Read NQAARIIT NE ROOG Saak 3 Bible Online

Saak 3 - NQAARIIT NE ROOG bible

Saak 3

¹Fog es, baa mayu na nuun a ndiirooxaa o njangnik fa lay fee Roog, yaam nu anda yee, paam Roog, in we na njangnaa na moƴkaa o ƭomiɗ wiin lakas we hate.

²A caf a mayu kaa i njuumaa, in fop. O kiin a juumangee na fa lay, o kiin tigi yoo. A waaga o dam cer um fop.

³I mbaagaan o ƭeetit nene: O laxaaɓangaa pis, xan a xot me bugoona.

⁴Ƭeetaqinyo itam a kaal a maak ake: A kaal akeene a magna lool, ndaa a jega o feɗir o dutuuñ olaa andoona yee nqeñ ne a ɗomangaa sax, a kaal ale a xot me o ƈuuƴufin oxe a bugna.

⁵Neene a nandu no ɗelem: Ke ta neewna fop oo, a jega doole lool. Ƭeetyo o meldaand, ne ta neewitna rek! Kaa koy, a waaga o dox a koƥ a muum.

⁶Ɗelem nen a fiɗel a nandu, too pakaad ƥor a yipooxu. Kaa heƥandaa fiɗel laa na yaqaa cer no kiin fop. Fiɗel leene, na fiɗel laa ñufkeerna a hataa.

⁷Wiin we a mbaaga o ndam kuu refna. A naanga o ndamaa muumeen ke fo tiiƭ ke fo ƥood ke fo liƥ ke itam.

⁸Weene wiin koy, mbaagee o ndam ɗelem den. Ɗelem, tig paaxeer kaa o leng a waageerna o dam oo. Kaa may muut fa daŋat.

⁹Kaa i niwaa o Yaal oxe Faap in fo ɗelem in, ndaa kaa i layanaa wiin lakas we paaxeer fo ɗelem leng le itam. Yaag oo toox de, Roog saku a den no nand um.

¹⁰Fog es, waree o ref naaga. O don o leng kut ole i niwtaa a Roog, soo laytan paaxeer lakas we.

¹¹Ndax foofi fo fel fo foofi fo xanju a naaga o sutooraa na cur a leng?

¹²Fog es, ndun rimkee xa ariƈ, too ariƈ rimkee xa tun. Foofi fo fel hatkee na foofi fo xanju.

¹³O kiin na nuun a jegangaa o and fo yiif, fat a fi a pi a paax, a laltin na pesoorooƭ um a paax, a pi akaa yoonna fo o ɓuuɓ fo o and.

¹⁴Kaa koy, o hañaanangaa lakas we, too xeeñ of mosee, waaƭaa o njiriiñ xoox of soom, yaaga ba o laasoox na tus, too ba o fañ ndigil ne.

¹⁵O jeg-yiif oleene, na adna fee a hatu, too yiif le refna no ten refee Yiif le Roog, yiif jini yoo.

¹⁶Me wiin a siisritaa, a mbaaƭaa o njiriiñ a qoox den soom, tus naagee o xenaa maaga, too itam paaxeer mayu maaga a ngataa.

¹⁷Kaa koy, o jeg-yiif ole hatna na Roog, a guutatira fo oleene. O jeg-yiif olaaga kaa xool, a gartaa jam a ndeer no wiin we, a fod o mbid, a gartaa nanoor, a may yirmande fo a pi a paax. Naagee o samtaa itam too jegee yememaar leng.

¹⁸Oxe bugna jam a ɓaatoox, jam a duufaa a ndeer no lakas we, too a naaga o saxadaa o cofel.