Read NQAARIIT NE ROOG 2 Piyeer 2 Bible Online

2 Piyeer 2 - NQAARIIT NE ROOG bible

2 Piyeer 2

¹No camaane ke mbaafna, a jeg’a duleer maamaaɓ a ndeer xeet fee. Neene itam, xan a jeg a ndeer nuun jaajangin maamaaɓ waa na ƥisiidkaa a cangin a paaxeer akaa na yaqkaa o ñoow ole no wiin we, a nqañaa o Yaal oxe mucilna a den no pakaad den. Yaam ke da mbi’aa fop, a qaw a maak xan a gar took den, a saŋik a den no miñeer.

²Mayu no wiin we xan a ndeef a pesoorooƭ a paaxeer ake den, soo wiin we a layaa paaxeer na ƭat ale no ndigil ne yaam den.

³Yaam ne da yaawaa halal, xan a nax a nuun, a njang ke nu njegna na pexey a ƭelem a naanax. Kaa koy, yaaga boo fa ndiik, hate den oxe ñaaƴaa, too oxe warna o saŋik a den ɗaanee.

⁴Yaam Roog wuusee malaaka ke mbakaadna, ndaa a deɓa a den kam fiɗel laa. Maaga a ngeekkeel kam o niɓaan ole boo no ñaal naa na hate faa.

⁵Roog wuusee wiin we yaaga mbi’oogna pakaad. Nowe soom fee waare’oogna o cofel ole, a yoon fo wiin ɓetuu ɗik lakas, a mucil’u, ye ta saŋikna kam o jaɓ o maak ole wiin we ndeefoogeeruuna.

⁶Roog a hate’a teeru ke Sodoom fa Gomoor, soo a tasit a den fiɗel. Neene, a cooxa we ndeefeeruuna a lalgand ee neene a refitkaa na den itam.

⁷Na jamaane faaga, a mucla a Lot fee reeƭna o koor o cofu, naqadiloox’ina no xeeñ um yaam caasaay ne wiin weene a saq’ina na pesoorooƭ a paaxeer ale den.

⁸O koor o cofu xeene kaa ñoowoogu a ndeer den. Ñaal nuu refna kaa ga’oogu paaxeer ke da mbi’oogna, a nanaa a ƭelem a paaxeer ake den itam. Keene koy a ɗomaan lool, yaam kaa jof’u.

⁹O Yaal oxe a anda ne ta warna o muclit no ƭeetlax ke wiin we na ndeefan, soo wiin jofaƭaru we, ta geek a den, ndax da nqawel na bes faa na hate faa.

¹⁰We na ndeefaa paaxeer ke cer den a yaawaa, Roog a moƴkaa o xaw, den we saɗareerna katil um. Jaajangin maamaaɓ weene mbitee dara. Kaa nduqwaƭar, too saɗaree o mben we njegna o ndam na asamaan sax.

¹¹Kaa koy, malaaka ke fa qoox den ngupna jaajangin weene doole fa katil, mbenee a den mbaambir no Yaal oxe.

¹²Kaa koy, jaajangin weene kaa nand fo muumeen-a-koƥ ke, andoona yee kaa ndimel, ndax da ndamel, soo a mbarel. Kaa mbenaa ke da andeerna. Ten taxu xan a mbartel nen muumeen-a-koƥ.

¹³Neene, xan a ndaaw ndabid njofaƭar den. Kaa njegaa o ɗaay, yaa da ndeefaa a yuxum a paaxeer ake den njoloor o mbuc. A tef den, yaa da ndeerna fa nuun a ñaam fo o naxaa nuun ole na sawarnooraa a den lool, kaa ref gaci.

¹⁴Kaa mbaaƭaa maa da seeqitna soom, too mbaagee o nqij na bakaad muk. Kaa naxaa we xa laaw den a neewna doole. Xeeñ den, no yaawaa xaaliis a genu kili. Ten taxu a qaw ale Roog oxey cay took den.

¹⁵Cinj ye da nqaƴna a ƭat a cofu le a mo’a, soo a ndeef a ƭat ale Balam fee o ƥiy Bewoor, fex’ina o fi paaxeer, ndax ta cooxel xaaliis.

¹⁶Kaa koy, Roog a ŋalaan, yaam ne ta nanan’eeruuna. O faam o rew olaa mos’eerna o waag o lay o ɗelem, a layaan fo o ñuxur no kiin, a sut o tuleer oxeene no ƭof um.

¹⁷Wiin weene kaa ndef nen xa quluɓ axaa njegeerna foofi. Kaa ndef itam nen a eel akaa nqeñ ne yetnaa. Roog koy, kaa geekan a den ɓaal-ee-ɓaal le no niɓaan ole.

¹⁸Fo a ƭelem a cegee xoox akaa mayna fo o nga’atinax, kaa naxaa we na sogaa o muc a ndeer no wiin we na ñoowaa na ƭat a saŋkax ale, yaam a yaaw cer den a paaxeer ake na ƥekaa a den caasaay.

¹⁹Kaa ndegaa a den ee xan a njeg a qoox den, too yaaga fop oo, den fa qoox den kaa ndef faɗ no fi kaa na ɓisaa na fa nqon. Oxuu refna, o paɗ no xe ta nananna a refu.

²⁰A sutooxa no ke waagna o yaq cer na adna fee, yaam a and o Yaal in fo o Muumucil in Yeesu Kiristaa. A nomtooxangaa teen boo keene a hupat a den doole, xan a moƴat o mbaaxaƭar ne da nand’ina peraand.

²¹Yaam ke moƴ’ina na den, da ñak-o-and a ƭat ale no cofel ole, ee da andin, soo a mbes a cinj kebil tedu ne Roog a coox’ina a den.

²²Ke o feƭit ndigil oleeke a layna, dalu a den: «O ɓox ole xan a geleeroox, a ñaam ke ta xuqna», too itam: «Ruul le ɓogeena boo a ƴut, xan a firkilookahin kam lopopooƈ le.»