Read NQAARIIT NE ROOG Saak 2 Bible Online

Saak 2 - NQAARIIT NE ROOG bible

Saak 2

¹Fog es, ne nu ngimna no Yaal in Yeesu Kiristaa fee jegna o ndam, ba nu samtirandaa wiin we.

²A jegangaa wiin ɗik waa ngarna no mbokatax nuun, o leng oxe a rokoox boo a qiicaa, a doonoox wurus, o lakas oxe o mat a ref o ndool, a rokoox liir,

³maaga koy, o simin o yaal toki mosu ke, layin ee: «O koor es, moofi na seek a niwnooxu lene», soo lay o ndool onqe yee: «Geenooxi mbaat o moof a lanq».

⁴No wiin ɗik weene, niwaa o leng oxe, xeef o lakas oxe. O naagangaa o fi’taa neene, ndax refiro oxaa na samtaa wiin we? Ndax kaa a qalaat a paaxeer monjee a yiif nuun?

⁵Fog es we fexuuma, nan-gilooxyo a paax: Ndax nu andee yee Roog jilu we adna fee a ƭeetaa nen rool, ndax o ngim den na Yeesu Kiristaa a ref halal den, da njeg maat ne ta regna we mbexuuna?

⁶Ii, soo nuun o mat, nu nqeefaa a den! Ndax refee yee yaal kalal ke na ngetandaa a nuun? Den o mat na ƥisaa a nuun no qel ke no maad we!

⁷Yaal kalal ke itam na layaa paaxeer no gon faax le Yeesu Kiristaa, Roog a ci’na a nuun.

⁸Nu naangangaa o ndeefaa kebil maak ne Roog layna yee: «Fexi o kend of ne fextoona a xoox of» nu mbi’a paax.

⁹Kaa koy, nu naangangaa o samtirandaa wiin we, nuun wey na bakaad, too yaaga, kebil ke owe njambaa a nuun nen waa na ƭapaa a den.

¹⁰A soƥangaa koy sax ee o kiin a fadna kebil ke Roog fop boo ta yoq leng, yaaga a ɗapa ke yoqna fop.

¹¹Yaam Roog fee layna yee: «Seeqkiro» o ten layu lay ee: «Warkiro o kiin.» Yaaga koy, a soƥangaa yee seeqiro, too war o kiin, ɗapaa kebil ke Roog.

¹²Ten taxu, mexe layaa a nuun ee: No ke nu layaa fo ke nu mbi’aa fop, andyo yee xan Roog a hate a nuun a reefandin no kebil ne watna a nuun.

¹³Oxe yirmeerna o kend um, na bes faa na hate faa, Roog yirimkiran itam. Kaa koy, o yirmangaa wiin lakas we, saɗarkiro mbaambir no Kaahate xe.

¹⁴Fog es, o kiin a layangaa yee a gima na Roog, too naagee o fi’aa a pi a paax, ndax kaaga a waagaan o mucil?

¹⁵A soƥangaa yee o pog of no ngim onqe, ta ref o koor mbaat o tew, a ɓaŋde mbaat ta ñak ñaamel,

¹⁶soo o leng na nuun a layin ee: «Reti fa jam, raƭook! Yaasam o jeg ñaamel!» soo a fañin o coox ke ta soxla’na no cer um, xar kaaga a ɗaxu?

¹⁷Neene o mat a reftu no gim na Roog: Oxuu layna yee a gima na Roog, too naagee o fi’aa paax, o ngim um kaa xon.

¹⁸Oxuu na jikooxaa o ngim sang um, o yaal a pi a waaga gar, a layin ee: «Refee kaa o jikooxaa o ngim? Mi koy, a pi a paax saqum. Kaam bug ndiiki o lalaam o ngim of sang um, um laltong o ngim es a pi es.»

¹⁹Gimaa yee Roog fa leng soom jegu. Keene paax oo, ndaa cini ke sax sax a andaan, too a mbitaan.

²⁰Wo soo ref kulfeñ! Andiro sax ee o ngim onqe yooneerna fo a pi kaa xon?

²¹Nam Roog a ɗeetit’u a Abraham fee o taan in nen o cofu? Mee ndax na pi um a reeƭu, ye ta ɓoxotna a Isaak fee o ƥeem took o sadaxand olaa.

²²Ga’aano: O ngim onqe Abraham fo a pi um kaa yoon, too o ngim um onqeene a fadnooxa yaam a pi ake yoonna fo ten.

²³Yaaga boog, ke a Pind a Tedu ke a layna a fadnooxa no kene: Abraham a gima na Roog, too kaaga a taxa Roog a ɗeetin nen o cofu boo a xoyatan xaariit um.

²⁴Fat nu and ee Roog kaa ɗeetaa o kiin nen o cofu na pi um, refee no ngim um soom.

²⁵Mbetandooxyo a caga laa ne’eena Rahab: Yaa wiin waa Isra’el a lul’ina, a ngarna no mbind um, a dimle’’a a den, a lal a den a ƭat a lakas, ndax da ndaɗ. Kaaga ta fi’’ina a taxa Roog a ɗeetin nen o cofu mbaambir um.

²⁶Ten taxu, ne njer njegee ñoot a xonitna, neene a nandu no ngim onqe yooneerna fo a pi. Ten itam kaa xon.