a suupin teen. Cinj kaaga, a wiisaan took safe le no kebil ke fo took xeet faa fop.

²⁰A laya yee: «Keeke refu fo’oy le no ngiɓoor ne Roog a dalinna, ndax nu nananin.»

²¹Moyiis a wiisa fo’oy laa took Ƭiif ne fo took xa ƥaxañ axaa mbaɗooroogeena itam.

²²No ne kebil ke a laytuuna, fo’oy xoolandoogu o moƴ-o-jaak ole fop. Kaa koy, fo’oy a ɓaxooxangee, a baasan pakaad waagee o jeg.

²³Tig adna ke ndefna nitaale’ir tiindigil ke na asamaan a mbar’e o nqoolandit neene. Yaaga boog, tig tiindigil keene ndefna na asamaan a mbaraan itam, na pexey sadax ke moƴna o mbaax.

²⁴Yaam Kiristaa rokee no Mbind tedu naa o ɓay no kiin a jalna, a ref nitaale’ir no ndiindigil ne. Na asamaan sax sax a roku, ndax ta geenooxan a in ndiiki mbaambir Roog.

²⁵O saasadax o maak oxe kaa rokaa o hiid oluu refna kam o Mbiñ onqe moƴna o ted, a ɓisloox fo’oy muumeen. Kiristaa o mat, rokee taaga a caf a mayu, ndax ta ɓoxot a xoox um.

²⁶A saxit’angaa naaga, yaaga a coono’kooga a caf a mayu no kaa xoxitna yaa adna a sakeena boo xaye. Kaa koy, na pe a paktu ke no camaane ke, jaf leng kut a feeñooxu, a ɓoxot a xoox um nen sadax, ndax ta forit pakaad ke.

²⁷O kiin, jaf leng kut a geekane ndax ta xon. Cinj kaaga, xan hate fee Roog a gar.

²⁸Neene itam, Kiristaa a ɓoxote nen sadax jaf leng kut, ndax ta forit pakaad no wiin mayu. Xan a feeñ jaf ɗikandeer, refee koy ee ndax ta forit pakaad, ndaa ndax ta mucil we ndefna no cungan.