Read NQAARIIT NE ROOG 2 Piyeer 3 Bible Online

2 Piyeer 3 - NQAARIIT NE ROOG bible

2 Piyeer 3

¹Nuun we fexuuma, keeke refu o leetar o ɗikandeer ole um bindaa a nuun. Kam xa leetar xa ƭaq axeene kaam wetandaa a nuun keene nu andna boo ƈut, ndax um yok na nuun a qalaat a paax,

²boo nu mbaag o mbetandoox yegnit padafuleer ke no duleer tedu we yaaga, mbetandoox itam kebil ne no Yaal oxe fo o Muumucil oxe, apootar we nuun a njanginna.

³Fat nu eet o and ee no ñaal palakaand ke, xan a jeg xaaxaadnax waa na mbugko ñaaƴaa na yaaw a paaxeer ake den. Xan a njeeraa a nuun,

⁴soo a layaa yee: «Coo! Ndi mam ndegit ne na kar ale ten a refu? Yaam naa maam ke a nqonu, dara suptooxee. Fop kaa ref nen yaa fo mberaandoong naa na sak ale.»

⁵Yaaga fop oo de, kaa fel weene da mbeecit ee na pexey fa lay fee Roog, asamaan fee a feeñtu, lanq ke a mbeeñit na foofi le da ndeeƭna.

⁶Roog, foofi a saŋkit’u adna fee yaaga itam, ye o jaɓ o maak ole a garna.

⁷Neene itam, fa lay fa leng kut fee a geektaa asamaan fee fo lanq ke ndiiki, boo na bes faa na hate faa. Maaga, a saŋkitkeel kam fiɗel le, den fo we mbañna a Roog fop.

⁸Kaa koy, nuun we fexuuma, a jega tig leng kaa nu mbareerna o ñak-o-and, ten refu yee: Mbaambir no Yaal oxe, bes fa leng kaa ref nen xa kiid juni, soo xa kiid juni a ndef nen a bes fa leng.

⁹O Yaal oxe ñakkee o fadin muk a tegit um, ne leng-leng a mboogtuuna. Kaa koy, a jega o muñ na nuun, yaam bugee o leng a saŋkoox, ndaa kaa bug fop a mbes pakaad den a cinj.

¹⁰Bes fee no Yaal oxe xan a gar nen o kuuɗ oxaa na ɓeedaa. Na bes feene, xan asamaan fee a ñuf, a yoon fo fangax maak. Ke Roog a fokatna fop, xan a sooynel na fiɗel fa saasu, too lanq ke fo ke refna teen fop, xan a yaqel.

¹¹Feek keene fop xan a yaqtel neene, a pesoorooƭ nuun fo o reef a Roog nuun boog a mbara o ted.

¹²Cungyo, too mbi ke nu mbaagna, ndax bes fee Roog a ñof o gar. Bes feene xan a tax asamaan fee a ñuf, soo ke fokateena a naay na fiɗel fa saasu.

¹³In o mat, kaa i cungaa ke Roog a regitna, ta ref asamaan fa nqas fo lanq qas, maa o cofel ole a genkaa.

¹⁴Nuun we fexuuma, ten taxu, ne nu cungaa bes feene, ngoorgoorlooxyo ndax nu nqool, ñak sik mbaambir Roog, ndef na jam fo ten.

¹⁵Ƭeetaqinyo ne o Yaal in a muñtaa ndax nu muc. Keene refu ke o pog in Pool a bindna a nuun itam, na pexey o jeg-yiif ole Roog a cooxuuna.

¹⁶Ten refu ke ta fi’aa kam xa leetar um fop na laytaa kaa farna no keene. A jega kam xa leetar um axeene xa ƭelem axaa ƭomeena o and. Wiin we njegeerna o and, too xeeñ den saƭkee, kaa sufaalaa ke da tekitna. Kaa mbi’aa leng kut ke fo a Pind a Tedu a lakas ake, too neene, kaa qicaa a saŋkax took a qoox den.

¹⁷Nuun we fexuuma, nu maƭooxe keene. Nu mbara o mbootoox, ndax wiin weene na mo’andaa maafkee a nuun boo nu ñak o saƭik no ngim onqe nuun.

¹⁸Njofyo mbaambir boog kam yirmande fee fo kam o jeg o and no Yaal in fo o Muumucil in Yeesu Kiristaa. Yaasam ta ɓoxotel o ndam ndiiki, bo na moos boo moos. Amiini.