Read NQAARIIT NE ROOG Saak 4 Bible Online

Saak 4 - NQAARIIT NE ROOG bible

Saak 4

¹Maafir ke fo qasir ke a ndeer nuun, mam a inooraa? Oxe inooraa na yuxum ake ngenna no ñoxoraa no cer nuun.

²Kaa nu yaawaa tig oo tig, ndaa nu naangee o ndaawaa a den. Kaa nu yaawaa o kiin boo mbugin o mbar, too tus teen ɓekee a nuun no jeg, ndax a riñaa a nuun no qasir fo a ñoq. Nu naangee o njegaa ke nu mbugna, yaam nu naangiran o nqeɗaa a Roog.

³Nu nqeɗangaa a Roog sax, ndax ta ci a nuun tig, ci’kiran a nuun, yaam a qeƭooƭ nuun faaxee. Kaa nu nqeɗaa ndax nu mbadin a yuxum nuun.

⁴Kaa nu ngore’ee! Ndax nu andee yee oxe fexna tig adna, o pañ Roog oo? O kiin oxuu bugna xaariitoor fo tig adna, a refata o pañ Roog.

⁵Ba nu mboog ee ke a Pind a Tedu ke a layna caaxaan oo. Kaa dee: «Roog bugee lakas a gendir fo Yiif le ta ci’na a in.»

⁶A ci’a a in yirmande faa hupna fop. Kaa nand nen ke layeena kam a Pind a Tedu ke yee: «Roog a faña we na magnandooxaa, ndaa a yirma we neewandooxna.»

⁷Ten taxu, neewandooxyo paam Roog. Mbañyo o ƈiƴ oxe, too xan a riƈatoox a nuun.

⁸Matiidyo me Roog, too xan a matiid a nuun. Nuun baabakaad we, mbaasyo bakaad. Nuun wiin a yiif-a-ƭak, sutyo paaxeer na qeeñ nuun.

⁹Naqadilooxyo yaam pakaad nuun. Ñaawooxyo too lool. Ba nu njalat ndaa loolyo. Ba nu mbelakinooxat ndaa naqadilooxyo.

¹⁰Neewandooxyo mbaambir Roog, ndax ta yoɗ a nuun.

¹¹Fog es, ba nu layanraa paaxeer a ndeer nuun. Oxe na yaqaa ƭool no kend um mbaat ta hate’an, a layana kebil ke Roog paaxeer, a hate’an a den. O hate’angaa kebil ke Roog koy, nananatiro a den, ndaa kaa o fi’ooxanaa a den o kaahate.

¹²Roog soom cooxu wiin we kebil ke. Ten soom jegu hate fee. Ten soom waagu o mucil wiin we. Ten soom waagu o saŋik a den. Wo koy, an foogo yee o ten refo, boo hate’aa o pog of?

¹³Nan-gilooxyo fa lay es, nuun we na layaa yee: «Xaye mbaat o feet xan i ndet na teeru, moof maaga o hiid, njula’aa ndax i njeg xaaliis fa mayu.»

¹⁴Nuun we na laytaa naaga, ndax nu anda ke na xewkaa o feet? Kaa nu ndef nen liim: Njeeƈ ne a xawangaan ta sam.

¹⁵Kaa nu mbar o layaa kañ ee: «A felangaa a Roog» mbaat «Roog a maadnoorangaan a in, xan i mbi kene.»

¹⁶Kaa koy, nu naangee o layaa keene, kaa nu magnandooxaa, niwooxaa na fa lay. Keene faaxee,

¹⁷too o kiin a andangaa ke ta warna o fi, too fi’iran, yaaga a bakaada.