Read NQAARIIT NE ROOG 1 Piyeer 4 Bible Online

1 Piyeer 4 - NQAARIIT NE ROOG bible

1 Piyeer 4

¹Ne Kiristaa a coono’itna no cer ke boog, nuun itam, saƭkityo neene, yaam oxe coono’na no cer um, a ƴutoora fa bakaad.

²Yaaga koy, no ngap onqe yoqna no ñoow nuun, naangyo o ñoowaa no bug ole Roog, ndaa baa ref no ke wiin we a yaawaa.

³Nu miña o ñoowtaa ne gimaƭaru we a mbugtuuna. Yaaga, kaa nu ñaaƴoogu kam caasaay ne fo a yuxum ake, yeraa a yer a maamu, ñaamaa kupu, ndetaa na xa yerand axe fo na xa cuurand pangool axe.

⁴Ndiiki koy, genar nu ndefatu na den, yaam ne nu yoonateerna fa den no late leene, too kaa mbenaa a nuun.

⁵Xan a njangtoox a pi den mbaambir Roog fee na hate’kaa ñoow we fo xon we.

⁶Ten taxu boog, xon we itam a mbaare’el Yegil mbaax ne, ndax cinj ye da ngate’eena nen wiin we no ñoow den, da mbaag o ñoowit yiif le nen a Roog.

⁷Muukandoong ne no kuu refna a matiida. Saqyo boog yiif jagandooxu, soo yetoox, ndax nu mbaag o nqeɗaa.

⁸Eetyo mbexir a paax a ndeer nuun, yaam o mbeq onqe kaa muuraa pakaad mayu.

⁹Naangyo ndalniraa a ndeer nuun kam pind ke nuun, too baa ref fo a cadax.

¹⁰Oxuu refna na nuun kaa ref nen o tag o paax oxaa Roog a doxinna ci’it pogreer. Yaaga koy, fat a dimle’taa lakas we ci’it ne ta daawitna na Roog.

¹¹Nuun waawaare we, fat a ƭelem nuun a njagir fo fa lay fee Roog. Nuun we ndefna diidimle itam, fat nu ndimle’taa fa doole fee Roog a cooxna a nuun, ndax no kuu ta waagna waag o ref, Roog a ɓoxotel o ndam na pexey Yeesu Kiristaa fee jegna o ndam fa katil bo na moos boo moos. Amiini.

¹²Nuun we fexuuma, ba nu njaaxiɗ no nqeen ke mbarna o ndox a nuun, a ndef ƭeetlax kaa ndalna took nuun, boo nu nga’tatin nen kaa genarooxiidna a nuun.

¹³Kaa nu mbar o mbelakinoox kañ, yaam ne nu njegna a las no coono ke Kiristaa, ndax nu may fo o ɗaay itam, yaa o ndam onqe ten a feeñilkeel.

¹⁴Boo nu mbeneena yaam gon le Kiristaa, nu ƭaaya. Yiif le saqna o ndam onqe, refna ref Yiif le Roog, oxey took nuun.

¹⁵Ba o leng na nuun a coono nen o baawar mbaat nen o kuuɗ mbaat nen o piifi paaxeer mbaat nen oxaa na rokaa no kaa a ƭat um a yongeerna.

¹⁶Kaa koy, a soƥangaa yee yaam ne refoona kerceen oo, ba o jeg teen gaci. Naagi o ɓoxotaa a Roog o ndam yaam gon of leene, inoorna no gon Kiristaa.

¹⁷Yaam kaa ref waxtu faa hate fee a xotitkaa no mbind ne Roog. A refangaa yee na in a eetitkaa, xar na refkaa muukandoong no we mbañna o ngim Yegil mbaax ne Roog?

¹⁸Kene refu ke a Pind a Tedu ke a layna: «A soƥangaa yee o cofu xe kaa ɗom o muclel, xar na dalkaa soxodu we fo baabakaad we?»

¹⁹Neene, fat we na coono’aa yaam o bug ole Roog, a ƥoxot xa laaw den o Piibind o kore’u xe, yaa da mbi’aa paax.