Read NQAARIIT NE ROOG Haahate we 12 Bible Online

Haahate we 12 - NQAARIIT NE ROOG bible

Haahate we 12

¹Goor we na carind ale Efrayim a mbokatoora, a njagin Safon[19] soo a lay a Yefta yee: «Xar taxu o ñoxorkaa fo Aa-amon we too xoyiro a in i yoon fa wo? Xan i ndaaɓ mbind of, ndoxong fo ten.»

²Yefta a doona a den ee: «Mi fa xeet es, kaa i ndeeƭu no ndaawir ƭomu fo Aa-amon we, too ye ƴufginooxuuma a nuun, nu mbatiraam na xa ƥay den.

³Ye ga’uuma yee nu ƈufgiidiraam, suƭaam o ñis es, ret song Aa-amon we, soo o Yaal oxe a ɓoxot a den na xa ƥay es. Xar taxu boog nu nqire’iidaa fa mi xaye?»

⁴Yefta a fokata goor we Galaad fop soo a xire’ik fo Ee-efrayim we. Goor we Galaad a nqawa Ee-efrayim we, yaam weene kaa layoogu yee: «Nuun Gaagalaad we, waa ƈufitna na carind ale Efrayim fo na le Manaase nu ndefu.»

⁵Gaagalaad we a ƭega Ee-efrayim we cootand ke Yordaan. Mbanuu o leng no Ee-efrayim we ƈufoogna a bug’ina o joot, Gaagalaad we a laamtoogaan ee: «Ndax o Ee-efrayim refo?» A doon’angaa yee: «Ha’aa»,

⁶maaga a ngebloogaan ta lay ee «Sihibolet». A lay’angaa yee «Sibolet»,[20] yaam a ñak o waag o layin ta xool, a ndamoogaan, a mbartin paam cootand ke Yordaan. Goor Ee-efrayim cuni qarɓeen nahik fo cuni ƭik a saŋkooxa no kaaga.

⁷Yefta, o Kaagalaad oxe, a reeƭa o kaahate kam Isra’el boo xa kiid ɓetaa fo leng, cinj kaaga ta xon soo a gasel na teeru fee ta rimeena[21] kam Galaad.

⁸A cinj Yefta, Ibsan fee o Peebetleheem oxe[22] reeƭatu o kaahate kam Isra’el.

⁹A jeg’a xa ƥiy xa koor qarɓeen tadik fo xa ƥiy xa tew qarɓeen tadik. A ci’ta xa ƥiy xa tew axe ten a tolax maa fogeerna na qaw ale ten soo xa ƥiy xa koor axe ten itam ta waaƭanit a den rew maa fogeerna na qaw ale ten. A reeƭa o kaahate kam Isra’el boo xa kiid ɓetaa ƭaq.

¹⁰Cinj kaaga, Ibsan a xona soo a gasel Betleheem.

¹¹A cinj Ibsan, Elon fee fog’ina na carind ale Sabulon reeƭatu o kaahate kam Isra’el boo xa kiid xarɓaxay.

¹²Cinj kaaga, Elon a xona soo a gasel Ayalon kam o fiisel ole Sabulon.

¹³A cinj Elon, Abdon fee genoogna Piraton too a ref o ƥiy Hilel, reeƭatu o kaahate kam Isra’el.

¹⁴A jeg’a xa ƥiy xa koor qarɓeen nahik fo xa taan xa koor qarɓeen tadik axaa ŋaayoogna xa paam qarɓeen ɓetuu ƭik. Abdon a reeƭa o kaahate kam Isra’el boo xa kiid ɓetaa tadaq.

¹⁵Cinj kaaga, Abdon a xona soo a gasel Piraton kam o fiisel ole Efrayim no joong olaa no Aa-amalek waa.