Read NQAARIIT NE ROOG 1 Piyeer 5 Bible Online

1 Piyeer 5 - NQAARIIT NE ROOG bible

1 Piyeer 5

¹Mi fee refna o maak, seede coono ke Kiristaa, fog itam no ndam onqe wareena o feeñil, mexe xeɗaa maak gend es we ndefna a ndeer nuun, da ngay o siir ole Roog da ndoxneena. Kaam ee: Baa ref ee nu mbugiran a mbug, ndaa fat a ref ee yaam ta fel a nuun yaam Roog. Baa ref itam no bug teen xaaliis, ndaa fo xeeñ letu.

³Ba nu mbaaƭ maa nu kelfa’itna we nu ndoxneena, ndaa fat nu ndef a lalgand no siir ole.

⁴Nu mbi’angaa keene fop, xan nu ndaaw o ndam onqe nen o ndip o yaqooxkeer, yaa o Kaynaak o maak oxe a feeñkaa.

⁵Neene itam, nuun mbes ke, nananyo maak we. Saqyo nuun fop a neewandax, ta ref nen pay nguloor nuun, yaam «Roog kaa fañaa we na magnandooxaa, a yirmaa we neewandooxna».

⁶Neewandooxyo boog yoora o ɓay o jegu katil ole Roog, ndax ta yoɗ a nuun na waxtu fuu ta buguuna.

⁷Ndiiseenoo kuu waagna o jaaxɗandaa a nuun, yaam ten na teeteelaa a nuun.

⁸Njagandooxyo, kaam ee yetooxyo! O ƈiƴ oxe refna o pañ nuun, kaa widaa nen njogoy nqeexe, a waaƭaa oxaa ta saŋikna.

⁹Nqoxyo o ƈiƴ oxe, saƭik no ngim onqe, too and ee coono leng kut ke ndalu fog gimu we nuun kam adna fee.

¹⁰Roog fee mayna yirmande, xoyu a nuun na Kiristaa, ndax nu mbog no ndam o mbagkeer onqe ten. Roog fa xoox um xan a fap a nuun na Kiristaa, a cinj yaa nu coono’na o ndik, a saƭkand a nuun, a ci a nuun doole, a fi a nuun bo nu mbaagkee o yen.

¹¹Ten jegu katil bo na moos boo moos. Amiini.

¹²Mexe bindaa a nuun a ƭelem a leng-leng akeene no ndimle Silwe fee fi’uuma nen o pog o kore’u, ndax um saƭakin a nuun, soo seede yee keene refu yirmande fa ndigil fee Roog. Saƭikyo a paax no ten!

¹³Mbokatax ne no gimu we Babilon fa Mark fee o ƥees, owe simnaa a nuun.

¹⁴Naangyo o simniraa a ndeer nuun, mboonraa fo o mbeq. Yaasam jam a ref na nuun fop, nuun we ndefna na Kiristaa!