Read NQAARIIT NE ROOG Haahate we 10 Bible Online

Haahate we 10 - NQAARIIT NE ROOG bible

Haahate we 10

¹A cinj fa nqon fee Abimelek, Toola fee o ƥiy Puu’a, a ref o ndaan Dodo too a fog na carind ale Isakaar, a inooxa ndax ta wat a Isra’el. Samiir a genoogu, no joong olaa Efrayim.

²A reeƭa o kaahate Isra’el boo xa kiid qarɓeen ƭik fo xa kiid xa tadaq. Cinj kaaga, a xona soo a gasel Samiir.

³A cinj um, Ya’iir fee genoogna Galaad a inooxa, a refat o kaahate Isra’el boo xa kiid qarɓeen ƭik fo xa kiid xa ƭaq.

⁴A jeg’a xa ƥiy xa koor qarɓeen tadik axaa ŋaayoogna xa paam qarɓeen tadik soo a njeg teeru qarɓeen tadik kam o jegel olaa Galaad. Teeru keene kaa maad o nqoyeel boo xaye xa taland axe Ya’iir.

⁵Cinj kaaga, Ya’iir a xona soo a gasel Kamon.

⁶Ii-isra’el we a mbi’ahina kaa faaxeerna na kid no Yaal oxe: Kaa mbaɗooxoogu a Baaliin, Astarteyiin fo roog ke no Aa-araam we, ke no Siisidoŋ we, ke no Moomowaab we, ke no Aa-amon we fo ke no Fiifilista we. A mbaasa o Yaal oxe, a mbañatin o ndagoox.

⁷Fuux le no Yaal oxe a biltooxana Ii-isra’el we, soo ta ɓoxot a den na xa ƥay no Fiifilista we fo Aa-amon we.

⁸No kaa xotitna no hiid olaaga boo xa kiid xarɓaxay fo xa kiid ɓetaa tadaq, weene a toroxandooga soo a ñagadilaa Ii-isra’el we fop ngenoogna no batand naa Yordaan no saax laa no Aa-amori we kam Galaad.

⁹Aa-amon we a njoota a Yordaan ndax da songik itam a carind ale Yudaa, ale Bensame fo ale Efrayim. Maaga, Ii-isra’el we a naqadilooxa lool.

¹⁰A ƈufginooxa o Yaal oxe yee: «I mbakaada na wo, yaam kaa i mbaas a Roog in soo mbaɗooxaa a Baaliin.»

¹¹O Yaal oxe a doona a den ee: «Ye Miimisira we, Aa-amori we, Aa-amon we, Fiifilista we,

¹²Siisidoŋ we, Aa-amalek we fo Maamajan we[18] a toroxandaa a nuun bo nu ƈufginooxaam, ndax wat’iim a nuun na xa ƥay den?

¹³Nuun o mat, kaa nu mbaasaam soo mbaɗooxaa roog lakas. Ten taxu watkatiim a nuun.

¹⁴Ƈufginookyo boog roog ke nu njilna. Fat a mbat a nuun kam naqad nuun!»

¹⁵Ii-isra’el we a ndoona o Yaal oxe yee: «I mbakaada! Fi’i a in kuu feloonga, kaa rek, ngela wati a in xaye.»

¹⁶Maaga, Ii-isra’el we a mbatna roog can ke a ndeer den soo a ndagooxataa o Yaal oxe waag’ateerna o muñ coono ke den.

¹⁷Aa-amon we a mbokatoora soo a ndal kam Galaad. Ii-isra’el we itam a mbokatoora, a ndal Mispa.

¹⁸Maaga, wiin we Galaad fo kelfa ke den a layra a ndeer den ee: «O koor oxum na eetkaa o songik Aa-amon we? Oxe na fi’kan, xan a refat o aa-adax no we ngenna Galaad fop.»