Read NQAARIIT NE ROOG 1 Piyeer 1 Bible Online

1 Piyeer 1 - NQAARIIT NE ROOG bible

1 Piyeer 1

¹Mi Piyeer fee apootar Yeesu Kiristaa na simnaa a nuun. Roog jilu a nuun, nuun we ndefna xa kataakoon xa pictooxu kam xa cegel axeeke: Pont fa Galati fa Kapados fa Asi fa Bitini.

²Roog Faap fee kaa jil a nuun, yaam kaa yuuɓ’un no mberaand naa, ndax nu kesel na pexey Yiif Tedu le, nanan a Yeesu Kiristaa, soo nqoolandtel fo’oy le ten. Yaasam yirmande fa jam a mayƭandel took nuun!

³Yaasam Roog Faap fee no Yaal in Yeesu Kiristaa a simatel! Na yirmande um fa maak, a rimnooratina a in na pexey a qontax ale Yeesu Kiristaa a ndeer no xon we. Yaam o rimel o xas oleene, i njega yaakaar ñoowu

⁴fo lam naa waageerna o sooƴ mbaat ta roɗig mbaat ta ñak o mosel um. Ten o mat nu ngeekane toox de na asamaan.

⁵Yaam na pexey o ngim nuun, Roog kaa saytoortaa a nuun katil um boo yaa nu ndaawkaa a muc ale jagandeena, too a nar o feeñ na jamaane fa mbalakaand fee.

⁶Kaa nu mbelakinooxaa teen, a refangaa sax kaa nu ndef na naqad ndiiki, yaam ne nu mbarna o ndoxondooxaa ƭeetlax pogreer mayu na pe a leng-leng.

⁷Keene waru, yaam wurus fee nayneena na fiɗel sax, xan a sooƴ. O ngim onqe moƴu o jeg wurus fee o njiriiñ. Neene itam a ɗeetlooxe nen a wurus fee, ndax ta lalit ee ndigil oo. A reftangaa neene, xan o ngim nuun a tagasel, a fakel soo a niwel, yaa Yeesu Kiristaa a nomtooxiidkaa.

⁸Nu mbexaan, too nu mosiran o nga. Boo ndiik, nu nga’afuliran, ndaa kaa nu ngimaa no ten, soo mbelakinooxaa fo o ɗaay o maak o jegu o ndam onqaa waagaandeena o lay,

⁹yaam xan nu ndaaw ke refna o rim no ngim nuun, ta ref a muc nuun.

¹⁰Duleer we yaaga yegnitna no kaa farna na yirmande fee nu ngeekaneena, a mbaaƭa soo a ƥaal kaa jofna na muc aleene.

¹¹Kaa mbaaƭoogu maa da nga’itna a mban fo nam ke Yiif le Kiristaa reeƭna na den a lalitna. Yiif leene a yegnita padafuleer no coono ke nar’ina o ndal a Kiristaa fo o ndam onqe na doonooxkaa teen.

¹²Roog a feeñla duleer weene yee den fa qoox den maadkee yegnit padafuleer keene. Nuun we taxna da ndef jaajal no keene o mat na maadkan. Ndiiki koy, Yiif Tedu le inoorna na asamaan a yegna a nuun nduleer neene na pexey no we mbaare’na a nuun Yegil mbaax ne. Malaaka ke sax a mbug’a o and keene.

¹³Ten taxu, njagandooxyo na qalaat nuun, yokoox a paax, too ndoon yaakaar nuun fop na yirmande fee nu ƥisiidkeel, yaa Yeesu Kiristaa a feeñkaa.

¹⁴Nen xa teɓandoong Roog axaa nananuuna, ba nu ndeefan a yaaw ake nu njeg’ina yaaga, ye nu njeg’afuleerna o and.

¹⁵Ne oxe xoyna a nuun a teditna, fat nu ndef wiin tedu kam a pesoorooƭ nuun fop,

¹⁶yaam a binde yee: «Fat nu ted, yaam kaam ted.»

¹⁷Oxe na hate’kaa wiin we fop, oxuu refna no ke ta fi’na, too jegee camit, kaa nu nqoyan «Faap» kam a qeƭ nuun. Ten taxu koy, ñoowyo no saɗar a Roog, no ngap onqe nu maadkaa o ndefaa na adna fee.

¹⁸Nu anda a paax njigand ne nu mbatteena no ñoow kasaara le nu lamitna no daan nuun. Refee koy ee kaa na yaqooxaa nen xaaliis mbaat wurus watu a nuun,

¹⁹ndaa fo’oy fo jegu njiriiñ ole Kiristaa, sadaxteena nen o mbaal o njegee sik fo gak.

²⁰Roog kaa jil’un yaaga adna sakafulaand, soo a feeñlanin a nuun ndiiki na jamaane fa mbalakaand fee.

²¹Ten taxu, na pexey Kiristaa nu ngima na Roog fee xontooxnooruuna a ndeer no xon we, soo a cooxin o ndam onqe, ndax o ngim nuun fo yaakaar nuun a ndoonoox na Roog.

²²Ne nu nananna ndigil ne, nu nqoolanda xa laaw nuun, ndax nu mbex tigi we nu mbogitna o ngim. Mbexiryo a paax boog a ndeer nuun fo xeeñ letu.

²³Kaa nu ndimel o rimel o xas, refee no paap kaa mbarna o nqon, ndaa no ax kaa mbaageerna o nqon. Ax keene ndefu fa lay fa ñoowu fee Roog, na refkaa boo faw.

²⁴Yaam a binde yee: «Cer kuu ndefna kaa nand nen daaƭ, soo o ndam um fop a ref nen piɗ daaƭ. Daaƭ le xan a weer, soo piɗ ke a yen a lanq,

²⁵ndaa fa lay fee no Yaal oxe xan a ref boo faw.» Fa lay feene refu fee nu yegneena no Yegil mbaax ne.