Read NQAARIIT NE ROOG Haahate we 15 Bible Online

Haahate we 15 - NQAARIIT NE ROOG bible

Haahate we 15

¹A cinj camaane leng-leng, na waxtu fee na saxad ale na bele fee, Samson a ɗeetka o teem, a ɓislooxin o mbambe. A laamta ndax ta xaƴel a rok na ndok no teem, ndaa o seemir um o koor a fañtaan,

²a layin ee: «Kaam foog’u yee kaa o fañrataa fo ten, too ci’aanum o ndiik onqe wo. Ndax o ndeɓ um o ndew moƴiran o mos? Jangeen boog.»

³Samson a laya a den ee: «No jaf leeke koy, o leng waagkiraam o xas no paaxeer ke um fi’kaa Fiifilista we.»

⁴Samson a reta, a dam xa ƥox-a-koƥ teemeed tadik, a waaƭ xa cam. Cinj kaaga, a humbrandta xa ƥox-a-koƥ axe a las ake den, xa ƭaq xa ƭaq, soo a fi o jam ndeer a las a ƭak akuu ndefna.

⁵A kaƥna xa cam axe soo a xaƴ xa ƥox-a-koƥ axe kam xa qol bele xe no Fiifilista we. Naaga, a raaɓa a keeg ake na bele fee fo xa yaƥ axe maadna o ngeenooxaa boo no cimb taxar biiñ ke fo taxar oliiw ke.

⁶Fiifilista we a laamta yee: «An fi’u keene?» A ndoone yee: «Samson fee o seemir no Tiitimna xe mat oo, yaam oxeene kaa jaɓ o tew oxe ten, a ci’in o ndiik onqe ten.» Maaga, Fiifilista we a ndeta, a ndox o tew oxe fa faap um.

⁷Samson a laya a den ee: «Feek neene nu mbesooru koy, bo um moofaa um rabdinoox took nuun.»

⁸A xawa a den a qaw a ƭomu, a war na den jaaku. Cinj kaaga, a genka no luf naa no ɓil laa Eetam.

⁹Fiifilista we a ndeta a ndal no fiisel olaa Yudaa, a langit maaga boo Lehi[25].

¹⁰Goor we na carind ale Yudaa a laya a den ee: «Xar taxu nu songiid a in?» A ndoona a den ee: «Kaa i ngar ndax i ngiɓ a Samson, mbi’in ne ta fi’na a in.»

¹¹Maaga, goor cuni tadik na carind ale Yudaa a ndeta no luf naa no ɓil laa Eetam soo a lay a Samson ee: «Ndax kaa andiro yee Fiifilista we na maadooxaa took in? Xar fi’o a in kene boog?» A doona a den ee: «Kaam fi a den ne da mbi’axama.»

¹²A layaan ee: «Kaa i ngar, ndax i ngumong, ƥoxotong na xa ƥay no Fiifilista we.» Samson a laya a den ee: «Ndaaɓooxyo yee nu mbarkiraam nuun fa qoox nuun.»

¹³A ndoonaan ee: «Ha’aa, kaa i mbugong o ngum rek soo ƥoxotong na xa ƥay den, ndaa kañ i mbarkirang.» A ngumtaan xa ƥaak xa ƭaq xa qas soo a sutiidin ɓil laa.

¹⁴Ye ta fadiidna Lehi, Fiifilista we a njibna xa soroxole, a nqetkaa fo ten. Maaga, Yiif le no Yaal oxe a fudooxa took um, xa ƥaak axe ngumit’eena a naax um a ndalfoox o mbi nen gaare faa fiɗel a doxna, soo ŋaƭir ke ten a mbat na xa ƥay um.

¹⁵A ga’a a kaaɓaaɓ o faam alaa weerafuleerna, a letin o ɓay um, a xotin soo a wartin goor juni.

¹⁶Samson a laya yee: «A kaaɓaaɓ ale no faam ole xawtum a den a qaw a ƭomu[26]. A kaaɓaaɓ ale no faam ole wartum goor juni.»

¹⁷Yaa ta layna kaaga boo a ƴut, a deɓa a kaaɓaaɓ ale koƭu. Ten taxu, o mbiñ onqaaga a ne’el Ramat-Lehi[27].

¹⁸Ne ta hoɗomeena boo a bug o xon, a ƴufginooxa o Yaal oxe, a lay ee: «Wo ci’u o tag of o ndam o maak onqene. Ndiiki koy, ndax kaa um xonkaa fo a koɗom soo yen na xa ƥay axe na qucooxar ake?»

¹⁹Roog a qaaca ɓil le gasoox’ina reeƭna Lehi, soo foofi a balit taaga. Samson a yera, yiif um a dakoox no ten, ta jokoox. Ten taxu, o mbiñ onqaaga a ne’el En-Kore[28] too a maada Lehi boo xaye.

²⁰Samson a reeƭa o kaahate Isra’el boo xa kiid qarɓeen ƭik, na jamaane fee Fiifilista we a maadooxoogna took Isra’el.