Read NQAARIIT NE ROOG 1Saŋ 5 Bible Online

1Saŋ 5 - NQAARIIT NE ROOG bible

1Saŋ 5

¹Oxuu gimna yee Yeesu refu Kiristaa fee, o Muumucil oxe regteena, o ƥiy o ndimte na Roog a refataa. Oxuu fexna a Roog fee rimuuna, a fexa itam we ndimteena no ten.

²Mene i anditkaa yee i mbexa xa ƥiy axe Roog: Kaa i mbex a Roog, too ndeefaa kebil ke ten.

³Yaaga koy, fex a Roog refu gay kebil ke ten. Kebil ke ten ƭomee o ndeefel,

⁴yaam we ndimeena na Roog fop kaa maafaa adna fee, too mbir ne maafna adna fee refu o ngim in.

⁵An refu oxe maafna adna fee, a refangee oxe gimna yee Yeesu refu o Ƥeenqe Roog?

⁶O ten o mat oo, Yeesu Kiristaa, ten reefu na foofi fo fo’oy, refee yee na foofi soom, ndaa na foofi fo fo’oy. Yiif le Roog refna ndigil a seede’anaan.

⁷Yaaga koy, a jega daduk waa na seede’anan:

⁸Yiif le fo foofi le fo fo’oy le, too daduk weene a njofoora.

⁹Boo i njaɓna seede fee no wiin we, fat i and ee seede fee Roog hupun. Seede fee Roog koy refu ke ta seede’anna o Ƥeem.

¹⁰Oxe gimna no Ƥeenqe Roog, a jega seede feene kam um. Oxe gimeerna na Roog, a fi’aan o maamaaɓ, yaam gimee seede fee Roog a seede’anna o Ƥeem.

¹¹Seede feene refu yee: Kaa Roog a ci a in o ñoow o fagkeer ole, too o ñoow oleene oxe no Ƥeem.

¹²Oxe jegna o Ƥeenqe, a jega o ñoow ole. Oxe jegeerna o Ƥeenqe Roog koy, jegee o ñoow ole.

¹³Bindaam a nuun keene fop, ndax nu and ee nu njega o ñoow o fagkeer ole, nuun we ngimna no gon no Ƥeenqe Roog.

¹⁴I njega paam um njambaar nene: Boo i nqeɗna tig, ta yoon fo o bug ole Roog, xan a jaɓ a qeƭ in.

¹⁵Boo i andna yee oxe nan-gilooxaa a in no ke i nqeɗan, fat i and itam ee i ndaawa ke i nqeɗuuna boo ƈut.

¹⁶Boo o kiin a ga’na o pog um a fi’aa bakaad faa naageerna o ɓisaa na fa nqon, fat a xeɗanin. Neene, xan a coox o pog um oxaaga o ñoow ole. O ñoow oleene, xan we mbi’na bakaad faa naageerna o ɓisaa na fa nqon a ndaawin. A jega itam bakaad faa na ɓisaa na fa nqon. Layiim a nuun nu nqeɗan bakaad feene.

¹⁷Njofaƭar nuu refna bakaad oo, ndaa a jega bakaad faa naageerna o ɓisaa na fa nqon.

¹⁸I anda yee oxuu Roog a rimna genkee na bakaad. Oxe Roog a rimna kaa damooxaa, too o paaxeer oxe duqkiran.

¹⁹I anda yee na Roog i mbogu, too adna fee fop oxe na sañ-sañ fee no paaxeer oxe.

²⁰I anda itam ee o Ƥeenqe Roog a gara, too a ci’a a in o and, ndax i and o Tiindigil oxe refna Roog. In wey no Tiindigil oxe na pexey o Ƥeem Yeesu Kiristaa. Yeesu feene koy refu Roog fa ndiindigil fee fo o ñoow o fagkeer ole.

²¹Xa teɓandoong es, mbootooxyo o mbaɗoox ke refeerna Roog.