Read NQAARIIT NE ROOG Haahate we 17 Bible Online

Haahate we 17 - NQAARIIT NE ROOG bible

Haahate we 17

¹A jeg’a o koor oxaa genoogna no joong olaa Efrayim, a ne’el Mise.

²Na bes fa leng, a laya a ya um ee: «Wetandooxaa yee janganee xa monjong juni fo xa monjong teemeed xaaliis fa nqoolu too o saloox oxe janguuna mbaambir es. Mi o mat jangu xaaliis feene, oxaay fa mi.» Maaga, ya um a laya yee: «Yaasam o Yaal oxe a barke’ong, o ƥees!»

³A nomta a ya um xa monjong juni fo xa monjong teemeed xaaliis fa nqoolu xaa, soo ya um a lay ee: «Xam kesan o Yaal oxe xaaliis fene, ndax um fi’an teen o ƥees nitaal sexe naa laareena soxon xaaliis, too neene um nomtitkang o ten.»

⁴A nomta a ya um xaaliis faa. Ya um a xota teen xa monjong teemeed ƭik, a cooxin o qaaxaw oxe. Oxeene a jala teen nitaal sexe naa laareena soxon xaaliis, soo ta doonel kam mbind Mise.

⁵Mise feene koy, a jeg’a mbind roog. A fi’a nitaal pangool fo o jamb soo a dalin o leng na xa ƥeem ta refanin o saasadax.

⁶Na jamaane faaga, o maad jeg’ee kam Isra’el, too oxuu refna kaa fi’oogu kaa feluuna.

⁷A jeg’a koy, o fes o Leelewi laa genoogna Betleheem fee fogna na carind ale Yudaa.

⁸O fes oleene a inoora Betleheem kam Yudaa, a waaƭik o genand olaa jofooxuuna. Ye ta xotna a ƭat, a fadiida no joong olaa Efrayim no mbind Mise.

⁹Mise a laamtaan ee: «Mam inooro?» A doonaan ee: «O Leelewi refum, gen Betleheem kam Yudaa, ndaa kaam ref na ñaaƈ, ndax um waaƭ o genand olaa jofooxaxama.»

¹⁰Mise a layaan ee: «Geni fa mi, refat faap es[32] fo o saasadax es, too xam cooxang xa monjong xarɓaxay xaaliis fa nqoolu o hiid oluu refna fo tikoorik ke soxla’oona fo ñoowir.» O Leelewi xe a jaɓa

¹¹soo a fosoox o genat fo o koor oxeene fi’’atuuna nen o leng na xa ƥeem.

¹²Mise a dalna o Leelewi xe, ta refat o saasadax um, a genat no mbind um.

¹³Mise a laya yee: «Ndiiki koy, andaam ee xan o Yaal oxe a fi’anaam paax, feek o Leelewi xene refatu o saasadax es.»