Read NQAARIIT NE ROOG Haahate we 14 Bible Online

Haahate we 14 - NQAARIIT NE ROOG bible

Haahate we 14

¹Bes, Samson a reta Timna[23] soo a ga maaga o toog o Fiifilista.

²Ye ta gatna, a wetandooxaan a faap um fa ya um, a lay ee: «Ga’aam o toog o Fiifilista kam Timna too kaam bug nu nqeɗankaam o ten o tew.»

³Faap um fa ya um a layaan ee: «Ndax kaa jegee o toog na qaw in mbaat na xeet fee in fop boo a tax o waaƭtikaa o tew maa no Fiifilista xucooxar weene? Kaa koy, Samson a laya a faap um ee: «Xeɗankaam o ten rek, yaam ten felaxam.»

⁴Faap um fa ya um and’ee yee keene no Yaal oxe a inooru, yaam kaa waaƭoogu o wooƥ olaa ta daawritna fo Fiifilista we. Na jamaane faaga, Fiifilista we maadooxoogu took no Ii-isra’el we.

⁵Samson a reta Timna, a yoon fa faap um fa ya um. Yaa da mbadiidna na ƭing taxar biiñ akaa Timna, o njogoy o njanglax onqaa na ŋuuraa a xetiida fa Samson.

⁶Maaga, Yiif le no Yaal oxe a fudooxa took Samson, too fo xa ƥay xa ƥor um a fanda o njogoy onqe ne o mbambe a fandteel. Lay’ee koy a faap um fa ya um ke ta fi’’ina.

⁷A reta Timna, a lay fo o toog oxe, too o toog oxe a felaan lool.

⁸A cinj camaane leng-leng, Samson a nomtooxa Timna ndax ta gilig o toog oxaa, too a ɗapa, ndax ta ɗeet o dal ole no njogoy ne. A soƥa kam saŋaŋaar ne no njogoy ne fomb quuraand fo suum.

⁹A naqa no suum ke na xa ƥay um, a ñaamaa retaa. Yaa ta fadiidna me faap um fa ya um, a ci’a a den no suum ke, da moɗ, ndaa lay’ee a den ee no saŋaŋaar njogoy a xotit’u suum keene.

¹⁰Faap Samson a reta no mbind no toog oxe, too Samson a fi’a maaga a put, ne xa pes axe a meruuna o mbi’taa.

¹¹Ye wiin we Timna a nga’uuna, a njila xa pes qarɓeen tadik, ndax da moof fo ten.

¹²Samson a laya a den ee: «Xam coox a nuun a nax-o-gut. Nu andangaan, tektaam o ten no ñaal ɓetuu ƭik ke na put ale, xam coox a nuun sabadoor qarɓeen tadik fo toki ñaaƴir qarɓeen tadik.

¹³Nu mbaagangiraam o tekit o ten koy, nuun na cooxkaxam sabadoor qarɓeen tadik fo toki ñaaƴir qarɓeen tadik.» A ndoonaan ee: «Layi a nax-o-gut ale wo, in wey nan-gilooxang.»

¹⁴A laya a den ee: «Kaa na ñaameel a sutoora no xe na ñaamaa, ke xoƴigna a sutoor no cegu doole xe!» Ñaal tadik a mbaafa, kaa xa pes axe a mbaageerna o tekit a nax ale.

¹⁵No ñaal ɓetuu ƭikandeer naa[24] a laya o tew oxe Samson ee: «Naxi o kor of, ndax ta tekit a in a nax ale mbaat xan i ndoxong, wo fo mbind faap of. Ndax o mbol a in ƭuc taxu nu nqur a in?»

¹⁶O tew oxe Samson kaa looloogu paam um, a layan ee: «Wo kañ kaa o fañaam, bugiraamo. Woxey cooxa we na xeet es a nax-o-gut too tektiraamo o ten.» Samson a doonaan ee: «Tektinum a faap es mbaat a ya es sax. Ndax wo um tekitkan?»

¹⁷O tew oxe kaa looloogu paam Samson no ñaal ɓetuu ƭik ke na put ale den, too no ñaal ɓetuu ƭikandeer naa Samson a tektaan o ten, yaam kaa jom’andoogun. Maaga, o tew oxe a tektaan we na xeet um.

¹⁸No ñaal ɓetuu ƭikandeer naa, ye njeeƈ ne a helko fo mudaa, goor we na teeru fee a laya a Samson ee: «Xar moƴu o fel suum? Xar hupu njogoy doole?» Samson a laya a den ee: «Nu nqooxit’angee fi le mi, nu andkoogee a nax-o-gut ale mi.»

¹⁹Maaga, Yiif le no Yaal oxe a fudooxa took Samson, ta ret Askalon. A wara maaga goor qarɓeen tadik, a jang tikoorik ke den, soo a coox we and’ina a nax-o-gut ale toki ñaaƴir ke. Cinj kaaga, a nomtooxa no mbind faap um, a fuux boo a buɓaa.

²⁰O tew oxe ten a ci’e oxe reeƭna o ndiik onqe ten.