Read NQAARIIT NE ROOG Haahate we 18 Bible Online

Haahate we 18 - NQAARIIT NE ROOG bible

Haahate we 18

¹Na jamaane faaga, o maad jeg’ee kam Isra’el, too a carind ale Dan a mbaaƭooga o fiisel olaa da ngenna, yaam boo no ñaal naaga las’afulaand o fiisel ndeer a carind ake Isra’el.

²We na carind ale Dan a lula a ndeer den goor ɓetuk cambaar waa da njilit’ina Sora fa Estawol, ndax da ngorook soo a and saax le a paax. A laya goor waaga yee: «Ndetyo ngorook saax le.» Goor we a mbadiida no joong ole Efrayim boo no mbind Mise soo a mbe maaga.

³Ne da ndeeƭna paam mbind Mise, a andda a layooƭ ale no fes o Leelewi le soo a matiid, a layin ee: «An ɓisiidong mene? Xar o fi’aa o mbiñ onqene? Xar jego mene?»

⁴A wetandooxa a den ke xew’ina fo ne Mise a rabditooguuna no calel no saasadax ke ta xot’uuna.

⁵A layaan ee: «Laamti boog a Roog boo i and ndax xan a ñaaƈ ale in a xen.»

⁶O saasadax oxe a doona a den ee: «Ndetyo na jam, xan o Yaal oxe a saytoox a nuun na ñaaƈ ale nu ndefna.»

⁷Goor ɓetuk waa a suura boo a mbadiid Layiis. A nga’a yee xeet fee ngenoogna maaga kaa yaadoox’u, a ñoowaa na jam fo no woor nen Siisidoŋ we deŋ. Jeg’ee kam saax le o leng oxaa na gal’andaa a den tee kaa maadooxaa took den. Kaa ngoƭatir’u fo Siisidoŋ we too ndeer’ee dara fo wiin lakas.

⁸Goor ɓetuk waa a nomtooxiida Sora fa Estawol me no fog den, soo weene a lay a den ee: «Xar nu ngattu?»

⁹A ndoona a den ee: «Inooxyo i songik a den yaam i nga’a yee saax laana a fela lool. Xar nu cungaa neeke mbañ o mbi dara? Ba nu yaafuus, nqotyo a ƭat, ndax nu njaɓik saax leene.

¹⁰Nu mbadangaa, xan nu soƥ maaga xeet faa yaadooxna. Saax laa a yaaja lool, too Roog a ɓoxotaan na xa ƥay nuun. A refa o mbiñ onqaa ñakeerna dara no ke refna took lanq ke.»

¹¹Maaga, goor teemeed ɓetuu fa leng na carind ale Dan a inoora Sora fa Estawol, a saq ƥonax qire’ir den.

¹²A ndeta, a ndal Kiryat-Ye’arim kam Yudaa. Ten taxu o mbiñ onqaaga refna laqa Kiryat-Ye’arim a xoyeel Saŋe ne Dan boo xaye.

¹³A inoora maaga, a ndet no joong olaa Efrayim soo a mbadiid no mbind Mise.

¹⁴Goor ɓetuk we ngorook’ina saax le Layiis a laya fog den ee: «Ndax nu anda yee a jega no leng no pind kene o jamb fo nitaal pangool fo o daaƴ fo nitaal naa laareena soxon xaaliis? Ndiiki koy, nu anda ke nu mbarna o mbi!»

¹⁵Maaga, goor ɓetuk waa a ƭapa me no fes o Leelewi le, kam mbind Mise, a laamtin nam a fi’u.

¹⁶Goor teemeed ɓetuu fa leng we na carind ale Dan saq’ina ƥonax qire’ir ke den kaa ngeenoox’u na carind ale.

¹⁷Goor ɓetuk we ngorook’ina saax le a ŋaaya, a ndok no mbind naa, a nqot o daaƴ ole fo o jamb ole fo nitaal pangool ke fo nitaal sexe ne laareena soxon xaaliis. No ngap onqaaga o saasadax oxe kaa geenoox’u na carind ale fo goor teemeed ɓetuu fa leng we saq’ina ƥonax qire’ir ke den.

¹⁸Ye o saasadax oxe a ga’na yee lakas we kaa ndok’u no mbind Mise, a nqotaa o daaƴ ole fo o jamb ole fo nitaal pangol ke fo nitaal ne laareena soxon xaaliis, a laamta a den ee: «Xar nu mbi’aa?»

¹⁹A ndoonaan ee: «Naagi muut, dam o don of! Gari yoon fa in, refat faap in[33] fo o saasadax in. O ref o saasadax no mbind no koor o leng moƴanong, ndi o ref o saasadax na carind a muum mbaat a qaw kam Isra’el?»

²⁰O saasadax oxe a maya fo o ɗaay no xeeñ um, a jang o jamb ole fo nitaal pangool ke fo o daaƴ ole soo a yoon fo a yaj alaa.

²¹A nqotatina a ƭat, a ndet soo a adin xa caaƈ axe, cegel ke fo o jeg ole den.

²²Ye da ndetna boo a ngoƭit mbind Mise caaku, goor gentand we Mise a mbokatoora soo a ndaab a den.

²³Weene kaa mbalalooxoogu we na carind ale Dan, soo da mbiƈaqiloox, a lay a Mise yee: «Ndi xar xewɗo boo fokat wiin weene fop?»

²⁴A doona yee: «Nu njanga roog ke jalin’uuma, ƥis o saasadax oxe soo ndet. Xar yoqɗatum koy? Nam nu mbaagaxam o laamtit boog ee: ‹Xar xewɗo?› »

²⁵We na carind ale Dan a layaan ee: «Ba i nanat o ñuxur of, ndik ta jeg goor waa mbuuxna, a yen took nuun, soo o ñak o ñis of, wo fo ƥasil of.»

²⁶Cinj kaaga, we na carind ale Dan a suura a ƭat den. Ye Mise a ga’na yee weene ngupun doole, a nomtooxa, a gat no mbind um.

²⁷Neene we na carind ale Dan a njangtu ke Mise a jal’ina soo a ƥis o saasadax oxe jalanooguuna. A mbadiida Layiis, a song xeet fee yaadoox’ina teen too a ndef no woor, a mbarit a den laƥ soo a ndaaɓ teeru fee.

²⁸Layiis fee reeƭna na yulanq alaa Bet-Rehob kaa goƭatir’u fa Sidoŋ too we ngenna teen ndeer’ee dara fo wiin lakas we. Ten taxu o leng ƴufgiid’ee a den. We na carind ale Dan a maxatina teeru fee soo a ndal teen.

²⁹A ne’ta teeru fee a Dan reeƭna o taan den too a ref o ƥiy Yakoob, ndaa teeru fee Layiis a ne’’e yaaga.

³⁰We na carind ale Dan a sipana a qoox den nitaal sexe ne, soo Yoonatan fee o ƥiy Geersom fee o ndaan Moyiis[34] ten fo xa ƥeem, a ndefan a carind ale Dan saasadax boo neen saax le a ƥise took o hup doole.

³¹A ngeekana a qoox den, no camaane ke o faɗoorand ole a refna kam Silo, nitaal sexe ne Mise a fi’’ina.